ತುಮಕೂರು: ಹೊಸ ವರ್ಷದ 2ನೇ ದಿನವೇ ಪ್ರಧಾನಿ ನರೇಂದ್ರ ಮೋದಿ ತುಮಕೂರು ನಗರಕ್ಕೆ ಭೇಟಿ ನೀಡುತ್ತಿದ್ದು ವ್ಯಾಪಕ ಬಂದೋಬಸ್ತ್ ಹಾಕಲಾಗಿದೆ. ನಗರದ ಎಲ್ಲ ಕಡೆ ಪೊಲೀಸರು ಕಂಡುಬರುತ್ತಿದ್ದಾರೆ.

ಸಿದ್ದಗಂಗಾ ಮಠಕ್ಕೆ ಪ್ರಧಾನಿ ಮೊದಲು ಆಗಮಿಸಿ ಅಲ್ಲಿಯೇ ಸ್ವಲ್ಪಕಾಲ ವಿದ್ಯಾರ್ಥಿಗಳಿಗೆ ಭಾಷಣ ಮಾಡಲಿರುವ ಹಿನ್ನೆಲೆಯಲ್ಲಿ ಸಿದ್ದಗಂಗಾ ಬೆಟ್ಟದ ಮೇಲೆ ವಿಶೇಷ ರಕ್ಷಣ ಪಡೆ (ಎಸ್.ಪಿ.ಜಿ)ಯ ಯೋಧರು ಕಾವಲು ಕಾಯುತ್ತಿದ್ದಾರೆ. ಯಾವುದೇ ಅಹಿತಕರ ಘಟನೆ ನಡೆಯದಂತೆ ಕಟ್ಟೆಚ್ಚರ ವಹಿಸಲಾಗಿದೆ.

ಈಗಾಗಲೇ ಇಡೀ ನಗರ ಎಸ್.ಪಿ.ಜಿ ಕಮಾಂಡೋಗಳ ವಶಕ್ಕೆ ಪಡೆದುಕೊಳ್ಳಲಾಗಿದೆ. ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಭದ್ರತೆ ಒದಗಿಸುವ ದೃಷ್ಟಿಯಿಂದ ಈ ಕ್ರಮ ಕೈಗೊಳ್ಳಲಾಗಿದೆ. ಬಿ.ಎಚ್.ರಸ್ತೆ, ಎಂ.ಜಿ.ರಸ್ತೆ, ಅಶೋಕ ರಸ್ತೆ, ಕುಣಿಗಲ್ ರಸ್ತೆ, ಸೋಮೇಶ್ವರಂ ಮುಖ್ಯರಸ್ತೆ, ಬಟವಾಡಿ, ಕ್ಯಾತ್ಸಂದ್ರ, ರಿಂಗ್ ರಸ್ತೆ, ಕೋತಿ ತೋಪು, ತುಮಕೂರು ವಿವಿ ಆವರಣ ಹೀಗೆ ಎಲ್ಲ ಕಡೆ ಪೊಲೀಸರು ಗಸ್ತು ತಿರುಗುತಿದ್ದಾರೆ. ಕಾವಲು ಕಾಯುತ್ತಿದ್ದಾರೆ. ಪ್ರತಿಯೊಬ್ಬರ ಚಲನವಲನದ ಮೇಲೆ ನಿಗಾ ಇಟ್ಟಿದ್ದಾರೆ.

ಡ್ರೋಣ್ ಬಳಕೆಗೆ ನಿರ್ಬಂಧ

ಭದ್ರತೆಯ ದೃಷ್ಟಿಯಿಂದಾಗಿ ತುಮಕೂರು ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಯಾರೊಬ್ಬರೂ ಡ್ರೋಣ್ ಬಳಸಿ ಚಿತ್ರೀಕರಣ ಮಾಡುವುದನ್ನು ಜಿಲ್ಲಾಧಿಕಾರಿಗಳು ನಿಷೇಧಿಸಿದ್ದಾರೆ. ಕಳೆದ ಮೂರು ದಿನಗಳಿಂದ ಹೆಲಿಕಾಪ್ಟರ್ ಗಳಲ್ಲಿ ಭದ್ರತೆಯ ಪರಿಶೀಲನೆ ನಡೆಸಲಾಗುತ್ತಿದೆ. ದಿನಕ್ಕೆ ಎರಡು ಮೂರು ಬಾರಿ ತುಮಕೂರು ನಗರದ ಮೇಲೆ ಸೇನಾ ಹೆಲಿಕಾಪ್ಟರ್ ಗಳು ಹಾರಾಡುತ್ತಿವೆ. ಜನರು ಕುತೂಹಲದಿಂದ ಇವುಗಳನ್ನು ನೋಡುತ್ತಿದ್ದಾರೆ.

ರಾಜ್ಯಮಟ್ಟದ ಹಿರಿಯ ಪೊಲೀಸ್ ಅಧಿಕಾರಿಗಳು ತುಮಕೂರು ನಗರದಲ್ಲೇ ಮೊಕ್ಕಾಂ ಮಾಡಿದ್ದಾರೆ. ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಡಾ.ಕೋಶಿ ವಂಸಿಕೃಷ್ಣ ನೇತೃತ್ವದಲ್ಲಿ ನಗರದ ಪ್ರಮುಖ ರಸ್ತೆಗಳಲ್ಲಿ, ಮತ್ತು ಸೂಕ್ಷ್ಮ ಪ್ರದೇಶದಲ್ಲಿ ಪೊಲೀಸರು ಗಸ್ತು ತಿರುಗುತ್ತಿದ್ದಾರೆ. ಪೊಲೀಸ್ ವಾಹನಗಳ ಮೂಲಕ ನಗರದಲ್ಲೆಡೆ ಸಂಚರಿಸಿ ಭದ್ರತೆಯನ್ನು ಪರಿಶೀಲಿಸುತ್ತಿದ್ದಾರೆ.

ಮಠದ ತುಂಬೆಲ್ಲ ರಕ್ಷಣಾ ಪಡೆ

ವಿಶೇಷವಾಗಿ ಸಿದ್ದಗಂಗಾ ಮಠ ಮತ್ತು ರೈತರ ಸಮಾವೇಶ ನಡೆಯುವ ಸ್ಥಳದಲ್ಲಿ ಭಾರೀ ಕಟ್ಟೆಚ್ಚರ ವಹಿಸಲಾಗಿದೆ. ಸಮಾವೇಶದಲ್ಲಿ ಯಾವುದೇ ಲೋಪಗಳು ಜರುಗದಂತೆ ತಡೆಯುವ ಹಿನ್ನೆಲೆಯಲ್ಲಿ ಟೌನ್ ಹಾಲ್ ನಿಂದ ಕ್ಯಾತ್ಸಂದ್ರದವರೆಗೆ ವಾಹನ ಸಂಚಾರವನ್ನು ನಿರ್ಬಂಧಿಸಲಾಗಿದೆ.

ಕಾರ್ಯಕ್ರಮ ನಡೆಯಲಿರುವ ಸರ್ಕಾರಿ ಪದವಿಪೂರ್ವ ಕಾಲೇಜು ಮೈದಾನದ ಸುತ್ತಮುತ್ತ ವಾಹನ ನಿಲುಗಡೆಗೂ ಒಂದು ದಿನದ ಮಟ್ಟಿಗೆ ನಿಷೇಧ ಹೇರಿದೆ. ಬಿ.ಎಚ್.ರಸ್ತೆ, ಅಶೋಕ ರಸ್ತೆ, ಎಂ.ಜಿ.ರಸ್ತೆ, ಜನರಲ್ ಕಾರಿಯಪ್ಪ ರಸ್ತೆ, ರಾಧಾಕೃಷ್ಣ ರಸ್ತೆ, ಎಸ್.ಎಸ್.ಪುರಂ, ಎಸ್.ಐಟಿ. ಮುಖ್ಯರಸ್ತೆ ರೈಲ್ವೆ ಸ್ಟೇಷನ್ ರಸ್ತೆ ಹೀಗೆ ಎಲ್ಲಿಯೂ ಕೂಡ ವಾಹನಗಳನ್ನು ನಿಲ್ಲಿಸುವಂತಿಲ್ಲ. ಹೀಗಾಗಿ ವ್ಯಾಪಾರ ವಹಿವಾಟು ಸಂಪೂರ್ಣ ಬಂದ್ ಆಗುವ ಸಾಧ್ಯತೆ ಇದೆ.

ಮದ್ಯ ಮಾರಾಟ ನಿಷೇಧ

ಮುನ್ನೆಚ್ಚರಿಕೆ ಕ್ರಮವಾಗಿ ಜನವರಿ 2ರ ಬೆಳಗ್ಗೆ 6 ಗಂಟೆಯಿಂದ ಜನವರಿ 3ರ ಬೆಳಗ್ಗೆ 6 ಗಂಟೆಯವರೆಗೆ ಮದ್ಯದ ಅಂಗಡಿಗಳನ್ನು ತೆರೆಯದಂತೆ ಆದೇಶಿಸಲಾಗಿದೆ.

ರೈತ ಸಂಘಟನೆಗಳು ಪ್ರತಿಭಟನೆ ನಡೆಸುವ ಎಚ್ಚರಿಕೆ ನೀಡಿರುವ ಹಿನ್ನೆಲೆಯಲ್ಲಿ ಕಾರ್ಯಕ್ರಮದ ಸ್ಥಳಕ್ಕೆ ಪ್ರತಿಭಟನಾಕಾರರು ಬರದಂತೆ ಪೊಲೀಸರು ಎಚ್ಚರಿಕೆ ವಹಿಸಿದ್ದಾರೆ ಎಂದು ಹೇಳಲಾಗುತ್ತಿದೆ.

ಎಸ್.ಪಿ.ಜಿ ಕಮಾಂಡೋಗಳು ಮತ್ತು ಸಾವಿರಾರು ಮಂದಿ ಪೊಲೀಸರು ಸರ್ಪಗಾವಲು ಹಾಕಿದ್ದಾರೆ. ಜನವರಿ 2ರಂದು ತುಮಕೂರು ನಗರದಲ್ಲಿ ವ್ಯಾಪಾರ ವಹಿವಾಟು ನಡೆಯುವುದು ಮತ್ತು ಜನರು ಒಂದು ಸ್ಥಳದಿಂದ ಮತ್ತೊಂದು ಪ್ರದೇಶಕ್ಕೆ ವಾಹನಗಳ ಮೂಲಕ ಸಂಚಾರ ಮಾಡುವುದು ಕಷ್ಟವಾಗುವ ಸಾಧ್ಯತೆ ಇದೆ.

ನಗರದಲ್ಲಿ ಕಟ್ಟುನಿಟ್ಟಿನ ನಿರ್ಬಂಧಗಳನ್ನು ಹೇರಿರುವುದರಿಂದ ಹೊರಭಾಗಗಳಿಂದ ತುಮಕೂರು ನಗರಕ್ಕೆ ಬರುವ ಸಾರ್ವಜನಿಕರು ತೊಂದರೆ ಅನುಭವಿಸಲಿದ್ದಾರೆ. ಬೆಂಗಳೂರು, ಸಿರಾ, ಕುಣಿಗಲ್, ಗುಬ್ಬಿ ಕಡೆ ತೆರಳಿರುವ ಬಸ್ ಗಳು ಸುತ್ತಿಬಳಸಿ ಹೋಗಬೇಕಾಗುತ್ತದೆ. ಆಟೊಗಳು ಕೂಡ ಬೇರೆ ಬೇರೆ ಮಾರ್ಗಗಳ ಮೂಲಕ ತೆರಳಬೇಕಾಗುವ ಸಾಧ್ಯತೆ ಇದೆ.

ತುಳಸೀತನಯ

ತುಮಕೂರು: ಅಂತೂ ಇಂತು ಈ ವರ್ಷ ಮುಗಿತಪ್ಪ. ನಾಳೆಯಿಂದ ಹೊಸ ವರ್ಷ. ಇಷ್ಟು ದಿನ ಏನೇನು ಮಾಡಬೇಕೆಂದುಕೊಡಿದ್ದೇನೋ ಅದನ್ನ ಇನ್ಮೇಲೆ ಎಲ್ಲಾನು ಚಾಚೂ ತಪ್ಪದೇ ಮಾಡಬೇಕಪ್ಪ.

ಅರೇ..! ಇಷ್ಟು ದಿನ ಅಂದುಕೊಂಡು ಏನೂ ಮಾಡ್ದೇ ಸುಮ್ನೆ ಕಾಲ ಕಳೆದುಬಿಟ್ಟಿದ್ದೀನಿ ಇನ್ಮೇಲಾದ್ರೂ ಇತ್ತ ಗಮನಹರಿಸಬೇಕಪ್ಪಾ.

ಈ ವರ್ಷ ಮುಗಿಯೋ ಅಷ್ಟರಲ್ಲಿ ನಾನು ಏನಾರ ಮಾಡಿ ಸೆಟ್ಲಾಗಿ ಬಿಡಬೇಕು. ಹೀಗೆ ಪ್ರತಿಯೊಬ್ರೂ ಪ್ರತಿ ವರ್ಷ ಹೊಸ ವರ್ಷದ ಹೊಸ್ತಿಲಲ್ಲಿ ಹೆಜ್ಜೆ ಇಡುವಾಗ ಅಂದುಕೊಳ್ಳೋದು ಸಹಜ. ಆದರೆ ಅಂದುಕೊಂಡವುಗಳಲ್ಲಿ ವರ್ಷಾಂತ್ಯದಲ್ಲಿ ಎಷ್ಟು ಪೂರೈಸಿದ್ದೇವೆ ಎಂದು ಹಿಂತಿರುಗಿ ನೋಡಿದಾಗ ಬೆರೆಳಣಿಕೆಯಷ್ಟೆ ಕಾರ್ಯಗತವಾಗಿರುತ್ತವೆ. ಕೆಲವೊಮ್ಮೆ ಅವೂ ಕೂಡ ಆಗಿರುವುದಿಲ್ಲ.

ಮತ್ತದೇ.. ಅಯ್ಯೋ..! ಈ ವರ್ಷ ಅಂದುಕೊಂಡಿದ್ದು ಆಗಲಿಲ್ಲ ಅಂತಾ, ಹಾಕಿಕೊಂಡ ಯೋಜನೆಗಳು ಮುಂದಿನ ವರ್ಷಕ್ಕೆ ಮುಂದೂಡೋದು.

ಹೀಗೆ ಪ್ರತೀ ವರ್ಷ ದಿನಗಳು ಕಳೆದೇ ಹೋಯಿತು. ಒಂದೊಳ್ಳೆ ದಿನ ಬಂದೇ ಬರುತ್ತೆ ಅಂತಾ ಅಂದುಕೊಂಡು ಕಾದು ಕುಳಿತ್ತದೆ ಆಯ್ತು. ಆ ದಿನ ಬರಲಿಲ್ಲ. ಇದಕ್ಕೆ ನಾವೇ ಕಾರಣ ನಿಶ್ಚಿತ

ಯೋಜನೆಗಳೆನೋ ಮಾಡ್ತೇವೆ ಸರಿ. ಅದನ್ನು ಎಷ್ಟರ ಮಟ್ಟಿಗೆ ಅನುಸರಿಸಿದೇವೆ..? ಎಂದು ಪ್ರಶ್ನಿಸಿಕೊಂಡರೆ ದೊಡ್ಡ ಸೊನ್ನೆಯಷ್ಟೆ ಉತ್ತರವಾಗಿ ಮುಂದೆ ಬಂದು ನಿಲ್ಲುತ್ತದೆ. ಅಯ್ಯೋ..! ಇದೊಂತರ ಹೇಳಿ ಕೊಳ್ಳೋಕೆ ಆಗದಂತ ಸ್ಥಿತಿನಪ್ಪ.

ಹೇಳಂಗಿಲ್ಲಾ.. ಬಿಡಂಗಿಲ್ಲ. ಹೇಳಿಕೊಂಡ್ರೆ ಮರ್ಯಾದೆ ಹೋಗತ್ತೆ. ಹೇಳ್ದೆ ಇದ್ರೆ ಮನಸೂ ತಡೆಯೊಲ್ಲ. ಆಗಂತ ಹೇಳಿಕೊಳ್ಳೋದು ಅಲ್ಲ. ಯಾಕಂದ್ರೆ ಎಲ್ಲರ ಮನೆ ದೋಸೇನೂ ತೂತೆ. ಎಲ್ರೂ ಹಿಂಗೇ ಅಂದುಕೊಂಡಿರ್ತಾರೆ. ಆದ್ರೆ ಯಾವುದೋ ಕಾರಣಕ್ಕೆ ಅಂದುಕೊಂಡ ಕೆಲ್ಸ ಆಗ್ದೆ ಇರೋದ್ನ ಯಾರ ಅತ್ರನೂ ಹೇಳಿಕೊಂಡಿರಲ್ಲ ಅಷ್ಟೆ.

ಪ್ರತೀ ವರ್ಷ ಹೊಸ ವರ್ಷನೇ. ಡಿಸೆಂಬರ್ ತಿಂಗಳು ಬಂದ್ರೆ ಸಾಕು ಈ ವರ್ಷ ಮುಗೀತು. ಇನ್ನೇನು ಸ್ವಲ್ಪ ದಿನ ಹೊಸ ವರ್ಷ ಬಂದ್ಬಿಡತ್ತೆ ಅಂತ ಬಹಳ ಸಂತೋಷ ಪಡ್ತಾ ಇರ್ತೀವಿ. ಆದ್ರೆ ಬದಲಾಗುತ್ತಿರುವುದು ನಮ್ಮ ಮನೆ, ಆಫೀಸಿನ ಗೋಡೆ ಮೇಲೆ ನೇತಾಕಿರುವ ಕ್ಯಾಲೆಂಟರ್ ಅಷ್ಟೆ ಬದಲಾಗುತ್ತಿದೆ ಅಂತಾ ನಾವ್ಯಾರೂ ಅಂದ್ಕೊಳೋದೆ ಇಲ್ಲ.

ಹೊಸ ವರ್ಷ ಅಂತಾ ಆ ಒಂದು ದಿನ ಏನೆಲ್ಲಾ ಮೋಜು ಮಸ್ತಿ ಮಾಡಬೇಕು ಎನ್ನೋದರ ಬಗ್ಗೆಯಷ್ಟೆ ಆಲೋಚಿಸ್ತೀವಿ. ಆದ್ರೆ ಹೊಸ ವರ್ಷದ ಮೊದಲ ದಿನ ಕಳೆದು ಮರುದಿನ ಎಂದಿನಂತೆಯೇ ಅನ್ನೋದು ಮಾತ್ರ ಯಾರಿಗೂ ಅರಿವಾಗೋದೇ ಇಲ್ಲ. ಹಾಗೆ ಅನ್ನೋದೆ ಆದ್ರೆ ಬರೋ ಪ್ರತಿ ದಿನ ಕೂಡ ಹೊಸ ದಿನ, ಹೊಸ ವರ್ಷವೇ ಸರಿ. ರಾತ್ರಿ ಮಲಗಿ ಬೆಳಗ್ಗೆ ಜೀವಂತವಾಗಿ ಎದ್ದು ಪ್ರಪಂಚಕ್ಕೆ ಕಣ್ಣು ಬಿಡೋ ಸಂದರ್ಭ ನಮಗೆ ಸಿಗೋ ಮರು ಹುಟ್ಟು ಎನ್ನೋ ಸಿಂಪಲ್ ಲಾಜಿಕ್ ನಮ್ಗೆ ಅರ್ಥನೇ ಆಗೋಲ್ಲ. ಆ ಮೊದಲ ದಿನ ಇರುವ ಹುಮ್ಮಸ್ಸು ಅದ್ಯಾಕೆ ಪ್ರತಿ ದಿನ ಇರೋಲ್ಲ.

ಬದಲಾಗುತ್ತಿರುವುದು ಹಳೇ ವರ್ಷದ ದಿನಚರಿಯಷ್ಟೆ ವಿನಹ ನಮ್ಮ ಜೀವನದ ಗುರಿ ಮತ್ತು ನಮ್ಮ ಸಂಬಂಧಗಳು ಅಲ್ಲ. ಒಂದೇ ಒಂದು ದಿನ ಖುಷಿ ಪಡೋಕೆ ಹೊಸ ವರ್ಷ ಅಂತಾ ಆಚರಣೆ ಮಾಡುವ ಬದಲು ಬದುಕಿರುವ ಅಷ್ಟೂ ದಿನ ಖುಷಿಯಾಗಿರೋಕೆ ಒಳ್ಳೆ ವಿಚಾರ, ಆಲೋಚನೆ, ಒಳ್ಳೆ ಕೆಲಸ ಮಾಡೋ ಬಗ್ಗೆ ನಾವ್ಯಾಕೆ ಹೆಚ್ಚು ತಲೆ ಕೆಡಿಸಿಕೊಳ್ಳಲ್ಲ..? ನೀವೇನಂತಿರಿ…?

ತುಮಕೂರು: ತುಮಕೂರಿನ ಸರ್ಕಾರಿ ಪದವಿಪೂರ್ವ ಕಾಲೇಜು ಮೈದಾನದಲ್ಲಿ ಜನವರಿ 2ರಂದು ನಡೆಯಲಿರುವ ಕಾರ್ಯಕ್ರಮದಲ್ಲಿ ಸುಮಾರು ಒಂದೂವರೆ ಲಕ್ಷ ರೈತರು ಭಾಗವಹಿಸಲಿದ್ದಾರೆ ಎಂದು ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಹೇಳಿದರು.

ಸಿದ್ದಗಂಗಾ ಮಠ ಮತ್ತು ಕಾರ್ಯಕ್ರಮದ ಸ್ಥಳವನ್ನು ಪರೀಶೀಲನೆ ಮಾಡಿದ ಬಳಿಕ ಮಾಧ್ಯಮಗೋಷ್ಟಿಯಲ್ಲಿ ಮಾತನಾಡಿದ ಮುಖ್ಯಮಂತ್ರಿಗಳು ಸಮಾರಂಭ ನಡೆಯುವುದರಿಂದ ಸಾರ್ವಜನಿಕರಿಗೆ ತೊಂದರೆಯಾಗದಂತೆ ಕ್ರಮ ವಹಿಸಲಾಗಿದೆ. ಬಿ.ಎಚ್.ರಸ್ತೆಯಲ್ಲಿ ಎಲ್.ಇ.ಡಿ ಪರದೆಗಳನ್ನು ಅಳವಡಿಸಿ ಜನರು ವೀಕ್ಷಣೆ ಮಾಡಲು ಅವಕಾಶ ಮಾಡಿಕೊಡಲಾಗುವುದು ಎಂದರು.

ಜನವರಿ 2 ರಂದು ಮಧ್ಯಾಹ್ನ 2.15ಕ್ಕೆ ಸಿದ್ದಗಂಗಾ ಮಠಕ್ಕೆ ಬರಲಿರುವ ಪ್ರಧಾನಿ ನರೇಂದ್ರ ಮೋದಿ, ಲಿಂಗೈಕ್ಯ ಶಿವಕುಮಾರ ಸ್ವಾಮಿಗಳ ಗದ್ದುಗೆ ದರ್ಶನ ಪಡೆಯಲಿದ್ದಾರೆ. ಆನಂತರ 10 ನಿಮಿಷ ಮಠದ ವಿದ್ಯಾರ್ಥಿಗಳೊಂದಿಗೆ ಮಾತುಕತೆ ನಡೆಸಲಿದ್ದಾರೆ. ಆನಂತರ ತುಮಕೂರಿನಲ್ಲಿ ನಡೆಯಲಿರುವ ರೈತರ ಸಮಾವೇಶದಲ್ಲಿ ಭಾಷಣ ಮಾಡುವರು ಎಂದು ತಿಳಿಸಿದರು.

ಕಾರ್ಯಕ್ರಮಕ್ಕೆ ಮಣಿಪುರ ಮತ್ತು ಜಾರ್ಖಂಡ್ ಮುಖ್ಯಮಂತ್ರಿಗಳು, ರಾಜ್ಯಪಾಲರೊಬ್ಬರು ಆಗಮಿಸಲಿದ್ದಾರೆ. ವೇದಿಕೆಯಲ್ಲಿ ಪ್ರಗತಿಪರ ಅರ್ಹ ಫಲಾನುಭವಿ ರೈತರಿಗೆ ಸರ್ಟಿಫಿಕೇಟ್ ಗಳನ್ನು ವಿತರಿಸಲಾಗುವುದು. 5.30ಕ್ಕೆ ಇಲ್ಲಿಂದ ಬೆಂಗಳೂರಿಗೆ ತೆರಳಿದ್ದಾರೆ ಎಂದು ಹೇಳಿದರು.

ಇದೇ ವೇಳೆ ಮಾತನಾಡಿದ ಕಾನೂನು ಸಚಿವ ಜೆ.ಸಿ. ಮಾಧುಸ್ವಾಮಿ ಕಾರ್ಯಕ್ರಮದ ಹಿನ್ನೆಲೆಯಲ್ಲಿ ಇಡೀ ಬಿ.ಎಚ್.ರಸ್ತೆಯನ್ನು ಸಂಪೂರ್ಣವಾಗಿ ಬಂದ್ ಮಾಡಲಾಗುವುದು. ಟೌನ್ ಹಾಲ್ ನಿಂದ ಸ್ವಾಮೀಜಿ ಸರ್ಕಲ್ ವರೆಗೂ ಎಲ್.ಇ.ಡಿ. ಪರದೆಗಳನ್ನು ಅಳವಡಿಸಿ ಜನರು ಸಮಾರಂಭ ವೀಕ್ಷಣೆಗೆ ಅವಕಾಶ ಮಾಡಿಕೊಡಲಾಗಿದೆ. ಮೂರು ಕಡೆಯಿಂದ ಬರುವ ಬಸ್ ಗಳನ್ನು ರಿಂಗ್ ರಸ್ತೆ, ಕ್ಯಾತ್ಸಂದ, ಸಿರಾ ಗೇಟ್ ನಲ್ಲಿಯೇ ನಿಲ್ಲಿಸುವ ವ್ಯವಸ್ಥೆ ಕಲ್ಪಿಸಲಾಗಿದೆ ಎಂದು ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು. ಮುದ್ದಹನುಮೇಗೌಡರ ಪ್ರಶ್ನೆಗಳಿಗೆ ಆಮೇಲೆ ಉತ್ತರ ಹೇಳೋಣ. ಅದಕ್ಕೆ ಕಾಲ ಬರಲಿ ಎಂದು ವ್ಯಂಗ್ಯವಾಡಿದರು.

ತಿಪಟೂರು :
ಮೂಲಭೂತ ಸೌಕರ್ಯಕ್ಕಾಗಿ ಒತ್ತಾಯಿಸಿ ನಗರದ ಸರ್ಕಾರಿ ಪದವಿ ಕಾಲೇಜಿನ ವಿದ್ಯಾರ್ಥಿಗಳು ತರಗತಿಯನ್ನು ಬಹಿಷ್ಕರಿಸಿ ಮಂಗಳವಾರ ಪ್ರತಿಭಟನೆ ನಡೆಸಿದರು.

ನಗರದ ಪ್ರತಿಷ್ಠಿತ ಕಾಲೇಜುಗಳಲ್ಲಿ ಒಂದಾದ ಸರ್ಕಾರಿ ಪದವಿ ಕಾಲೇಜಿನ ವಿದ್ಯಾರ್ಥಿಗಳು ಸರ್ಕಾರದ ಆದೇಶದ ಪ್ರಕಾರ ಪ್ರತಿ ಒಂದು ಶಾಲಾ ಕೊಠಡಿಗೆ ಸುಮಾರು ತೊಂಬತ್ತು ರಿಂದ ನೂರು ಜನ ವಿದ್ಯಾರ್ಥಿಗಳಿಗೆ ಅನುಮೋದಿಸುವಂತೆ ಆದೇಶ ಬಂದಿದ್ದು ಅದರ ಪ್ರಕಾರ ಈಗಾಗಲೇ ಮೂರು ಜನ ವಿದ್ಯಾರ್ಥಿಗಳು ಪಾಠ ಕೇಳುವಂತಹ ಕೊಠಡಿಗಳಾಗಿ ಮೂಲಭೂತ ವ್ಯವಸ್ಥೆಗಳಾಗಲಿ ಬೋರ್ಡ್ ಗಳಾಗಲಿ ಕಾಲೇಜಿನಲ್ಲಿ ಇಲ್ಲದಿರುವುದು ದುರದೃಷ್ಟಕರ.

ಅಷ್ಟೇ ಅಲ್ಲದೆ ಅಲ್ಲದೇ ಇಲ್ಲಿಯ ಶೌಚಾಲಯಗಳು ಸ್ಥಿತಿ ಹೇಳತೀರದು.
ಕಟ್ಟಡಗಳು ಸಂಪೂರ್ಣ ಹಾಳಾಗಿದ್ದು ಬೀಳುವ ಹಂತದಲ್ಲಿದ್ದು ಎಲ್ಲೆಂದರಲ್ಲಿ ರಂಧ್ರಗಳು ಕಾಣಿಸುತ್ತಿದ್ದು ಮಳೆಗಾಲದಲ್ಲೂ ಇದರ ಸ್ಥಿತಿ ತೀರಾ ಶೋಚನೀಯವಾಗಿರುತ್ತದೆ.

ಇಂತಹ ದುಃಸ್ಥಿತಿಯಲ್ಲಿ ವಿದ್ಯಾರ್ಥಿಗಳು ತೊಂಬತ್ತು ರಿಂದ ನೂರು ವಿದ್ಯಾರ್ಥಿಗಳು ಒಂದೇ ರೂಮಿನಲ್ಲಿ ಪಾಠ ಕೇಳುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ತೀರಾ ಚಿಕ್ಕದಾದ ಶಾಲಾ ಕೊಠಡಿಗಳಲ್ಲಿ ಕುಳಿತುಕೊಂಡು ಪಾಠ ಕೇಳುವುದು ವಿದ್ಯಾರ್ಥಿಗಳಿಗಂತೂ ಶೋಚನೀಯ ಸ್ಥಿತಿ ಉಂಟಾಗಿದೆ.

ಜೊತೆಗೆ ಪದವಿ ಕಾಲೇಜು ರಾಷ್ಟ್ರೀಯ ಹೆದ್ದಾರಿ ಇನ್ನೂರರ ಅಕ್ಕಪಕ್ಕದಲ್ಲಿದ್ದು ತರಗತಿಗಳನ್ನು ಮುಗಿಸಿ ಪಕ್ಕದ ಆಡಳಿತ ಕಚೇರಿಗೆ ತೆರಳಲು ವಿದ್ಯಾರ್ಥಿಗಳು ರಾಷ್ಟ್ರೀಯ ಹೆದ್ದಾರಿಯನ್ನು ದಾಟಿ ಮುಂದೆ ಸಾಗುವಂತಹ ಪರಿಸ್ಥಿತಿ ನಿರ್ಮಾಣವಾಗಿದ್ದು ಈ ಹಂತದಲ್ಲಿ ಹಲವಾರು ಅಪಘಾತಗಳು ಈಗಾಗಲೇ ಸಂಭವಿಸಿದ್ದು ಈಗಾಗಲೇ ಕಾಲೇಜು ವಿದ್ಯಾರ್ಥಿಗಳು ಇದರಿಂದ ಸಾಕಷ್ಟು ಕಷ್ಟವನ್ನು ಅನುಭವಿಸಿರುವುದು ಕಂಡು ಬರುತ್ತಿದೆ.

ಈಗಲಾದರೂ ಕಾಲೇಜು ಶಿಕ್ಷಣ ಇಲಾಖೆಯು ಇತ್ತ ಗಮನ ಹರಿಸಿ ವಿದ್ಯಾರ್ಥಿಗಳಿಗೆ ಸೂಕ್ತ ಕೊಠಡಿ ಶೌಚಾಲಯ ಹಾಗೂ ರಸ್ತೆಯ ಬದಿಯಲ್ಲಿ ಬರುವ ಸ್ಕೈವಾಕ್ಗಳನ್ನು ನಿರ್ಮಿಸಿ ವಿದ್ಯಾರ್ಥಿಗಳಿಗೆ ಅನುಕೂಲ ಮಾಡಿಕೊಡಬೇಕೆಂದು ಇಲ್ಲಿಯ ವಿದ್ಯಾರ್ಥಿಗಳು ತಮ್ಮ ಅಳಲನ್ನು ತೋಡಿಕೊಂಡಿದ್ದಾರೆ.