ವರದಿ::ಚಲನ, ಚಿಕ್ಕನಾಯಕನಹಳ್ಳಿ ಸೀಮೆಯಿಂದ

ಚಿಕ್ಕನಾಯಕನಹಳ್ಳಿ : ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮ‌ ತುಮಕೂರು ವಿಭಾಗದ ಚಿಕ್ಕನಾಯಕನಹಳ್ಳಿ ಬಸ್ ನಿಲ್ದಾಣದ ಆಗಮನ ಮತ್ತು ನಿರ್ಗಮನದ ದ್ವಾರಗಳು(ಎಂಟ್ರಿ-ಎಕ್ಸಿಟ್ ಪಾಯಿಂಟ್ಸ್) ಅವೈಜ್ಞಾನಿಕವಾಗಿದ್ದು, ಮುಖ್ಯರಸ್ತೆಯಿಂದ ನಿಲ್ದಾಣದ ಒಳಕ್ಕೆ ನಿಗಮದ ಬಸ್ಸುಗಳು ತಿರುವು ಪಡೆಯುವಾಗ ಅಪಘಾತಗಳಿಗೆ ಎಡೆ ಮಾಡಿಕೊಡುತ್ತಿವೆ.

ಆಗಮನ ಮತ್ತು ನಿರ್ಗಮನದ ಬಗ್ಗೆ ಚಾಲಕರಿಗೆ ಸ್ಪಷ್ಟ ಸೂಚನೆಗಳನ್ನು ಕೊಟ್ಟು, ಎಲ್ಲರಿಗೂ ಕಾಣುವಂತೆ ಎಂಟ್ರಿ-ಎಕ್ಸಿಟ್ ಫಲಕಗಳನ್ನು ಹಾಕುವಂತೆ ಕೋರಿ ಕರಾರಸಾ ನಿಗಮದ ಅಧಿಕಾರಿಗಳಿಗೆ ಸ್ಥಳೀಯರು ಹಲವು ಬಾರಿ ಅರ್ಜಿ ಸಲ್ಲಿಸಿ, ಈ-ಮೇಲ್’ಗಳನ್ನೂ ಕಳಿಸಿದ್ದಾರೆ

ಹಲವುಬಾರಿ ಪತ್ರಿಕೆಗಳೂ ವರದಿ ಪ್ರಕಟಿಸಿವೆ. ಆಗಿರುವ ದೋಷಗಳನ್ನು ಸರಿಪಡಿಸುವಂತೆ ಹಲವುಬಾರಿ ಕೋರಿಕೊಂಡಿದ್ದರೂ ಸಹಾ ನಿಗಮ ತನ್ನ ಬೇಜವಾಬ್ದಾರಿ ನಡೆ ಹಾಗೂ ಅವೈಜ್ಞಾನಿಕ ಕಾಮಗಾರಿ ಮತ್ತು ಅವ್ಯವಸ್ಥೆಯನ್ನು ಸರಿಪಡಿಸಿಕೊಳ್ಳುವಲ್ಲಿ ಕನಿಷ್ಠ ಮುಂದಡಿಯಿಡುತ್ತಿಲ್ಲ ಎಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸುತ್ತಾರೆ.

ಇವರ ಈ ಇಂತಹ ಅವೈಜ್ಞಾನಿಕ ಕಾಮಗಾರಿಗಳ ಕಾರಣದಿಂದಾಗಿ ಪಟ್ಟಣದಲ್ಲಿ ದಿನಕ್ಕೊಂದು ಅಪಘಾತ ಸಂಭವಿಸುತ್ತಿವೆ. ಕರಾರಸಾ ನಿಗಮದ ಬಸ್ಸುಗಳ ಅಪಘಾತಕ್ಕೊಳಗಾಗಿರುವ ಸಂತ್ರಸ್ತರು ಮತ್ತವರ ಕುಟುಂಬಗಳ ವ್ಯಥೆ ಕೇಳುವವರಾರು ಎಂದು ಸ್ಥಳೀಯರು ಪ್ರಶ್ನಿಸುತ್ತಾರೆ.

ಮೊನ್ನೆ ಇಲ್ಲಿ ನಡೆದ ಅಪಘಾತದಿಂದಾಗಿ ಸ್ಥಳೀಯರ ಆಕ್ರೋಶದ ಬೆಂಕಿಗೆ ಇನ್ನಷ್ಟು ತುಪ್ಪ ಸುರಿದಂತಾಗಿದೆ. ಅಕ್ಟೋಬರ್ 13 ರ ಮಧ್ಯಾಹ್ನ ಸುಮಾರು 01.10’ರ ಸಮಯದಲ್ಲಿ, ಬೆಂಗಳೂರು-ಹೊಸದುರ್ಗ ಮಾರ್ಗದಲ್ಲಿ ಚಲಿಸುವ ಕೆ ಎಸ್ ಆರ್ ಟಿ ಸಿ ಯ ತಿಪಟೂರು ವಿಭಾಗದ ಕೆ ಎ-06- ಎಫ್-1334 (ನೋಂದಾಯಿತ) ದಸರಾ ವಿಶೇಷ ಬಸ್ಸು, ಚಿಕ್ಕನಾಯಕನಹಳ್ಳಿ ನಿಲ್ದಾಣದ ಒಳಕ್ಕೆ ತೆರಳಲು ತಿರುವು ಪಡೆಯುವಾಗ, ಅದೇ ಮಾರ್ಗದಲ್ಲಿ ಚಲಿಸುತ್ತಿದ್ದ ಹುಬ್ಬಳ್ಳಿ ಮೂಲದ ಕುಟುಂಬವೊಂದರ ಕಾರಿನ ಮುಂಬದಿಯನ್ನು ಉಜ್ಜಿಕೊಂಡು ಮುಂದೆಸಾಗಿ ಸ್ವಲ್ಪದರಲ್ಲೇ ಆಗಬಹುದಾಗಿದ್ದ ಅವಘಢ ತಪ್ಪಿದೆ.

ಹುಬ್ಬಳ್ಳಿ ಮೂಲದ ಕುಟುಂಬ ಮೈಸೂರಿನಲ್ಲಿ ನಾಡಹಬ್ಬ ದಸರಾ ವೀಕ್ಷಿಸಿ ಮರಳಿ ಊರಿಗೆ ಹಿಂತಿರುಗುತ್ತಿದ್ದಾಗ ನಿಗಮದ ದಸರಾ ವಿಶೇಷ ಬಸ್ಸಿನಿಂದಲೇ ಅಪಘಾತಕ್ಕೊಳಗಾಗಿದೆ. ಇದರಿಂದ ಸ್ಥಳೀಯರು ಮತ್ತಷ್ಟು ಆಕ್ರೋಶಿತರಾಗಿ ಕೆ ಎಸ್ ಆರ್ ಟಿ ಸಿ ಅಧಿಕಾರಿಗಳಿಗೆ ಶಾಪ ಹಾಕುತ್ತಿದ್ದಾರೆ.

ಶಕ್ತಿ ಯೋಜನೆಯ ವಿಪರ್ಯಾಸ::

ಮಹಿಳಾ ವಿಶ್ರಾಂತಿ ಹಾಗೂ ಶಿಶು ಆರೈಕೆ ಕೊಠಡಿ ಮತ್ತು ಬ್ರೆಸ್ಟ್ ಫೀಡಿಂಗ್ ಪಾಯಿಂಟ್ ತರಹದ ಯಾವುದೇ ಕನಿಷ್ಠ ಸೌಕರ್ಯಗಳೂ ಇಲ್ಲಿಲ್ಲ. ಶಕ್ತಿ ಯೋಜನೆಯ ಗ್ಯಾರಂಟಿಯಡಿ ಮಹಿಳೆಯರಿಗೆ ಉಚಿತ ಪ್ರಯಾಣದ ಸೌಲಭ್ಯವನ್ನೇನೋ ಕೊಟ್ಟಿದ್ದಾಯಿತು. ಆದರೆ, ಬಸ್ ನಿಲ್ದಾಣಗಳಲ್ಲಿ ಕನಿಷ್ಠ ಮೂಲಭೂತ ಸೌಕರ್ಯಗಳಾದರೂ ಒದಗಿಸಬೇಡವೇ ಎಂದು ಬೇಸತ್ತ ಬಾಣಂತಿಯರು ಇರುಸುಮುರುಸು ತೋರುತ್ತಾರೆ.

ಈ ಬಗ್ಗೆ ಉನ್ನತ ಅಧಿಕಾರಿಗಳನ್ನು ಪ್ರಶ್ನಿಸಿದರೆ, ಅವರು ಯೋಜನೆ ರೂಪಿಸುತ್ತಿರುವುದಾಗಿ ಉತ್ತರಿಸುತ್ತಾರೆ. ಈ ಮೊದಲು ‘ಪ್ರಯಾಣಿಕ ನಮ್ಮ ದೊರೆ’ ಎಂಬ ಘೋಷವಾಕ್ಯ ಬರೆದುಕೊಂಡಿದ್ದ ಕೆ ಎಸ್ ಆರ್ ಟಿ ಸಿ ಅತ್ಯಂತ ಲಾಭದಾಯಕ ಸಂಸ್ಥೆ ಎಂದು ಹೇಳಲಾಗುತ್ತದೆ. ಹಾಗಿದ್ದರೆ, ಪ್ರಯಾಣಿಕರಿಂದ ಗಳಿಸಿದ ಲಾಭವನ್ನು ಸಂಸ್ಥೆ ಏನು ಮಾಡುತ್ತಿದೆ ಎಂದು ಪ್ರಜ್ಞಾವಂತ ಪ್ರಯಾಣಿಕರು ಪ್ರಶ್ನಿಸುತ್ತಿದ್ದಾರೆ.

ಕೆರೆಯೋ, ಬಸ್ ನಿಲ್ದಾಣವೋ ::

ಸುಮಾರಾದ ಮಳೆ ಬಂದರೂ ಸಾಕು,ನಿಲ್ದಾಣದ ತಗ್ಗಿನಲ್ಲಿ ನೀರು ನಿಂತುಬಿಡುತ್ತದೆ. ಅದು ದಿ‌ಗಟ್ಟಲೆ ಹಾಗೇ ನಿಂತಿರುತ್ತದೆ. ಅಪಾರ ಸಂಖ್ಯೆಯ ಮಾರಣಾಂತಿಕ ಸೊಳ್ಳೆಗಳಿಗೆ ಅದು ಆವಾಸಸ್ಥಾನವಾಗುತ್ತಿದೆ. ದಿನಬೆಳಗಾದರೆ ಸಾವಿರಾರು ಜನ ಪ್ರಯಾಣಿಕರು, ಶಾಲಾಮಕ್ಕಳು, ಕಾಲೇಜು ವಿದ್ಯಾರ್ಥಿಗಳು, ಮಹಿಳೆಯರು ಹಾಗೂ ಹಿರಿಯ ನಾಗರೀಕರು ಓಡಾಡುವ ಜಾಗ ಇದಾದ್ದರಿಂದ ಇಲ್ಲಿರುವ ಮಾರಣಾಂತಿಕ ಸೊಳ್ಳೆಗಳ ಉಪಳಕ್ಕೆ ತುತ್ತಾದವರು ಎಷ್ಟು ಮಂದಿಯೋ ಏನೋ….

ಬಸ್ ನಿಲ್ದಾಣದಲ್ಲಿರುವ ಕ್ಯಾಂಟೀನ್’ನಲ್ಲಿ ಶುಚಿತ್ವದ್ದೇ ಸಮಸ್ಯೆ. ತೀರಾ ಕಿರಿದಾದ ಜಾಗದಲ್ಲಿ ಕ್ಯಾಂಟೀನ್ ಇರುವುದರಿಂದ ಅದರ ಅಡುಗೆಕೋಣೆಯ ಶುಚಿತ್ವದಲ್ಲಿ ಯಾವುದೇ ಮಾನದಂಡಗಳನ್ನೂ ಪಾಲಿಸಲಾಗುತ್ತಿಲ್ಲ.

ಅಲ್ಲಿ ಕೊಡುತ್ತಿರುವ ಊಟ-ತಿಂಡಿಯ ಗುಣಮಟ್ಟದ ಪರೀಕ್ಷೆ ನಡೆಸಲಾಗುತ್ತಿಲ್ಲ. ದರ ನಿಗದಿಗೆ ಸಂಬಂಧಿಸಿದ ಮಾನದಂಡಗಳ ಪಾಲನೆಯಾಗುತ್ತಿದೆಯೇ ಎಂಬುದನ್ನು ಹೇಳುವವರು ಕೇಳುವವರು ಯಾರೂ ಇಲ್ಲ ಎಂಬ ಪರಿಸ್ಥಿತಿ ಇಲ್ಲಿದೆ. ಪರವೂರಿನಿಂದ ಬಂದು ಮಾರ್ಗಮಧ್ಯೆ ಇಲ್ಲಿ ತಿಂಡಿ ಸೇವಿಸುವ ಪ್ರಯಾಣಿಕರು ಇಲ್ಲಿನ ಅವ್ಯವಸ್ಥೆಯನ್ನು ಹೊಟ್ಟೆತುಂಬಾ ದೂಷಿಸುತ್ತಾರೆ.

ಆಗಮನ ಮತ್ತು ನಿರ್ಗಮನ ದ್ವಾರಗಳ ಅವೈಜ್ಞಾನಿಕ ಅವ್ಯವಸ್ಥೆ ಒಂದೆಡೆಯಾದರೆ, ನಿಲ್ದಾಣದ ಒಳಗಡೆ ಬಸ್ಸುಗಳು ಬಂದು ನಿಲ್ಲಲು ಪ್ರತ್ಯೇಕ ಲೇನ್’ಗಳನ್ನೇ ನಿರ್ಮಿಸಿಲ್ಲ. ಯಾವ ಊರು, ಎತ್ತ ಕಡೆ ಪ್ರಯಾಣ, ಯಾವ ನಿಲ್ದಾಣ, ಇತ್ಯಾದಿ ಯಾವುದೇ ಬಗೆಯ ಮಾರ್ಗಸೂಚಿ ಫಲಕಗಳಿಲ್ಲ. ಯಾವ ಬಗೆಯ ಪ್ರತ್ಯೇಕ ವ್ಯವಸ್ಥೆಯೂ ಇಲ್ಲ. ಮಹಿಳಾ ವಿಶ್ರಾಂತಿ ಹಾಗೂ ಶಿಶು ಆರೈಕೆ ಕೊಠಡಿ ಅಥವಾ ಬ್ರೆಸ್ಟ್ ಫೀಡಿಂಗ್ ಪಾಯಿಂಟ್ ಸೌಕರ್ಯಗಳೂ ಇಲ್ಲಿಲ್ಲ ಎಂದು ಪುರಸಭಾ ಸದಸ್ಯ ಮಹಮದ್ ಹುಸೇನ್ ಅಸಮಾಧಾನ ವ್ಯಕ್ತಪಡಿಸುತ್ತಾರೆ.

ವರದಿ,
ಸಂಚಲನ
ಚಿಕ್ಕನಾಯಕನ ಸೀಮೆಯಿಂದ

ತುರುವೇಕೆರೆ: ಮಹರ್ಷಿ ವಾಲ್ಮೀಕಿಯವರು ಬರೆದ ರಾಮಾಯಣ ಕಾವ್ಯವು ಜಗತ್ತಿನ ಮಹಾಕಾವ್ಯಗಳಲ್ಲೇ ಅತ್ಯಂತ ದಾರ್ಶನಿಕವಾದ ಕೃತಿ ಎಂದು ಶಾಸಕ ಎಂ.ಟಿ.ಕೃಷ್ಣಪ್ಪಅಭಿಪ್ರಾಯ ಪಟ್ಟರು.

ಪಟ್ಟಣದ ತಾಲ್ಲೂಕು ಕಚೇರಿಯಲ್ಲಿ ತಾಲ್ಲೂಕು ಆಡಳಿತ, ತಾಲ್ಲೂಕು ಸಮಾಜ ಕಲ್ಯಾಣ ಇಲಾಖೆಯ ವತಿಯಿಂದ ಗುರುವಾರ ಹಮ್ಮಿಕೊಂಡಿದ್ದ ಮಹರ್ಷಿ ವಾಲ್ಮೀಕ ಜಯಂತಿ ಆಚರಣೆಯ ಅಂಗವಾಗಿ ವಾಲ್ಮೀಕಿ ಭಾವ ಚಿತ್ರಕ್ಕೆ ಪುಷ್ಪಾರ್ಚನೆ ಮಾಡಿ ಮಾತನಾಡಿ ಅವರು

ರಾಮಾಯಣದಲ್ಲಿ ದಶರತನ ಪುತ್ರ ವಾತ್ಸಲ್ಯ, ಪಿತೃಪಾರಿಪಾಲನೆ, ರಾಮನ ಆದರ್ಶ, ಪ್ರಜಾನುರಾಗಿ ಆಡಳಿತ ಇಂತಹ ಹತ್ತಾರು ಘಟನೆಗಳು, ಕಾವ್ಯದಲ್ಲಿ ಮೇಳೈಸಿವೆ. ಪರಿಪೂರ್ಣ ವ್ಯಕ್ತಿತ್ವದ ಮೂಲಕ ರಾಮನ ಆದರ್ಶ ಗುಣವನ್ನು ವಾಲ್ಮೀಕಿ ಕವಿ ವಿಶ್ವ ವಿಖ್ಯಾತಗೊಳಿಸಿದ್ದಾರೆ.

‘ರಾಮಾಯಣ’ ಕಾವ್ಯ ಕೇವಲ ಚಾರಿತ್ರಿಕ ಅಥವಾ ಪೌರಾಣಿಕ ಕತೆ ಎನಿಸದೆ ಸಮಕಾಲೀನ ಜತ್ತಿಗೆ ತನ್ನದೇ ಆದ ಮೌಲ್ಯಗಳನ್ನು ತಿಳಿಸಿಕೊಡುತ್ತದೆ. ಮಿಗಿಲಾಗಿ ರಾಮಾಯಣದಲ್ಲಿ ಬರುವ ಪಾತ್ರಗಳು ಕೇವಲ ಪಾತ್ರಗಳಾಗಿ ಉಳಿಯದೇ ನಮ್ಮ ಸಮಾಜದಲ್ಲಿನ ವಿವಿಧ ಸ್ತರದ ವ್ಯಕ್ತಿಗಳ ವ್ಯಕ್ತಿತ್ವವನ್ನು ಪ್ರತಿಬಿಂಬಿಸುವ ಕೃತಿಯಾಗಿಯೂ ಹೊರಹೊಮ್ಮಿದೆ ಎಂದರು.

ತಹಶೀಲ್ದಾರ್ ಎನ್.ಎ.ಕುಂಞ ಅಹಮದ್ ಮಾತನಾಡಿ, ರಾಮಾಯಣ ಮತ್ತು ಮಹಾಭಾರತ ಎರಡೂ ಇಂಡಿಯಾದ ಮಹಾನ್ ಕಾವ್ಯಗಳು ಅವು ಸಾಂಸ್ಕೃತಿಕ, ಚಾರಿತ್ರಿಕ, ಧಾರ್ಮಿಕ, ಸಾಮಾಜಿಕ, ರಾಜನೀತಿ ಮತ್ತು ತಾತ್ವಿಕ ಅಂಶಗಳು ಅಡಕವಾಗಿವೆ. ಈ ಕಾವ್ಯಗಳಲ್ಲಿ ಅಪಾರ ಜೀವನ ಮೌಲ್ಯಗಳಿದ್ದು ಅವುಗಳನ್ನು ಯುವ ಪೀಳಿಗೆ ರೂಢಿಸಿಕೊಳ್ಳಬೇಕೆಂದು ಸಲಹೆ ನೀಡಿದರು.

ಈ ಸಂದರ್ಭದಲ್ಲಿ ಕ್ಷೇತ್ರ ಶಿಕ್ಷಣಾಧಿಕಾರಿ ಎನ್.ಸೋಮಶೇಖರ್, ತೋಟಗಾರಿಕಾ ಸಹಾಯಕ ನಿರ್ದೇಶಕಿ ಪೂಜಾ.ಬಿ, ಸಮಾಜ ಕಲ್ಯಾಣ ಇಲಾಖೆಯ ವ್ಯವಸ್ಥಾಪಕ ಶಿವಲಿಂಗಯ್ಯ, ಗ್ರಾಮ ಲೆಕ್ಕಾಧಿಕಾರಿ ರಮೇಶ್, ವಾಲ್ಮೀಕಿ ಆಶ್ರಮ ಶಾಲೆಯ ಎಚ್.ಎಸ್.ಚಿದಾನಂದಸ್ವಾಮಿ, ದಸಂಸ ಸಂಚಾಲಕ ದಂಡಿನಶಿವರ ಕುಮಾರ್, ವಾಲ್ಮೀಕಿ ಸಮಾಜದ ಅಧ್ಯಕ್ಷ ವಂಸತ್ ಕುಮಾರ್, ಬೋರಪ್ಪ, ಹುಳಿಸಂದ್ರ ಧನಂಜಯ, ಡೊಂಕಿಹಳ್ಳಿ ರಾಮಯ್ಯ, ಮುದ್ದಮಾರನಹಳ್ಳಿ ಶಿವಣ್ಣ, ಆನಂದ್ ರಾಜ್ ಸಮುದಾಯದ ಮುಖಂಡರು, ಅಧಿಕಾರಿಗಳು ಇದ್ದರು.

ಚಿಕ್ಕನಾಯಕನಹಳ್ಳಿ : ಶಾಸಕ ಸಿ ಬಿ ಸುರೇಶ್ ಬಾಬು’ರವರ ಅಧ್ಯಕ್ಷತೆಯಲ್ಲಿ ತಾಲ್ಲೂಕು ಆಡಳಿತದ ವತಿಯಿಂದ ತಹಸೀಲ್ದಾರ್ ಕಚೇರಿಯಲ್ಲಿರುವ ನ್ಯಾಯಿಕ ಸಭಾಂಗಣದಲ್ಲಿ, ಮಹರ್ಷಿ ವಾಲ್ಮೀಕಿ‌ ಜಯಂತಿಯನ್ನು ಆಚರಿಸಲಾಯಿತು.

ಜಯಂತಿ ಕಾರ್ಯಕ್ರಮಕ್ಕೆ ಆಗಮಿಸಿದ್ದ ಎಲ್ಲರನ್ನೂ ಸ್ವಾಗತಿಸಿ, ಪ್ರಾಸ್ತಾವಿಕ ಮಾತುಗಳನ್ನಾಡಿದ ತಹಸೀಲ್ದಾರ್ ಕೆ ಪುರಂದರ್’ರವರು, ಮಹರ್ಷಿ ವಾಲ್ಮೀಕಿ’ಯವರು ರಚಿಸಿದ ಭಾರತದ ಮಹಾಕಾವ್ಯವನ್ನು ಸೋದಾಹರಿಸುತ್ತಾ, ಬೇಟೆಗೆ ತುತ್ತಾದ ಪಕ್ಷಿಗಳ ಆಕ್ರಂದನವನ್ನು ಕಂಡ ವಾಲ್ಮೀಕಿ, ತಮ್ಮ ನಿಸರ್ಗ ಸಹಜವಾದ ವಿವೇಕದಿಂದ ಸತ್ಯ, ನ್ಯಾಯ, ನೈತಿಕತೆ ಮತ್ತು ಮಾನವತೆಯ ಸಂದೇಶವನ್ನು ಸಾಕ್ಷಾತ್ಕರಿಸಿ, ತನ್ನ ಕಾವ್ಯ ರಚನೆಯಲ್ಲಿ ಪ್ರಸ್ತುತಪಡಿಸಿದ ರೀತಿಯನ್ನು ಸ್ಮರಿಸಿದರು.

ದೇಶಕಾಲ ಮತ್ತು ಸಮಕಾಲೀನ ಸಮಾಜ ಹೇಗೆ ತನ್ನ ಸಾಕ್ಷೀಪ್ರಜ್ಞೆಯ ನೈತಿಕ ಹೊಣೆಗಾರಿಕೆಯ ಜೊತೆಗೆ ಅಭಿವೃದ್ಧಿ ಹೊಂದಬೇಕು ಎಂಬುದನ್ನು ಕಲ್ಪಿಸಿ ರೂಪಿಸಿಕೊಟ್ಟ ಮಹಾನ್ ಮಹರ್ಷಿ ನಮ್ಮ ವಾಲ್ಮೀಕಿ. ವಾಲ್ಮೀಕಿ ಎಂದಿಗೂ ದರೋಡೆಕೋರನಲ್ಲ. ಇದೆಲ್ಲ ಕಟ್ಟುಕತೆ. ಹಿಂದುಳಿದ ವರ್ಗಗಳ ಮಹಾಪುರುಷರ ಬಗ್ಗೆ ಈ ಬಗೆಯ ತಪ್ಪು ಚರಿತ್ರೆಗಳನ್ನು ಕಟ್ಟಿ, ಅವರ ತೇಜೋವಧೆ ಮಾಡುವ ಹುನ್ನಾರ ಆದಿಯಿಂದಲೂ ನಡೆಯುತ್ತಾ ಬಂದಿದೆ. ಇದರ ಅರಿವಿಲ್ಲದೆ ಅನೇಕಮಂದಿ ನಮ್ಮ ರಾಜಕಾರಣಿಗಳು, ಅಧಿಕಾರಿಗಳು, ಸಾರ್ವಜನಿಕರು ಎಲ್ಲರೂ ತಪ್ಪುತಪ್ಪಾಗಿ ವಾಲ್ಮೀಕಿಯವರ ಜೀವನಚರಿತ್ರೆಯ ಸುಳ್ಳು ವ್ಯಾಖ್ಯಾನಗಳನ್ನೇ ಸತ್ಯ ಎಂದು ನಂಬಿ ವೇದಿಕೆಗಳಲ್ಲಿ ಮಾತಾಡಿಬಿಡುತ್ತಾರೆ ಎಂದು ವಾಲ್ಮೀಕಿ ಸಮಾಜದ ಮುಖಂಡ ಹಾಗೂ ಡಿಸಿಸಿ ಬ್ಯಾಂಕ್ ನಿರ್ದೇಶಕ ಸಿಂಗದಹಳ್ಳಿ ರಾಜಕುಮಾರ್ ಅಸಮಾಧಾನ ವ್ಯಕ್ತಪಡಿಸಿದರು.

2008-2010’ರ ಸುಮಾರಿನಲ್ಲಿ ಉತ್ತರಪ್ರದೇಶ, ಪಂಜಾಬ್ ರಾಜ್ಯಗಳಲ್ಲಿ ಮಹರ್ಷಿ ವಾಲ್ಮೀಕಿಯವರ ಜೀವನಚರಿತ್ರೆ ಆಧಾರಿತ ಟಿವಿ ಧಾರಾವಾಹಿಯನ್ನು ಪ್ರಸಾರ ಮಾಡಲಾಗಿತ್ತು. ಆ ಧಾರಾವಾಹಿಯಲ್ಲಿ ವಾಲ್ಮೀಕಿ ತನ್ನ ಪೂರ್ವಾಶ್ರಮದಲ್ಲಿ ದರೋಡೆಕೋರನಾಗಿದ್ದ ಎಂದು ಬಿಂಬಿಸಲಾಗಿತ್ತು. ಇದನ್ನು‌ ನೋಡಿದ ಅಲ್ಲಿನ ವಾಲ್ಮೀಕಿ ಸಮುದಾಯ ಬೇಸರದದ ಕುಗ್ಗಿಹೋಗಿತ್ತು. ಆಗ ನಾವಿಕಾಸನ್ ಎಂಬ ವಕೀಲ ಅಲ್ಲಿನ ಪಂಜಾಬ್ ಹೈಕೋರ್ಟಿನಲ್ಲಿ ‘ವಾಲ್ಮೀಕಿ ಮಹರ್ಷಿಯ ಬಗ್ಗೆ ಧಾರಾವಾಹಿಯಲ್ಲಿ ಬಿತ್ತರಿಸಿರುವ ಕಟ್ಟುಕತೆ’ಯ ವಿರುದ್ಧ ದಾವೆ ಹೂಡುತ್ತಾನೆ. ಆಗ ಹೈಕೋರ್ಟ್ ಆದೇಶದ ಮೇರೆಗೆ ಅಲ್ಲಿನ ವಿಶ್ವವಿದ್ಯಾಲಯದ ಮೂಲಕ ಮಹರ್ಷಿ ವಾಲ್ಮೀಕಿ ಜೀವನಚರಿತ್ರೆಯ ಸಮಗ್ರವಾದ ಆಧುನಿಕ ಅಧ್ಯಯನ ನಡೆಸಲಾಗುತ್ತದೆ. ಈ ಅಧ್ಯಯನದ ನೇತೃತ್ವವನ್ನು ರಾಜೀವಸುಲೋಚನ ಎಂಬ ವಿದ್ವಾಂಸರಿಗೆ ವಹಿಸಿಕೊಡಲಾಗುತ್ತದೆ. ಅವರ ಸುದೀರ್ಘ ಮತ್ತು ಸಮಗ್ರವಾದ ಅಧ್ಯಯನವನ್ನು ಆಧರಿಸಿ ಅಲ್ಲಿನ ಹೈಕೋರ್ಟ್, ಧಾರಾವಾಹಿಯಲ್ಲಿ ಬಿಂಬಿಸುತ್ತಿರುವ ವಾಲ್ಮೀಕಿ ಜೀವನಚರಿತ್ರೆಯ ಅಪವ್ಯಾಖ್ಯಾನದ ವಿರುದ್ಧ ತೀರ್ಪು ನೀಡಿ ಆ ಧಾರಾವಾಹಿ ಪ್ರಸಾರಕ್ಕೆ ತಡೆ ನೀಡುತ್ತದೆ.
ಮತ್ತೆ, ಮುಂದಿನ ದಿನಗಳಲ್ಲಿ ಯಾರೂ ಯಾವುದೇ ಕಾರಣಕ್ಕೂ ಮಹರ್ಷಿ ವಾಲ್ಮೀಕಿಯವರನ್ನು ದರೋಡೆಕೋರ ಎನ್ನುವಂತಿಲ್ಲ ಎಂದು ಆದೇಶ ಹೊರಡಿಸಲಾಗುತ್ತದೆ. ಆ ತೀರ್ಪಿನ ನಂತರ ಟಿವಿ ವಾಹುನಿ ಮತ್ತು ಧಾರಾವಾಹಿ ನಿರ್ಮಾಪಕರು ಬಹಿರಂಗ ಕ್ಷಮೆ ಯಾಚನೆ ಮಾಡಬೇಕಾಯಿತು. ಹಾಗಾಗಿ, ಯಾರೂ ಯಾವುದೇ ಕಾರಣಕ್ಕೂ ವಾಲ್ಮೀಕಿ’ಯವರನ್ನು ದರೋಡೆಕೋರ ದು ತಪ್ಪುತಪ್ಪಾಗಿ ಬಿಂಬಿಸಬಾರದು ಎಂದು ಅವರು ಕಿವಿಮಾತು ಹೇಳಿದರು.

ಸಮಾಜದ ಮುಖಂಡ ಶಶಿಶೇಖರ್ ಮಾತನಾಡಿ, ಪ್ರತಿವರ್ಷ ಅದ್ಧೂರಿ ಮೆತವಣಿಗೆ ಮತ್ತು ಜಯಘೋಷಗಳೊಂದಿಗೆ ಆಚರಿಸಲಾಗುತ್ತಿದ್ದ ವಾಲ್ಮೀಕಿ ಜಯಂತಿಯನ್ನು, ವಾಯುಭಾರ ಕುಸಿತದ ಕಾರಣದಿಂದಾಗಿ ಈ ಬಾರಿ ಕೇವಲ ಸಾಂಕೇತಿಕವಾಗಿ ಆಚರಿಸುತ್ತಿರುವುದಕ್ಕೆ ಖೇದ ವ್ಯಕ್ತಪಡಿಸಿದರು.

ಸಾಂತ್ವನ ಕೇಂದ್ರದ ಕುಮಾರ್ ಮಾತನಾಡಿ, ಮಹರ್ಷಿ ವಾಲ್ಮೀಕಿ ಮಹಾಶಯರು ನಮ್ಮ ಆದಿಮ ಗುರುಗಳು. ಅಕ್ಷರವನ್ನು ಗುತ್ತಿಗೆ ಪಡೆದುಕೊಂಡವರಂತೆ ವರ್ತಿಸುತ್ತಿದ್ದವರ ಎದುರು ಮಹಾಕಾವ್ಯವನ್ನೇ ರಚಿಸಿ, ತಳ ಸಮುದಾಯಗಳ ಪ್ರತಿಭಾಕೌಶಲ್ಯವನ್ನು ಎತ್ತಿಹಿಡಿದ ಮೇರುಪ್ರತಿಭೆ. ಅವರ ಜಯಂತಿಯನ್ನು ನಾವು ಆಚರಿಸುತ್ತಿರುವುದು ನಮ್ಮೆಲ್ಲರ ಸುದೈವ ಎಂದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಶಾಸಕ ಸಿ ಬಿಸುರೇಶ್ ಬಾಬು ಮಾತನಾಡಿ, ಮಹರ್ಷಿ ವಾಲ್ಮೀಕಿಯವರ ಕಾವ್ಯ ಪ್ರತಿಭೆಯನ್ನು ಸ್ಮರಿಸುತ್ತಾ, ಅವರ ಬಗ್ಗೆ ಸಮಾಜದಲ್ಲಿ ಗೌರವಾದರಗಳು ಮೂಡುವಂತೆ ಮಾಡಬೇಕು ಎಂದು ಹೇಳಿದರು. ವಾಲ್ಮೀಕಿ ದರೋಡೆಕೋರ ಎಂಬ ಅಪವ್ಯಾಖ್ಯಾನವನ್ನು ಸಂಬಂಧಿಸಿದ ಎಲ್ಲಾ ಗ್ರಂಥಗಳಿಂದಲೂ ಅದನ್ನು ತೆಗೆದುಹಾಕಬೇಕು ಎಂದು ಸರ್ಕಾರವನ್ನು ಒತ್ತಾಯಿಸುವುದಾಗಿ ಅವರು ತಿಳಿಸಿದರು.

ಕಾರ್ಯಕ್ರಮದಲ್ಲಿ,
ಗ್ರೇಡ್-2 ತಹಸೀಲ್ದಾರ್ ಕೀರ್ತಿ, ಸಮಾಜ ಕಲ್ಯಾಣ ಅಧಿಕಾರಿ ಶ್ರೀಧರಮೂರ್ತಿ, ಶಿಶು ಅಭಿವೃದ್ಧಿ ಯೋಜನಾಧಿಕಾರಿ ಜಿ ಹೊನ್ನಪ್ಪ, ಸಹಾಯಕ ಕೃಷಿ ನಿರ್ದೇಶಕ ಶಿವರಾಜ್ ಕುಮಾರ್, ಲೋಕೋಪಯೋಗಿ ಕಾರ್ಯನಿರ್ವಾಹಕ ಅಭಿಯಂತರರಾದ ತಿಮ್ಮಣ್ಣ, ಪಿಆರ್ ಡಿಒ ಎಇಇ ಮೋಹನ್ ಕುಮಾರ್, ಪಶು ಸಹಾಯಕ ನಿರ್ದೇಶಕ ಡಾ ರೆ ಮಾ ನಾಗಭೂಷಣ್, ಅಬಕಾರಿ ನಿರೀಕ್ಷಕ ಗಂಗರಾಜು, ಬೆಸ್ಕಾಂ ಎಇಇ ಗವಿರಂಗಯ್ಯ, ಅಗ್ನಿಶಾಮಕ ಅಧಿಕಾರಿ ಮಲ್ಲಿಕಾರ್ಜುನಯ್ಯ,
ಗ್ಯಾರಂಟಿ ಯೋಜನೆಗಳ ಅನುಷ್ಠಾನ ಸಮಿತಿ ಅಧ್ಯಕ್ಷ ಸಿ ಡಿ ಚಂದ್ರಶೇಖರ್, ಮಾದಿಗ ದಂಡೋರದ ಬೇವಿನಹಳ್ಳಿ ಚನ್ನಬಸವಯ್ಯ, ರಾಷ್ಟ್ರೀಯ ಸೇವಾದಳದ ಕೃಷ್ಣೇಗೌಡ, ಮುಖಂಡ ಅಗಸರಹಳ್ಳಿ ನರಸಿಂಹಮೂರ್ತಿ ಮುಂತಾದವರು ಉಪಸ್ಥಿತರಿದ್ದರು.

ವರದಿ: ಸಂಚಲನ, ಚಿಕ್ಕನಾಯಕನಹಳ್ಳಿ ಸೀಮೆಯಿಂದ

( ಪ್ರತಿ ಗಾಂಧಿ ಜಯಂತಿಯಂದು ಕರ್ನಾಟಕ ರಾಷ್ಟ್ರ ಸಮಿತಿಯ ಏಕದಿನ ಸತ್ಯಾಗ್ರಹ)

ಚಿಕ್ಕನಾಯಕನಹಳ್ಳಿ : ಪ್ರತಿಬಾರಿ ಗಾಂಧಿ ಜಯಂತಿಯ ದಿನದಂದು ಕರ್ನಾಟಕ ರಾಷ್ಟ್ರ ಸಮಿತಿ ಪಾಲಿಸುತ್ತಾ ಬಂದಿರುವ ಏಕದಿನ ಸತ್ಯಾಗ್ರಹ’ವನ್ನು ಪಟ್ಟಣದ ನೆಹರೂ ಸರ್ಕಲ್’ನಲ್ಲಿ ಇದೇ ಅಕ್ಟೋಬರ್ 02.10.2024’ರ ಬುಧವಾರ ಬೆಳಗ್ಗೆ 09.00 ಗಂಟೆಯಿಂದ ಸಂಜೆ 04.00 ಗಂಟೆಯವರೆಗೆ ಹಮ್ಮಿಕೊಳ್ಳಲಾಗಿದೆ.

ಈ ಏಕದಿನ ಸತ್ಯಾಗ್ರಹದ ಧ್ಯೇಯ, ಹಳ್ಳಿ-ಹಳ್ಳಿಗಳಲ್ಲಿ ನಿರಾಂತಕವಾಗಿ ಮಾರಾಟವಾಗುತ್ತಿರುವ ಅಕ್ರಮ ಮದ್ಯ-ಮಾರಾಟವನ್ನು ತಡೆಗಟ್ಟುವಂತೆ ತಾಲ್ಲೂಕು ಆಡಳಿತ ಮತ್ತು ಅಬಕಾರಿ ಇಲಾಖೆಯನ್ನು ಒತ್ತಾಯಿಸುವುದು. ತಾಲ್ಲೂಕಿಗೆ ಬಿಡುಗಡೆಯಾಗಿರುವ ಮತ್ತು ಮುಂದೆಯೂ ಆಗಲಿರುವ ಗಣಿಭಾಧಿತ ಪ್ರದೇಶಾಭಿವೃದ್ಧಿ ಮತ್ತು ಪರಿಸರ ಪುನಶ್ಚೇತನ ಕಾರ್ಯಕ್ರಮ CEPMIZ ಯೋಜನೆಗೆ ಮೀಸಲಾದ ಕೋಟ್ಯಾಂತರ ರೂಪಾಯಿ ಹಣದ ಪ್ರಾಮಾಣಿಕ ಮತ್ತು ಪಾರದರ್ಶಕ ಸದ್ಬಳಕೆಗಾಗಿ ಒತ್ತಾಯಿಸುವುದು. ಮತ್ತು ಗ್ರಾಮ ಪಂಚಾಯ್ತಿಗಳಲ್ಲಿ ನರೇಗಾ ಯೋಜನೆಯ ಕೆಲಸ-ಕಾಮಗಾರಿಗಳಲ್ಲಿ ಯಂತ್ರಗಳನ್ನು ಬಳಸಿ ಕೆಲಸ ನಿರ್ವಹಿಸದೆ, ಜಾಬ್ ಕಾರ್ಡ್ ಹೊಂದಿರುವ ಕಾರ್ಮಿಕರನ್ನು ಮಾತ್ರ ಬಳಸಿಕೊಂಡು ಕೆಲಸ ನಿರ್ವಹಿಸುವುದು. ತನ್ಮೂಲಕ ದೇಶದ ಎಲ್ಲ ಎಲ್ಲರಿಂದ ಸಂವಿಧಾನದ ಆಶಯಗಳನ್ನು ಅನೂಚಾನ ಎತ್ತಿ ಹಿಡಿಯುವ ಬದ್ಧತೆಯನ್ನು ಒತ್ತಾಯಿಸುವುದು.

ಈಯೆಲ್ಲ ಗಾಂಧಿ-ಮಾದರಿಯ ಸ್ವರಾಜ್ಯ ಪರಿಕಲ್ಪನೆಯ ಧ್ಯೇಯೋದ್ದೇಶಗಳ ಈಡೇರಿಕೆಯನ್ನು ಒತ್ತಾಯಿಸುವ ಸಲುವಾಗಿ, ಕರ್ನಾಟಕ ರಾಷ್ಟ್ರ ಸಮಿತಿ, ಲಂಚಮುಕ್ತ ಕರ್ನಾಟಕ, ರಾಷ್ಟ್ರೀಯ ಕಿಸಾನ್ ಸಂಘ ಮತ್ತಿತರೆ ರೈತಪರ ಸಂಘಟನೆಗಳು, ದಲಿತಪರ ಸಂಘಟನೆಗಳು ಹಾಗೂ ಪ್ರಗತಿಪರ ಸಂಘ-ಸಂಸ್ಥೆಗಳು ಮತ್ತು ಪ್ರಜಾಪ್ರಭುತ್ವದ ಆಶಯದ ಈಡೇರಿಕೆಯಲ್ಲಿ ಬದ್ಧತೆಯಿರುವ ಎಲ್ಲ ನಾಗರಿಕರು ಒಟ್ಟಾಗಿ ಸೇರಿ, ಶಾಂತಿಯುತವಾದ ಸಾಂಕೇತಿಕ ಪ್ರತಿಭಟನೆಯನ್ನು ದಾಖಲಿಸುವ ಉದ್ದೇಶದಿಂದ ಈ ಏಕದಿನ ಸತ್ಯಾಗ್ರಹ ಹಮ್ಮಿಕೊಂಡಿದ್ದೇವೆ ಎಂದು ಕರ್ನಾಟಕ ರಾಷ್ಟ್ರ ಸಮಿತಿಯ ಸಬ್ಬೇನಹಳ್ಳಿ ಶ್ರೀನಿವಾಸ್ ತಿಳಿಸಿದರು.

ಸಂಜೆ 4.00 ಗಂಟೆಯ ಹೊತ್ತಿಗೆ ಮಾನ್ಯ ತಹಸೀಲ್ದಾರ್’ರವರಿಗೆ ಸತ್ಯಾಗ್ರಹಿಗಳ ಒತ್ತಾಯಪತ್ರವನ್ನು ಸಲ್ಲಿಸಿದ ನಂತರ ಈ ಏಕದಿನ ಸತ್ಯಾಗ್ರಹ’ವನ್ನು ಕೊನೆಗೊಳಿಸಲಾಗುವುದು.

ಸತ್ಯಾಗ್ರಹದೊಂದಿಗೆ ಸೇರ ಬಯಸುವ ಎಲ್ಲರಿಗೂ ಸ್ವಾಗತವಿದೆ. ಆಸಕ್ತರು 73380 99271 ಸಂಖ್ಯೆಗೆ ಕರೆಮಾಡಿ ಸಬ್ಬೇನಹಳ್ಳಿ ಶ್ರೀನಿವಾಸರವರನ್ನು ಸಂಪರ್ಕಿಸಬಹುದು.

_ಸಂಚಲನ
ಚಿಕ್ಕನಾಯಕನ ಸೀಮೆಯಿಂದ

ಚಿಕ್ಕನಾಯಕನಹಳ್ಳಿ : ಕರ್ನಾಟಕ ರಾಜ್ಯ ಗ್ರಾಮ ಆಡಳಿತ ಅಧಿಕಾರಿಗಳ ಕೇಂದ್ರ ಸಂಘದ ಕಾರ್ಯಕಾರಿಣಿ ಸಭೆಯ ನಿರ್ಣಯದಂತೆ ವಿವಿಧ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ತಾಲ್ಲೂಕು ಗ್ರಾಮ ಆಡಳಿತ ಅಧಿಕಾರಿಗಳ ಸಂಘ ಹಾಗೂ ಚಿಕ್ಕನಾಯಕನಹಳ್ಳಿ ತಾಲ್ಲೂಕಿನ ಸಮಸ್ತ ಗ್ರಾಮ ಆಡಳಿತಾಧಿಕಾರಿಗಳು ಲೇಖನಿ ಸ್ಥಗಿತಗೊಳಿಸಿ ಅನಿರ್ದಿಷ್ಟಾವಧಿ ಮುಷ್ಕರಕ್ಕೆ ಮುಂದಾಗುತ್ತಿರುವ ಕುರಿತು ಕಂದಾಯ ಇಲಾಖೆಯ ಪ್ರಧಾನ ಕಾರ್ಯದರ್ಶಿಯವರಿಗೆ ತಹಸೀಲ್ದಾರ್ ಕೆ ಪುರಂದರ್ ಮುಖೇನ ಸೋಮವಾರ ಮನವಿ ಸಲ್ಲಿಸಲಾಯಿತು.

ಮೂಲಭೂತ ಸೌಕರ್ಯ ಮತ್ತು ಅಗತ್ಯ ಸಾಧನ-ಸಲಕರಣೆ ಸೇರಿದಂತೆ ಕರ್ತವ್ಯ ನಿರ್ವಹಿಸಲು ವೃತ್ತಕ್ಕೆ ಒಂದರಂತೆ ಒಂದು ಕಚೇರಿ ಅಥವಾ ಕೊಠಡಿ, ಉತ್ತಮ ಗುಣಮಟ್ಟದ ಟೇಬಲ್ ಮತ್ತು ಕುರ್ಚಿ, ಜೊತೆಗೊಂದು ಆಲ್ಮೆರಾ, ಅತ್ತ್ಯುತ್ತಮ ಗುಣಮಟ್ಟದ ಮೊಬೈಲ್ ಫೋನ್, ಸಿಯುಜಿ ಸಿಮ್ ಹಾಗೂ ಡೇಟಾ ಸೌಲಭ್ಯ, ಗೂಗಲ್ ಖ್ರೋಮ್’ಬುಕ್, ಲ್ಯಾಪ್‌ಟಾಪ್, ಸ್ಕ್ಯಾನರ್, ಪ್ರಿಂಟರ್, ಅಗತ್ಯ ಸ್ಟೇಷನರಿ ವೆಚ್ಚ, ಹೆಚ್ಚುವರಿ ಪ್ರಯಾಣ ಭತ್ಯೆ, ಅಂತರ್ ಜಿಲ್ಕಾ ವರ್ಗಾವಣೆಗೆ ಅವಕಾಶ ಸೇರಿದಂತೆ ಒತ್ತಡ ರಹಿತವಾಗಿ ಕರ್ತವ್ಯ ನಿರ್ವಹಿಸಲು ಅನುವು ಮಾಡಿಕೊಡಬೇಕಾಗಿತ್ತು. ಆದರೆ, ಈ ಯಾವ ಸೌಕರ್ಯವನ್ನೂ ಒದಗಿಸದೆ ಸಕಾಲದಲ್ಲಿ ಕೆಲಸ ಸಾಗಿಸಿ ಎಂದು ಒತ್ತಡ ಹೇರಲಾಗುತ್ತಿದೆ. ಗ್ರಾಮ ಆಡಳಿತ ಅಧಿಕಾರಿಗಳಿಗೆ ಒದಗಿರುವ ಈಯೆಲ್ಲ ಕಷ್ಟ-ನಷ್ಟಗಳನ್ನು ಪರಿಹರಿಸಿ, ರಾಜ್ಯದ ಕೇಂದ್ರ ಸಂಘದ ಬೇಡಿಕೆಗಳನ್ನು ತ್ವರಿತವಾಗಿ ಈಡೇರಿಸುವಂತೆ ಮನವಿ ಪತ್ರದಲ್ಲಿ ಒತ್ತಾಯಿಸಲಾಗಿದೆ.

ಇಲಾಖೆಯಿಂದ ಅಭಿವೃದ್ಧಿಪಡಿಸಲಾಗಿರುವ 17ಕ್ಕೂ ಹೆಚ್ಚಿನ ಮೊಬೈಲ್ ಆ್ಯಪ್ ತಂತ್ರಾಂಶಗಳ ಮೂಲಕ ಕರ್ತವ್ಯ ನಿರ್ವಹಿಸಲು ಒತ್ತಡ ಹೇರುತ್ತಿದ್ದು, ಈ ತಂತ್ರಾಂಶಗಳ ಸಮರ್ಪಕ ಬಳಕೆ ಮತ್ತು ನಿರ್ವಹಣೆಗೆ ಅವಶ್ಯವಿರುವ ಮೊಬೈಲ್‌ ಸಾಧನ, ಲ್ಯಾಪ್‌ಟಾಪ್ ಹಾಗೂ ಅದನ್ನು ಜೋಡಿಸಲು ಬೇಕಾದ ಇಂಟರ್’ನೆಟ್ ಮತ್ತು ಸ್ಕ್ಯಾನರ್, ಪ್ರಿಂಟರ್ ಯಾವುದನ್ನೂ ಗ್ರಾಮ ಆಡಳಿತ ಅಧಿಕಾರಿಗಳಿಗೆ ಒದಗಿಸದೆ, ತಮ್ಮ ಬಳಿಯಿರುವ ಮೊಬೈಲ್ ಮೂಲಕವೇ ಕರ್ತವ್ಯ ನಿರ್ವಹಿಸಲು ಒತ್ತಡ ಹೆಚ್ಚುತ್ತಿದೆ. ಇದರಿಂದಾಗಿ ಕ್ಷೇತ್ರಮಟ್ಟದಲ್ಲಿ ಒಡ್ಡುತ್ತಿರುವ ಅಧಿಕ ಒತ್ತಡ ಕಾರಣದಿಂದಾಗಿ ಗ್ರಾಮ ಆಡಳಿತ ಅಧಿಕಾರಿಗಳ ಮೇಲೆ ತೀವ್ರ ಪರಿಣಾಮ ಬೀರಿ ಅದು ಸಾವು-ನೋವುಗಳಲಿ ಸಮಾಪ್ತಿಯಾಗುತ್ತಿದೆ. ವ್ಯವಸ್ಥಿತ ಸಾಧನ-ಸಲಕರಣೆಗಳಿಲ್ಲದ ಕಾರಣ ಸಕಾಲಕ್ಕೆ ಕೆಲಸ ಮಾಡಿಕೊಡಲು ಸಾಧ್ಯವಾಗುತ್ತಿಲ್ಲ.

ಇದರಿಂದ ಆಕ್ರೋಶಿತರಾಗುವ ಜನ ಕರ್ತವ್ಯದಲ್ಲಿರುವ ಗ್ರಾಮ ಆಡಳಿತ ಅಧಿಕಾರಿಗಳನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸುವುದಲ್ಲದೆ ಕೆಲವೊಮ್ಮೆ ಮಾರಣಾಂತಿಕ ಹಲ್ಲೆಗಳಿಗೂ ಮುಂದಾಗುವ ಪ್ರಕರಣಗಳು ನಡೆಯುತ್ತಿವೆ.

ಎಲ್ಲಾ ಮೊಬೈಲ್ ಆ್ಯಪ್’ಗಳಲ್ಲಿ ಏಕಕಾಲದಲ್ಲಿ ಪ್ರಗತಿ ಸಾಧಿಸಲು ತೀವ್ರ ಒತ್ತಡ ಹೇರುತ್ತಿರುವುದರಿಂದ ಅಧಿಕಾರಿಗಳ ಮಾನಸಿಕ ಆರೋಗ್ಯ ಮತ್ತು ದೈಹಿಕ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮಗಳು ಉಂಟಾಗಿ ಅವರನ್ನು ರೋಗಗ್ರಸ್ತರನ್ನಾಗಿ ಮಾಡುತ್ತಿವೆ.

ಹೀಗಾಗಿ, ಎಲ್ಲ ಬೇಡಿಕೆಗಳು ಈಡೇರುವವರೆಗೂ ದಿನಾಂಕ.26.09.2024ರಿಂದ ಆಧಾರ್ ಸೀಡ್, ಲ್ಯಾಂಡ್ ಬೀಟ್, ಬಗರ್ ಹುಕುಂ, ಹಕ್ಕುಪತ್ರ, ನಮೂನೆ 1-5 ರ ವೆಬ್ ಅಪ್ಲಿಕೇಶನ್, ಪೌತಿ ಆಂದೋಲನ ಆ್ಯಪ್ ಸೇರಿದಂತೆ ಮೊಬೈಲ್ ತಂತ್ರಾಂಶಗಳ ಯಾವುದೇ ಕೆಲಸವನ್ನು ನಿರ್ವಹಿಸದಂತೆ ಗ್ರಾಮ ಆಡಳಿತ ಅಧಿಕಾರಿಗಳ ಕಾರ್ಯಕಾರಿಣಿಯಲ್ಲಿ ತೀರ್ಮಾನಿಸಲಾಗಿದೆ.

ಸೇವೆ ಮತ್ತು ಪದೋನ್ನತಿ ::

ರಾಜ್ಯದ ಗ್ರಾಮ ಆಡಳಿತ ಅಧಿಕಾರಿಗಳು ಕಳೆದ 30 ವರ್ಷಗಳಿಂದಲೂ ಪದೋನ್ನತಿಯಿಂದ ವಂಚಿತರಾಗಿದ್ದಾರೆ. ನಿವೃತ್ತಿಯ ಅಂಚಿನಲ್ಲಿ ಪದೋನ್ನತಿ ಸಿಗುತ್ತದಾದ್ದರಿಂದ ಅದರಿಂದ ಅಧಿಕಾರಿಗಳಿಗೆ ಯಾವುದೇ ಸೇವಾ ಪ್ರಯೋಜನ ಸಿಗುತ್ತಿಲ್ಲ. ಹಾಗಾಗಿ, ರಾಜ್ಯದ 1196 ಗ್ರೇಡ್–1 ಗ್ರಾಮ ಪಂಚಾಯತ್ ಹಾಗೂ 304 ಕಸಬಾ ಹೋಬಳಿ ವೃತ್ತಗಳನ್ನು ಗ್ರೇಡ್–1 ಗ್ರಾಮ ಆಡಳಿತ ಅಧಿಕಾರಿ ಹುದ್ದೆಯನ್ನಾಗಿ ಮೇಲ್ದರ್ಜೆಗೇರಿಸಿ ಪದೋನ್ನತಿಯನ್ನು ನೀಡಬೇಕು. ಅದೇರೀತಿ ರಾಜಸ್ವ ನಿರೀಕ್ಷಕರು, ಪ್ರಥಮ ದರ್ಜೆ ಸಹಾಯಕರು ಹಾಗೂ ಗ್ರೇಡ್–1 ಗ್ರಾಮ ಆಡಳಿತ ಅಧಿಕಾರಿ ಹುದ್ದೆಯನ್ನಾಗಿ ಪರಿಷ್ಕರಿಸುವುದರ ಮೂಲಕವೂ ಪದೋನ್ನತಿ ನೀಡಬಹುದು.

ವರ್ಗಾವಣೆ ಅವಕಾಶ ::

ಅಂತರ್ ಜಿಲ್ಲಾ ಪತಿ-ಪತ್ನಿ ವರ್ಗಾವಣೆ ಪ್ರಕ್ರಿಯೆಗೆ ಚಾಲನೆ ನೀಡಿ, ಅಂತಿಮ ಆದೇಶಕ್ಕಾಗಿ ಬಾಕಿ ಉಳಿದಿರುವ ವರ್ಗಾವಣೆಗಳ ತ್ವರಿತ ಆದೇಶ ನೀಡಬೇಕು. ಕೆ.ಸಿ.ಎಸ್.ಆರ್.ನಿಯಮಾವಳಿಗಳಂತೆ ರಜಾ ದಿನಗಳಲ್ಲಿ ಕರ್ತವ್ಯಕ್ಕೆ ಹಾಜರಾಗುವಂತೆ ಅಧಿಕಾರಿಗಳಿಗೆ ಮೆಮೊ ಹಾಕಬಾರದು. ಹಾಗೆ ಮೆಮೊ ಹಾಕುವ ಮೇಲಧಿಕಾರಿಗಳ ಮೇಲೆ ಸೂಕ್ತವಾದ ಶಿಸ್ತುಕ್ರಮ ಜರುಗಿಸಲು ಆದೇಶ ಹೊರಡಿಸಬೇಕು. ಕಂದಾಯ ಇಲಾಖೆಯಲ್ಲಿನ 3 ವರ್ಷಗಳ ಸೇವೆಯನ್ನು ಪರಿಗಣಿಸಿ ಅಂತರ್ ಜಿಲ್ಲಾ ವರ್ಗಾವಣೆಗೆ ಸೂಕ್ತ ಮಾರ್ಗಸೂಚಿಗಳನ್ನು ರಚಿಸಿ ನೌಕರರಿಗೆ ವರ್ಗಾವಣೆ ಅವಕಾಶ ಕಲ್ಪಿಸಬೇಕು.

ಈಯೆಲ್ಲ ಬೇಡಿಕೆಗಳು ಈಡೇರುವವರೆಗೂ ರಾಜ್ಯದ ಕೇಂದ್ರ ಸಂಘ ನಿರ್ಣಯಿಸಿರುವಂತೆ, ದಿನಾಂಕ.26.09.2024 ರಿಂದ ಎಲ್ಲ ಗ್ರಾಮ ಆಡಳಿತ ಅಧಿಕಾರಿಗಳು, ಎಲ್ಲ ಬಗೆಯ ಮೊಬೈಲ್ ಆ್ಯಪ್ ಹಾಗೂ ವೆಬ್ ಅಪ್ಲಿಕೇಶನ್ ಕೆಲಸಗಳನ್ನು ಸ್ಥಗಿತಗೊಳಿಸಿ ತಮ್ಮ ಲೇಖನಿ ಸ್ಥಗಿತಗೊಳಿಸುವ ಮೂಲಕ ಅನಿರ್ದಿಷ್ಟಾವಧಿ ಮುಷ್ಕರಕ್ಕೆ ಮುಂದಾಗಲಿದ್ದಾರೆ ಎಂದು ತಾಲ್ಲೂಕು ಗ್ರಾಮ ಆಡಳಿತ ಅಧಿಕಾರಿಗಳ ಸಂಘದ ಉಪಾಧ್ಯಕ್ಷ ಮರುಳಸಿದ್ಧನಗೌಡ ಮಾಹಿತಿ ನೀಡಿದರು. ಈ ಸಂದರ್ಭದಲ್ಲಿ ಅಧ್ಯಕ್ಷ ನವೀನ್, ಗೌರವಾಧ್ಯಕ್ಷ ಪ್ರಸನ್ನಕುಮಾರ್, ಕಾರ್ಯದರ್ಶಿ ಲತಾಮಣಿ, ಖಜಾಂಚಿ ಲಕ್ಷ್ಮಿಪತಿ ಹಾಗೂ ತಾಲ್ಲೂಕಿನ 47 ವೃತ್ತಗಳಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ 27 ಮಂದಿ ಗ್ರಾಮ ಆಡಳಿತ ಅಧಿಕಾರಿಗಳು ಹಾಜರಿದ್ದರು.

_ಸಂಚಲನ
ಚಿಕ್ಕನಾಯಕನ ಸೀಮೆಯಿಂದ