ಅಮ್ಮಂದಿರು ಸಾಯುವುದಿಲ್ಲ. ಪ್ರತಿ ದಿನ
ನೆನಪಾಗುತ್ತಾರೆ ಅವರ ಜೀವನೋತ್ಸಾಹದ
ಬದುಕಿನಿಂದ. ಅವರ ಬದುಕಿನ ಹೋರಾಟದಿಂದ,
ತಿನ್ನಿಸಿದ ಕೈ ತುತ್ತಿನಿಂದ, ಕಲಾತ್ಮಕತೆಯಿಂದ,
ಕಕ್ಕುಲತೆ ಇಂದ. ಯಾಂತ್ರಿಕ ಬದುಕು ಸರಳ ಸಂತೋಷದ ಅಮ್ಮಂದಿರನ್ನು ಕಿತ್ತುಕೊಂಡಿದೆ ಅನಿಸುತ್ತಿದೆ. ಹಾಗಾಗದಿರಲಿ.

ಪ್ರತಿ ಮಗುವಿಗೂ ಅಮ್ಮನ ಭಾಗ್ಯ ದೊರಕಲಿ
ಎಂಬ ಮಾರ್ಮಿಕ ಬೇಡಿಕೆಯನ್ನು ದೇವರಿಗೆ
ಮೊರೆಯಿಟ್ಟಿದ್ದಾರೆ ಮಕ್ಕಳ ತಜ್ಞೆ, ಕವಯಿತ್ರಿ
ಡಾ. ರಜನಿ ಎಂ

ತಾಯಿಗೆ ದಿನವೆಂಬುದಿಲ್ಲ…
ಮಗು ನಗುತ್ತಾ ಇದ್ದ ದಿನವೇ
ತಾಯಂದಿರ ದಿನ.

ಅಮ್ಮಾ

ನೀನು ಸತ್ತು
ಹೋಗಿದ್ದೀಯಾ
ಎಂದು ನನಗೆ ಗೊತ್ತೆ ಇಲ್ಲಾ…

ನಿನ್ನೆ ಮೊನ್ನೆ ನಡೆದ
ಘಟನೆಗಳ ನೆನಪಲ್ಲಿ
ನಿನ್ನನ್ನು ಸೇರಿಸಿಯೇ
ನನ್ನ ಮೆದುಳು ಲೆಕ್ಕಾಚಾರ
ಹಾಕಿದೆ…

ಅರೇ

ಏನಾದರೂ
ತಪ್ಪು ಮಾಡುವಾಗ
ನೀನು ಬೈಯ್ಯುತ್ತಿಯಾ ….

ಎಂದು
ಅನಿಸುತ್ತಿರುತ್ತದೆ.

ಒಬ್ಬಟ್ಟು

ಅಂಚಿಗೆ ಕಣಕ
ಮೆತ್ತದಂತೆ
ನಿನ್ನಂತೆ
ಯಾರೂ
ಒಬ್ಬಟ್ಟು ಮಾಡಿಲ್ಲ.

ರಂಗೋಲಿ

ನಿನ್ನ
ಎರಡೆಳೆ
ನಕ್ಷತ್ರ ರಂಗೋಲಿ
ನಿನಗಿದ್ದ ಕೆಲಸದ
ಒತ್ತಡದ ಸಂಕೇತ.

ಭಯ

ನಿನ್ನ
ಸಿಂಡರಿಸಿದ
ಮುಖ ನೋಡುವ
ಭಯ…

ನನಗೆ ಬೇರೆ
ಯಾವುದಕ್ಕೂ ಇಲ್ಲ.

ಮೆಣಸಿನ ಸಾರು

ಯಾವ ಮಾತ್ರೆಗೂ
ಜ್ವರ ಬಿಡಿಸುವ
ಶಕ್ತಿ
ನಿನ್ನ ಮೆಣಸಿನ
ಸಾರಿನಷ್ಟು ಇಲ್ಲ.

ಶರಶಯ್ಯೆ

ಡಯಾಲಿಸಿಸ್
ಮಾಡುವಾಗ
ನಿನ್ನ ಸ್ಥಿತ ಪ್ರಜ್ಞೆ
ಆ ಶರಶಯ್ಯೆಯ
ಭೀಷ್ಮ.

ಸಡ್ಡು

ಸವಾಲುಗಳಿಗೆ
ಸಡ್ಡು
ಹೊಡೆಯುವುದನ್ನು
ಕಲಿಸಿದ್ದು
ನೀನೆ.

ಕ್ಲಿಯೋಪಾತ್ರ

ನೀನು ಹೊಲಿಸಿದ್ಧ ಕೆಂಪು
‘ಕ್ಲಿಯೋಪಾತ್ರ’ ಬಟ್ಟೆಯಫ್ರಾಕು …
ಇಟ್ಟ ಕಣ್ಣು ಕಪ್ಪು..
ಹೃದಯದ ಡಾಲರ್
ಸರ…

ಹೇಳುತ್ತದೆ…

ಓ ದೇವರೆ
ಅಮ್ಮ ಇಲ್ಲದ
ಮಕ್ಕಳು
ಎಷ್ಟು
ನತದೃಷ್ಟ ರೆಂದು…

ಅಮ್ಮ

ಇಲ್ಲದವರಿಗೆ
ಯಾರಾದರೂ
ಅಮ್ಮ
ಸಿಗಲಿ🙏

ಡಾ. ರಜನಿ
ಅಮ್ಮನ ನೆನಪಲ್ಲಿ ….

ಶೇಷಾದ್ರಿಪುರಂ ಪದವಿ ಪೂರ್ವ ಕಾಲೇಜಿನಲ್ಲಿ ದಿನಾಂಕ 07/05/2022 ರಂದು ರಾಷ್ಟ್ರ ನಿರ್ಮಾಣದಲ್ಲಿ ಯುವಕರ ಪಾತ್ರ ಎನ್ನುವ ಜಾಗೃತಿ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು. ಈ ಕಾರ್ಯಕ್ರಮದಲ್ಲಿ ನಿವೃತ್ತ ಯೋಧರಿಗೆ ಸನ್ಮಾನ ಮಾಡಲಾಯಿತು.
ಸನ್ಮಾನ ಸ್ವೀಕರಿಸಿದ ನಿವೃತ್ತ ಯೋಧ ರಾದ ನಂಜುಂಡಯ್ಯ ಎಚ್ ಬಿ ಯವರು ಮಾತನಾಡಿ ಸಾವಿರಾರು ವರ್ಷಗಳಿಂದ ಅನೇಕ ಹಿರಿಯರು ತ್ಯಾಗ ಪರಿಶ್ರಮದಿಂದ ದೇಶವನ್ನ ನಿರ್ಮಾಣ ಮಾಡಿದ್ದಾರೆ. ಹಿಂದಿನ ಹಿರಿಯರ ಋಣವನ್ನು ತೀರಿಸುವುದೇ ಇಂದಿನ ಯುವಕರ ಪಾತ್ರವಾಗಿದೆ ಎಂದು ಹೇಳಿದರು .

ಅಂದಿನ ಶಿಕ್ಷಣ ವ್ಯವಸ್ಥೆಯಲ್ಲಿ ರಾಜಕುಮಾರ ಕೂಡ ಸಮವಸ್ತ್ರ ಧರಿಸಿ ಸಾಮಾನ್ಯನಂತೆ ವಿದ್ಯೆ ಕಲಿಯಬೇಕಿತ್ತು. ಸಮಾನತೆಗಾಗಿ ಸಮವಸ್ತ್ರ ಮುಖ್ಯಎಂದು ಹೇಳಿದರು.
ಯುದ್ಧ ಬೇಕೇ ? ಬುದ್ದ ಬೇಕೇ? ಎಂದು ಪ್ರಶ್ನಿಸಿದ ಅವರು ನಮಗೆ ಸ್ವಾಭಿಮಾನ ಆತ್ಮ ರಕ್ಷಣೆಗಾಗಿ ಹೋರಾಟ ಬೇಕು ಉಳಿದಂತೆ ಶಾಂತಿ ಕಾಪಾಡಬೇಕು ಎಂದರು.
ಈ ಕಾರ್ಯಕ್ರಮದಲ್ಲಿ ಸನ್ಮಾನ ಸ್ವೀಕರಿಸಿದ ಮತ್ತೊರ್ವ ನಿವೃತ್ತ ಯೋಧ ರಾದ ಪಾಂಡುರಂಗಯ್ಯ ಅವರು ಮಾತನಾಡಿ ಭಾರತ ದೇಶದ ಸೈನಿಕ ಸೇವೆಗಳ ಬಗ್ಗೆ ಮಾಹಿತಿ ನೀಡಿದರು.
ಸನ್ಮಾನ ಸ್ವೀಕರಿಸಿದ ನಿವೃತ್ತ ಯೋಧ ರಾದ ನಾಗರಾಜಯ್ಯ ವಿ ಬಿ ಮತ್ತು ನಟರಾಜು ಬಿ.ಎಚ್.ಎಂ ಅವರು ಶಿಸ್ತು ಯಶಸ್ಸಿನ ಮಾರ್ಗ ಎಂದರು.
ಶೇಷಾದ್ರಿಪುರಂ ಪದವಿ ಪೂರ್ವ ಕಾಲೇಜಿನ ಪ್ರಾಂಶುಪಾಲರಾದ ಬಸವರಾಜ್ ಬಿ ವಿ. ಅಧ್ಯಕ್ಷತೆ ವಹಿಸಿದ್ದರು. ಉಪನ್ಯಾಸಕರು, ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿ ವರ್ಗದವರು ಉಪಸ್ಥಿತರಿದ್ದರು.

ಡಾ. ರಜನಿ ಎಂ

ದುರಂತವೆಂದರೆ

ಪ್ರಬುದ್ಧ ಮನಸ್ಸು …
ಪ್ರಣಯ ಭರಿತ
ಹೃದಯ
ಒಂದೇ ದೇಹದಲ್ಲಿರುವುದು.

ಹೆಣ್ಣಿಗೆ ಬೇಕಾಗಿದ್ದು

ಸುರ ಸುಂದರಾಂಗ,
ಕುಬೇರ,
ಅಲ್ಲ…
ಅವಳ ಕಣ್ಣಿನ ನೋವನ್ನು
ಹೇಳದೇ ಅರ್ಥ ಮಾಡಿಕೊಂಡು
ತನ್ನೆದೆಗೆ ಒರಗಿಸಿಕೊಂಡು
ಇಲ್ಲಿದೆ ನೋಡು
” ನಿನ್ನ ಮನೆ” ಎನ್ನುವ ಗಂಡು.

ಆಕಾಶ

ನನಗೂ ಆಕಾಶಕ್ಕೂ
ಏನು ವ್ಯತ್ಯಾಸ
ಕೇಳಿದಳು ನಲ್ಲೆ…
ನಾ ನುಡಿದೆ ….

ನಲ್ಲೆ ನೀನು ನಕ್ಕಾಗ
ನಾನು ಆಕಾಶವನ್ನೇ
ಮರೆವೆ .

‘ನಿಜಾರ್ ಖಬ್ಬಾನಿ’ ಕವಿತೆಗಳ
ಭಾವಾನುವಾದ.

ನಿಜಾರ್ ಖಬ್ಬಾನಿ (1923-1998)ಸಿರಿಯಾದ ರಾಷ್ಟೀಯ ಕವಿ ಎನಿಸಿಕೊಂಡುವರು. ಅವರು ಎಲ್ಲಾ ಸಾಹಿತ್ಯ ಪ್ರಕಾರಗಳಲ್ಲೂ ಕೈ ಆಡಿಸಿದವರು. ಅವರ ಕವನಗಳು ಸರಳವಾಗಿದ್ದರೂ ಮಾರ್ಮಿಕವಾಗಿರುತ್ತವೆ. ಪ್ರೇಮ ಕವನಗಳೂ ಹಾಗೆಯೆ. ಅವರ ಕವನಗಳ ಭಾವಾನುವಾದದ ಪ್ರಯತ್ನ ಡಾ. ರಜನಿ ಅವರಿಂದ.