ಆನಂದ ಎಸ್.ಎನ್.

ಎಲೈ ಮಾನವ, ಎಚ್ಚರದಿಂದಿರು
‘ನಾನು’ ಎಂದು ಬೀಗುವುದನು ಬಿಡು
ನಿನ್ನ ನಾಶಕ್ಕೆ ಕಣ್ಣಿಗೆ ಕಾಣದ
ಒಂದು ಕ್ರಿಮಿ ಸಾಕು; ಇದನು ತಿಳಿದು ಬದುಕು !

ವಿಶ್ವದ ಮಾನವನ ಜೀವನ ಬಿಕ್ಕಟ್ಟಿನಲ್ಲಿದೆ
ಬುದ್ಧಿವಂತಿಕೆ, ಬೆಳವಣಿಗೆ ಎಲ್ಲಾ ಕೈಕೊಟ್ಟಿದೆ
ಗಾಳಿ ನೀರು ಬೆಳಕು ಭೂಮಿ ಮಲಿನಗೊಂಡಿದೆ
ಯುದ್ಧದ ದೊಡ್ಡ ದೊಡ್ಡ ಅಸ್ತ್ರಶಸ್ತ್ರಗಳ ಶಕ್ತಿ ನಿಷ್ಕ್ರಿಯವಾಗಿದೆ
ಮಾನವನ ಜೀವ ಉಳಿಸಲು ಟ್ಯೂಬ್ ಗಳೊಳಗೆ ಶೋಧ ನಡೆದಿದೆ

ಈಗ ಸುಮ್ಮನಿರುವ ಕಾಲ ಬಂದಿದೆ
ಕ್ರಿಯೆಯಂತೆ ನಿಷ್ಕ್ರಿಯತೆಯೂ ಒಂದಿದೆ
ಒಬ್ಬರಿಂದ ಒಬ್ಬರಿಗೆ ಹರಡುವ ರೋಗದ ಮಧ್ಯೆ
ಒಬ್ಬರು ಹಿಂದೆ ಸರಿದು ಸುಮ್ಮನಿದ್ದರೆ
ಸರಪಳಿ ಕಳಚುವುದು; ಮಾನವಕುಲವೇ ಉಳಿಯುವುದು !

ಧೈರ್ಯವಂತ ಅವಿವೇಕಿಗಳಾಗಬೇಡಿ
ನಿರ್ಲಕ್ಷ್ಯದಿಂದ ಎಗ್ಗಿಲ್ಲದೆ ಎಲ್ಲೆಂದರಲ್ಲಿ ನುಗ್ಗಬೇಡಿ
ಭೀತಿಯಿಂದ ತಪ್ಪು ಕೆಲಸ ಮಾಡಬೇಡಿ
ಹೆಚ್ಚು ಕೆಲಸ, ಪ್ರಯಾಣಗಳನ್ನೆಲ್ಲಾ ಮುಂದೂಡಿ
‘ನಾವು ವಾಹಕಗಳು’ ಎಂಬುದನ್ನು ಮರೆಯಬೇಡಿ !

ಸ್ನೇಹ, ನಿಕಟತೆ ಸ್ವಲ್ಪ ಸಮಯ ತಪ್ಪಿಸಿ
ಇತರರಿಂದ ದೂರವಿರಲು ಮನಸುಹೃದಯ ಒಪ್ಪಿಸಿ
ಮುನ್ನೆಚ್ಚರಿಕೆ ಎಂದರೆ ಸರಿಯಾದ ಕೆಲಸ ಮಾಡುವುದು
ಅದೆಂದರೆ, ಎಲ್ಲರಿಂದ ದೂರ ಕಾಯ್ದುಕೊಳ್ಳುವುದು !

ಇದು ಅಂತರ್ಮುಖವಾಗಿ ತಿರುಗುವ ಸಮಯ
ಇದು ಜೀವನವನ್ನು ಹತ್ತಿರದಿಂದ ನೋಡುವ ಸಮಯ
ನಮ್ಮ ಅಸ್ತಿತ್ವದ ದುರ್ಬಲ ಸ್ವರೂಪವನ್ನು ಅರಿತುಕೊಳ್ಳುವ ಸಮಯ
ಬದುಕಿನ ‘ಬಿಜಿ’ಯಿಂದ ಬಿಡುಗಡೆಗೊಂಡು ಕಣ್ಣು ಮುಚ್ಚಿ
ಕುಳಿತುಕೊಳ್ಳುವ ಸಮಯ; ‘ಸತ್ಯದರ್ಶನ’ ಮಾಡಿಕೊಳ್ಳುವ ಸಮಯ !

ತುಮಕೂರು ಜಿಲ್ಲೆಯ ಆಂಧ್ರ ಗಡಿಗಳಲ್ಲಿ ಆಂಧ್ರ ಸರ್ಕಾರ ನರಪಿಳ್ಳೆಯನ್ನೂ ಆಂಧ್ರ ಪ್ರದೇಶದ ಒಳ ಬಿಡದಂತೆ ತಡೆಯುತ್ತಿದೆ. ಆದರೆ ತುಮಕೂರು ಜಿಲ್ಲೆ ಪಾವಗಡ ಸೇರಿದಂತೆ ಜಿಲ್ಲೆಯಾದ್ಯಂತ ಕಾಟಾಚರದ ಕಾರ್ಯಾಚರಣೆ ನಡೆಸಲಾಗುತ್ತಿದೆ ಎಂಬ ಆರೋಪಗಳು ಕೇಳಿ ಬರುತ್ತಿವೆ.

ಪಾವಗಡ ಪಟ್ಟಣದ ಕುರಿ ಸಂತೆಗೆ ಸಾವಿರಾರು ಕುರಿಗಳೊಂದಿಗೆ ವ್ಯಾಪಾರಿಗಳು, ರೈತರು ಬಂದಿದ್ದರು. ಖಾಸಗಿ ಬಸ್ ಗಳಲ್ಲಿ ಒಬ್ಬರ ಮೇಲೆ ಒಬ್ಬರು ಕುಳಿತು ಪ್ರಯಾಣಿಸಿದರು. ಸಾಲದು ಎಂಬಂತೆ ಆಟೋಗಳಲ್ಲಿ ಕುರಿ ತುಂಬುವಂತೆ ಜನರನ್ನು ತುಂಬಿಕೊಂಡು ಹೋಗುತ್ತಿದ್ದ ದೃಶ್ಯ ಸಾಮಾನ್ಯವಾಗಿತ್ತು.

ಪೊಲೀಸರೊಂದಿಗೆ ಅಂಗಡಿ ಮಳಿಗೆ ಮಾಲೀಕರು ಸೋಮವಾರ ಕಣ್ಣಾಮುಚ್ಚಾಲೆ ಆಟ ಆಡಿದರು. ಮಧ್ಯಾಹ್ನದವರೆಗೆ ಸಂತೆ ನಡೆಯಿತು. ತರಕಾರಿ ಇತ್ಯಾದಿಗಳನ್ನು ಯಾವುದೇ ಎಚ್ಚರಿಕೆ ಕ್ರಮ ತೆಗೆದುಕೊಳ್ಳದೆ ಮಾರಾಟ ಮಾಡಲಾಯಿತು.

ಆಂಧ್ರ ಸರ್ಕಾರ ಗಡಿಯಲ್ಲಿ ಚೆಕ್ ಪೋಸ್ಟ್ ಆರಂಭಿಸಿದೆ

ಆಗ ಎಚ್ಚೆತ್ತವರಂತೆ ಬಂದ ಪೊಲೀಸರು ಅಂಗಡಿಗಳನ್ನು ಮುಚ್ಚಿಸಲು ಹರಸಾಹಸ ಪಟ್ಟರು. ಒಂದು ಕಡೆಯಿಂದ ಮುಚ್ಚಿಸಿದರೆ ಮತ್ತೊಂದು ಕಡೆಯಿಂದ ಬಾಗಿಲು ತೆಗೆದು ವ್ಯಾಪಾರಿಗಳು ಮಾರಾಟ ಮಾಡಿದರು.

ಕೆಲವರು ಅರ್ಧ ಬಾಗಿಲು ತೆರೆದು ಮಾರಾಟ ಮಾಡಿದರೆ, ಮತ್ತೆ ಕೆಲವರು ಗ್ರಾಹಕರನ್ನು ಮಳಿಗೆ ಒಳ ಬಿಟ್ಟು ಹೊರಗಡೆಯಿಂದ ಯಾರೂ ಬಾರದಂತೆ ಬಾಗಿಲು ಹಾಕಿ ಕಾವಲು ಕುಳಿತಿದ್ದರು.

ಕೊರೊನಾ ಹೆಮ್ಮಾರಿಯಂತೆ ವ್ಯಾಪಿಸುತ್ತಿರುವ ಬಗ್ಗೆ ಸರ್ಕಾರ ನಿರ್ಬಂಧ ವಿಧಿಸಿದರೂ ಜನತೆ ಅರ್ಥ ಮಾಡಿಕೊಳ್ಳುತ್ತಿಲ್ಲ ಎಂದು ವ್ಯಾಪಾರಿಗಳು ಹಾಗೂ ಜನತೆಯ ಆಟಾಟೋಪಗಳನ್ನು ನೋಡಿದ ಕೆಲವರು ಬೇಸರ ವ್ಯಕ್ತಪಡಿಸಿದರು.

ಕುರಿಸಂತೆಯಲ್ಲಿ ಹಣ ಕಳೆದುಕೊಂಡ ರೈತರು: ಏಕಾ ಏಕಿ ಪೊಲೀಸರು ಕುರಿ ಸಂತೆಯ ಮೇಲೆ ಧಾಳಿ ನಡೆಸಿದ್ದರಿಂದ ರೈತರು, ವ್ಯಾಪಾರಿಗಳು ದಿಕ್ಕಾಪಾಲಾಗಿ ಓಡಿದರು. ಇದರಿಂದ ಕೆಲವರು ಕುರಿ, ಹಣ ಕಳೆದುಕೊಂಡರು. ಲಾರಿಯಲ್ಲಿ ಹಾಗೂ ವಾಹನದಲ್ಲಿ ಕುರಿಗಳನ್ನು ತುಂಬಿಕೊಂಡಿದ್ದವರು ರೈತರಿಗೆ ಹಣ ಕೊಡದೆ ಪರಾರಿಯಾಗಿದ್ದಾರೆ ಎಂಬ ಆರೋಪಗಳು ಕೇಳಿಬಂದವು.

ಆಂಧ್ರ ಸರ್ಕಾರ ಕಟ್ಟು ನಿಟ್ಟಾಗಿ ನಿರ್ಬಂಧ ವಿಧಿಸಿದ್ದರಿಂದ ತಾಲ್ಲೂಕಿಗೆ ಬರುವವರು, ತುಮಕೂರು, ಬೆಂಗಳೂರಿಗೆ ಹೋಗುವವರು ಸಾಕಷ್ಟು ಸಮಸ್ಯೆ ಎದುರಿಸಬೆಕಾಯಿತು. ಕೊಂಕಣ ಸುತ್ತಿ ಮೈಲಾರಕ್ಕೆ ಹೋಗುವಂತೆ ಸುತ್ತಿ ಬಳಸಿ ಹೋಗುವ ಅನಿವಾರ್ಯತೆಗೆ ಜನತೆ ಸಿಲುಕಿದರು.

ತುರುವೇಕೆರೆ:
ಕೊರೋನಾ ಭೀತಿಯ ಹಿನ್ನಲೆಯಲ್ಲಿ ಇಲ್ಲಿನ ಎಸ್‍ಬಿಐ ಶಾಖೆಯಲ್ಲಿ ಗ್ರಾಹಕರ ಗುಂಪು ಪ್ರವೇಶಕ್ಕೆ ನಿರ್ಬಂಧ ವಿಧಿಸಿದ್ದರಿಂದ ಗ್ರಾಹಕರು ಗಂಟೆಗಟ್ಟಲೆ ಸಾಲುಗಟ್ಟಿ ಬ್ಯಾಂಕಿನಾಚೆ ನಿಂತು ಸಂಯಮ ಮೆರೆದರು.
ಹೆಚ್ಚು ಜನರು ಒಂದೇ ಬಾರಿಗೆ ಗುಂಪಿನಲ್ಲಿ ಬ್ಯಾಂಕಿನೊಳಗೆ ವ್ಯವಹರಿಸುವುದನ್ನು ತಡೆಗಟ್ಟಲು ಒಬ್ಬೊಬ್ಬರೇ ಗ್ರಾಹಕರನ್ನು ಒಳಗೆ ಬಿಡಲಾಗುತ್ತಿತ್ತು. ಇದರಿಂದಾಗಿ ಗ್ರಾಹಕರು ಅದರಲ್ಲೂ ವಿಶೇಷವಾಗಿ ಸಂತೆ ಇಲ್ಲವೆಂಬುದನ್ನು ತಿಳಿಯದೆ ಪಟ್ಟಣಕ್ಕೆ ಬಂದ ಹಳ್ಳಿಗರು ಬ್ಯಾಂಕಿನ ಮುಂಭಾಗ ತಮ್ಮ ಸರದಿ ಕಾಯುತ್ತಾ ಸಾಲುಗಟ್ಟಿ ನಿಂತಿದ್ದರು. ಅವರಲ್ಲಿ ಕೆಲವರು ಕೊರೋನಾ ಭೀತಿಯಿಂದ ಮಾಸ್ಕ್ ಧರಿಸಿದ್ದರೆ ಮತ್ತೆ ಬಹಳಷ್ಟು ಜನ ಮಾಮೂಲಾಗೇ ಯಾವುದೇ ಅಳುಕು ಇಲ್ಲದೆ ನಿಂತಿದ್ದರು.ಗ್ರಾಹಕರು ಒಬ್ಬರಿಗೊಬ್ಬರು ದೂರ ಕಾಯ್ದುಕೊಳ್ಳದೆ ಒತ್ತಟ್ಟಿಗೇ ಸಾಲುಗಟ್ಟಿ ನಿಂತಿದ್ದರಿಂದ ಬ್ಯಾಂಕ್ ಒಳಗಿನ ಪ್ರವೇಶ ನಿರ್ಬಂಧ ಅಷ್ಟೇನೂ ಪ್ರಯೋಜನಕಾರಿ ಎನಿಸಲಿಲ್ಲ. ಗ್ರಾಹಕರಲ್ಲಿ ಬ್ಯಾಂಕ್ ಸಿಬ್ಬಂದಿ ಪರಸ್ಪರ ದೂರ ಕಾಯ್ದುಕೊಳ್ಳುವ ಜಾಗೃತಿ ಮೂಡಿಸಬೇಕಿತ್ತು ಎಂದು ಹಲವು ನಾಗರಿಕರು ಅಭಿಪ್ರಾಯಪಟ್ಟರು. ಪಾಸ್‍ಬುಕ್ ಎಂಟ್ರಿ, ಶಿಲ್ಕು ವಿಚಾರಣೆ, ಆಧಾರ್ ತಿದ್ದುಪಡಿ ಈ ಸೇವೆಗಳನ್ನು ಬ್ಯಾಂಕ್ ನಿರ್ಬಂಧಿಸಿದ್ದರಿಂದ ಇದರ ಅರಿವಿರದ ಹಲವು ಅನಕ್ಷರಸ್ಥರು ಬಹಳಷ್ಟು ಸಮಯ ಸಾಲಿನಲ್ಲಿ ನಿಂತು ನಂತರ ವಿಷಯ ತಿಳಿದು ನಿರಾಸೆಯಿಂದ ಹಿಂದಿರುಗಿದರು. ಬ್ಯಾಂಕಿನ ಸರ್ವರ್ ಸಹ ಬಹಳ ಹೊತ್ತು ಕೈ ಕೊಟ್ಟಿದ್ದರಿಂದ ಸಾಲಿನಲ್ಲಿ ನಿಂತ ಹಲವು ವ್ಯವಹಾರಸ್ಥರು ನಗದು ಜಮಾ ಮಾಡಲು ಹಾಗೂ ಹಣ ವರ್ಗಾವಣೆ ಮಾಡಲು ತೀವ್ರ ಸಮಸ್ಯೆ ಎದುರಿಸಬೇಕಾಯಿತು.