Publicstory.in

Tumkuru:

ತುಮಕೂರು ತಾಲ್ಲೂಕಿನ ಹೆಬ್ಬೂರು ಸುತ್ತಮುತ್ತಲ ಇಬ್ಬರು ಮಕ್ಕಳನ್ನು ಕೊಂದಿರುವ ನರ ಭಕ್ಷಕ ಚಿರತೆ ಹಿಡಿಯಲು ಅರಣ್ಯ ಇಲಾಖೆ ಇಟ್ಟಿರುವ ಕ್ಯಾಮರಾ ಗೆ ಬಗೆಬಗೆಯ ಪ್ರಾಣಿಗಳು ಗೋಚರಿಸಿವೆ.

ಒಟ್ಟು ಮೂರು ಚಿರತೆಗಳು ಕಂಡು ಬಂದಿದ್ದು ಇದರಲ್ಲಿ ನರಭಕ್ಷಕ ಚಿರತೆ ಯಾವುದು ಎಂಬುದೀಗ ಅರಣ್ಯ ಇಲಾಖೆಗೆ ತಲೆನೋವಾಗಿದೆ.

ನರಭಕ್ಷಕ ಚಿರತೆ ಗುಂಡಿಕ್ಕಿ ಕೊಲ್ಲಲು ಆದೇಶ ಮಾಡುವುದಾಗಿ ಅರಣ್ಯ ಸಚಿವರು ಈಗಾಗಲೇ ಹೇಳಿದ್ದಾರೆ.

ತಾಲೂಕು ಹೆಬ್ಬೂರು ಹೋಬಳಿ ವ್ಯಾಪ್ತಿಯ ಅರಣ್ಯದಲ್ಲಿ ಎರಡು ಮೂರು ಚಿರತೆಗಳು ಓಡಾಡಿರುವುದು ಕ್ಯಾಮೆರಾದಲ್ಲಿ ಸೆರೆಯಾಗಿದೆ.

ಹೆಬ್ಬೂರು ಹೋಬಳಿಯ ವ್ಯಾಪ್ತಿಯಲ್ಲಿ ಚಿರತೆಗಳ ರಾತ್ರಿಯ ವೇಳೆ ನಿರಂತರವಾಗಿ ಆಹಾರವನ್ನು ಹುಡುಕುತ್ತ ಓಡಾಡುತ್ತಿವೆ ಎಂಬುದನ್ನು ಈ ದೃಶ್ಯಗಳಿಂದ ಅರಣ್ಯ ಇಲಾಖೆ ಅಧಿಕಾರಿಗಳು ಕಂಡುಕೊಂಡಿದ್ದಾರೆ.

ಚಿರತೆಗಳ ಬಗೆಬಗೆಯ ದೃಶ್ಯಗಳು ಕ್ಯಾಮೆರಾದಲ್ಲಿ ಸೆರೆಯಾಗಿವೆ. ಕೆಲವೊಮ್ಮೆ ಇನ್ನೊಂದು ಪ್ರಾಣಿಯನ್ನು ಬೇಟೆಯಾಡುವಾಗ ದಾಳಿ ಮಾಡುತ್ತಿರುವಂತೆ ಕಂಡುಬಂದಿದ್ದರೆ, ಹಲವು ದೃಶ್ಯಗಳಲ್ಲಿ ಚಿರತೆಗಳು ಕ್ಯಾಮೆರಾಗಳತ್ತ ನೋಡಿರುವುದು ಕಂಡುಬಂದಿದೆ.

ಚಿರತೆಗಳ ಚಲನವಲನಗಳ ಮೇಲೆ ನಿಗಾ ಇಡಲು ಅಳವಡಿಸಿದ್ದ ಸಿಸಿ ಕ್ಯಾಮೆರಾಗಳಲ್ಲಿ ಹಲವು ವೈವಿಧ್ಯಮಯ ಪ್ರಾಣಿಗಳ ದೃಶ್ಯಗಳೂ ಕೂಡ ಸೆರೆಯಾಗಿರುವುದು ಕುತೂಹಲವನ್ನು ಮೂಡಿಸಿದೆ.

ಕೇವಲ ನರಭಕ್ಷಕ ಚಿರತೆಗಳ ಹುಡುಕಾಟದ ವೇಳೆ ಮುಳ್ಳು ಹಂದಿ, ನವಿಲು, ಕಾಡುಬೆಕ್ಕುಗಳು ಮತ್ತು ಮೊಲಗಳು ಓಡಾಟ ನಡೆಸಿರುವುದು ಕಂಡುಬಂದಿದೆ. ಕ್ಯಾಮೆರಾ ಜೊತೆ ಲೈಟ್ ಗಳನ್ನು ಅಳವಡಿಸಿರುವುದರಿಂದ ನಿಶಾಚರಗಳು ಆ ಬೆಳಕಿನತ್ತ ವಿಶೇಷವಾಗಿ ನೋಡಿರುವುದು ದೃಶ್ಯಗಳಿಂದ ತಿಳಿದುಬರುತ್ತದೆ.

ಕ್ಯಾಮೆರಾದಲ್ಲಿ ಚಿರತೆಗಳ ದೃಶ್ಯಗಳು ಸೆರೆಯಾಗಿದ್ದರೂ ಯಾವುದು ನರಭಕ್ಷಕ ಎಂಬುದನ್ನು ಅರಣ್ಯ ಇಲಾಖೆ ಸಿಬ್ಬಂದಿ ಗುರುತಿಸುವಲ್ಲಿ ವಿಫಲವಾಗಿದೆ. ಆದರೆ ಚಿರತೆಗಳ ಇರುವನ್ನು ದೃಢಪಡಿಸಿರುವುದು ಶ್ಲಾಘನೀಯವಾಗಿದೆ.

ಚಿರತೆ ದಾಳಿ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಪತ್ರಿಕಾಗೋಷ್ಠಿ ನಡೆಸಿರುವ ಅರಣ್ಯ ಇಲಾಖೆ ಅಧಿಕಾರಿಗಳು ಚಿರತೆಗಳನ್ನು ಕೊಲ್ಲಲು ಸಾಧ್ಯವಿಲ್ಲ. ಜನರೇ ಸಂಜೆಯ ವೇಳೆ ಮನೆ ಒಳಗೆ ಸೇರಿಕೊಳ್ಳುವುದು ಉತ್ತಮ ಎಂದು ಸ್ಪಷ್ಟಪಡಿಸಿದ್ದಾರೆ.

ಚಿರತೆಗಳ ದಾಳಿ ನಡೆಸುವುದು ಸಾಮಾನ್ಯ. ಹೀಗಾಗಿ ಜನರೇ ಮುನ್ನೆಚ್ಚರಿಕೆ ಕ್ರಮಗಳನ್ನು ವಹಿಸಬೇಕು ಎಂದು ಸಲಹೆಯನ್ನು ನೀಡಿದ್ದಾರೆ.

ಮಧುಗಿರಿ :ಕಾಡಿನಿಂದ ಊರಿಗೆ ಬಂದು ಮನುಷ್ಯ ಮತ್ತು ಪ್ರಾಣಿಗಳ ಮೇಲೆ ದಾಳಿ ನಡೆಸುವ ಚಿರತೆಯ ಕುರಿತು ಜಾಗೃತೆ ವಹಿಸುವಂತೆ ತಹಶೀಲ್ದಾರ್ ಡಾ॥ಜಿ ವಿಶ್ವನಾಥ್ ತಿಳಿಸಿದರು.
ಪಟ್ಟಣದ ತಹಶೀಲ್ದಾರ್ ಕಚೇರಿಯಲ್ಲಿ ಬುಧವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಅವರು ಮಾತನಾಡಿದರು. ಪ್ರಮುಖವಾಗಿ ಚಿರತೆಗಳು ಒಂಟಿ ಮನೆ ಇರುವ ಕಡೆ ಸಂಚು ನಡೆಸಿ ದಾಳಿಗೆ ಮುಂದಾಗುವ ಸ್ವಭಾವ ಹೊಂದಿದ್ದು , ಮನೆಯವರು ತಮ್ಮ ಚಿಕ್ಕ ಮಕ್ಕಳನ್ನು ಒಂಟಿಯಾಗಿ ಬಿಡದೆ ಹಾಗೂ ಸಂಜೆಯ ನಂತರ ಹೊರಗಡೆ ಬಾರದಂತೆ ನೋಡಿಕೊಳ್ಳುವುದು ಅವಶ್ಯಕ ಎಂದರು .

ಹೊಲ ಗದ್ದೆಗಳಲ್ಲಿ ಒಂಟಿಯಾಗಿ ಕಾರ್ಯನಿರ್ವಹಿಸದೇ ಗುಂಪುಗಳಲ್ಲಿ ಕಾರ್ಯನಿರ್ವಹಿಸುವುದು, ತಮ್ಮ ಮನೆಯ ಸುತ್ತಮುತ್ತ ಪೊದೆ ಇರದಂತೆ ನೋಡಿಕೊಳ್ಳುವುದು ಮತ್ತು ತ್ಯಾಜ್ಯ ವಸ್ತುಗಳು ಇಲ್ಲದಂತೆ ನೋಡಿಕೊಳ್ಳಬೇಕು ಎಂದರು .
ನಾಯಿ ಮಾಂಸ ಚಿರತೆಗೆ ಅತ್ಯಂತ ನೆಚ್ಚಿನ ಆಹಾರವಾಗಿದ್ದು , ನಾಯಿಗಳು ಇರುವ ಕಡೆ ಹೆಚ್ಚು ನಿಗಾ ವಹಿಸಬೇಕು. ಮನುಷ್ಯರ ಮೇಲೆ ಅದು ಎರಗುವ ಸಾಧ್ಯತೆಗಳು ಇವೆ ಎಂದು ತಿಳಿಸಿದರು .

ಸಾಮಾನ್ಯವಾಗಿ ಚಿರತೆಗಳು ನಾಯಿಗಳು, ಮೇಕೆಗಳು ಕುರಿಗಳು, ಇರುವ ದೊಡ್ಡಿ ಅಥವಾ ಸ್ಥಳಗಳಲ್ಲಿ ದಾಳಿ ನಡೆಸಲು ಮುಂದಾಗುತ್ತವೆ ಆದ್ದರಿಂದ ಅಂತಹ ಸ್ಥಳಗಳಲ್ಲಿ ವಿದ್ಯುತ್ ದೀಪ ಅಳವಡಿಸುವುದರಿಂದ ಚಿರತೆಗಳು ಬೆಂಕಿ ಎಂದು ಭಾವಿಸಿ ಹೆದರಿ ಓಡಿ ಹೋಗುತ್ತವೆ ಎಂದರು .
ಪೌಲ್ಟ್ರಿ ಫಾರಂ, ಮಾಂಸದಂಗಡಿಗಳು ಮುಂತಾದವೆಡೆ ಉತ್ಪತ್ತಿಯಾಗುವ ತ್ಯಾಜ್ಯವನ್ನು ಎಲ್ಲೆಂದರಲ್ಲಿ ಬಿಸಾಡದೆ ಊರಿನ ಹೊರ ವಲಯಗಳಲ್ಲಿ ಗುಂಡಿ ತೋಡಿ ಮಣ್ಣಿನಿಂದ ಮುಚ್ಚಿ ವಾಸನೆ ಬರದಂತೆ ಕ್ರಮ ವಹಿಸಿ ಎಂದು ಪುರಸಭೆಯವರಿಗೆ ತಹಶೀಲ್ದಾರ್ ಅವರು ಸೂಚಿಸಿದರು .

ಕಸಬಾ ಹೋಬಳಿಯ ಅಗಸರ ಹೊಳೆ ,ಕಮ್ಮನಕೋಟೆ ,ಆವೇ ಕಟ್ಟೆ , ದೊಡ್ಡೇರಿ ಹೋಬಳಿಯ ತಿಮ್ಮಲಾಪುರ ಮತ್ತು ,ಮಿಡಿಗೇಶಿ ಹೋಬಳಿಯ ಚಿನ್ನೇನಹಳ್ಳಿ ಗ್ರಾಮದ ಸುತ್ತಮುತ್ತ ಚಿರತೆಗಳು ಹೆಚ್ಚು ಕಾಣಿಸಿಕೊಳ್ಳುತ್ತಿದ್ದು , ಈ ಸ್ಥಳಗಳಲ್ಲಿ ಹೆಚ್ಚಿನ ನಿಗಾ ಇಡಲಾಗಿದೆ ಎಂದರು .

ಅರಣ್ಯ ಇಲಾಖೆಯ (ರೇಂಜರ್
ಫಾರೆಸ್ಟ್ ) ಜಿ ವಾಸುದೇವಮೂರ್ತಿ ಮಾತನಾಡಿ ಮೊಲ ಕಾಡು ಹಂದಿ ಮತ್ತು ನಾಯಿ ಚಿರತೆಯು ಅತಿ ಹೆಚ್ಚು ಇಷ್ಟಪಡುವ ಆಹಾರವಾಗಿದ್ದು ,ಇವ್ಯಾವೂ ಸಿಗದೇ ಇದ್ದಾಗ ಮನುಷ್ಯನ ಮೇಲೆ ಅದರಲ್ಲೂ ಚಿಕ್ಕಮಕ್ಕಳ ಮೇಲೆ ಎರಗುತ್ತವೆ ಎಂದರು .

ನೀಲಗಿರಿ ಮರಗಳ ಮರೆಯಲ್ಲಿ ಕುಳಿತು ಹೊಂಚು ಹಾಕಿ ಬೇಟೆಯಾಡುವುದು ಚಿರತೆಗೆ ಮಾಮೂಲಾಗಿದೆ, ಹಾಗಾಗಿ ಎಲ್ಲೆಡೆ ನೀಲಗಿರಿ ಮರಗಳನ್ನು ತೆರವು ಮಾಡುವ ಬಗ್ಗೆ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದರು .

ಪಿಎಸ್ಐ ಕಾಂತರಾಜು ಮಾತನಾಡಿ ಚಿರತೆಯನ್ನು ಕಂಡಾಗ ಹೆದರಿ ಓಡಿ ಹೋಗದೆ, ಅದನ್ನು ಹಿಮ್ಮೆಟ್ಟಿಸಲು ಮುಂದಾದಲ್ಲಿ ಅದು ಹೆದರಿ ಓಡಿ ಹೋಗುತ್ತದೆ ಎಂದರು .

ಡಿಡಿಪಿಐ ಕಚೇರಿಯ ಪ್ರಾಣೇಶ್ ,ಪುರಸಭೆಯ ಕಂದಾಯಾಧಿಕಾರಿ ಉಮೇಶ್ ಗೀತಾ ಉಪಸ್ಥಿತರಿದ್ದರು .