ಮಳೆಯಲ್ಲಿ ನೊಂದವರು ಬೆಂದವರು ಒಂದಡೆ. ಮತ್ತೊಂದೆಡೆ ಬೆಚ್ಚನೆ ಮನೆ ಒಬ್ಬರಿಗೆ, ಒಬ್ಬರಿಗೆ ಖುಷಿ ಒಬ್ಬರಿಗೆ ನೋವು, ನೆನೆಯದೆ ಒದ್ದೆಯಾಗಲಾರವು. ದೈವ ನಿಯಾಮಕ ಎಂಬ ಅರ್ಥದಲ್ಲಿ ಜಡಿ ಮಳೆಯ ನಂತರದ ಬಿಸಿಲು ಈ ಕವನದ ವಸ್ತುವನ್ನಾಗಿಸಿಕೊಂಡಿದ್ದಾರೆ ಕವಯತ್ರಿ ಡಾ. ರಜನಿ.

ಮುನಿಸಿನ ನಂತರದ
ನಿನ್ನ ನಗು ….
ಜಡಿ ಹಿಡಿದ ಮಳೆ
ನಂತರದ ಎಳೆ ಬಿಸಿಲು.

ಸ್ಟೆಟರ್, ಕೊಡೆ
ಆಗಿ ಬರುವುದಿಲ್ಲ…
ಬಯಲು ಸೀಮೆಯ ನಮಗೆ.

ನೀರು ಮುಟ್ಟಲು ಕೊರೆತ
ಕೈಗಳು ತಣ್ಣಗೆ….
ಮಜ್ಜಿಗೆ ಒಗ್ಗದು.

ಬಟ್ಟೆ ಒಣಗಲ್ಲ
ಮುಗ್ಗಲು…
ಕಾಲಿಡೆ ಕೆಸರು.

ಅಜ್ಜಿಗೆ ಕುಡಿಯಲು
ಬಿಸಿ ನೀರು….
ಸಂಜಿಗೆ ಬಿಸಿ
ಉದಕ.

ರೆಕ್ಕೆ ಬಿಚ್ಚಿ ಹಾರಿದ
ಚಿಟ್ಟೆ …
ಬೆನ್ನಿಗೆ
ಎಳೆ ಬಿಸಿ ಕಾವು.

ಬಿಸಿಲ ಸಿರಿ
ಮಳೆ ನಂತರ …
ಬೇಸಿಗೆ ಬೇಗೆಗೆ
ಮಳೆ ನೀರ ಹೊಳೆ.

ಅದಿದ್ದಾಗ
ಇದು …
ಇದಿದ್ದಾಗ
ಅದು.

ನೋಡಿ
ಕಲಿತರೆ ಏನು?
ಮಳೆಯಲ್ಲಿ
ಒದ್ದೆಯಾಗದೆ ?

ಗೇದು ಬಿಸಿಲಲ್ಲಿ
ಬೆವರಿ…
ಚೊಂಬೆತ್ತಿ
ತಣ್ಣೀರ ಕುಡಿಯದೆ .

ಇನಿತು ಬಿಸಿಲ
ರವಷ್ಟು ಚಳಿಯ …
ಕೊಂಚ
ಮಳೆಯ.

ಮೋಡದೊಳಗೆ
ಮಳೆಯನ್ನು..
ಮೋಡದಂಚಿನಲಿ
ಬಿಸಿಲನ್ನು.

ಸುರಿವ ಮಳೆಯಲ್ಲಿ
ಎಳೆ
ಬಿಸಿಲ…
ಕಾಗೆ ಮಳೆಯ.

ಮಾಡುವೆ ಹೇಗೋ
ಮನುಜ…
ಬಚ್ಚಲ ವಂದರಿಯ
ನೀರಿನಲ್ಲಿ?

ನಮಿಸಬಾರದೇ?
ಸುರಿವ ಮಳೆಯಲ್ಲಿ
ಸುಡುವ ಬಿಸಿಲಲ್ಲಿ

ಆ ಐಚೋಜಿಗಕ್ಕೆ…

ನೆಂದವರ
ಬೆಂದವರ
ಬೆವೆತು ಹಣ್ಣಾದವರ
ಕಾಯಿ ನೀನು ಎಂದು…

ಡಾII ರಜನಿ

ತುರುವೇಕೆರೆ: ತಾಲ್ಲೂಕಿನಾದ್ಯಂತ ನಿನ್ನೆ ರಾತ್ರಿ ಸುರಿದ ಅಕಾಲಿಕ ಮಳೆಯಿಂದ ಮನೆಗಳ ಗೋಡೆ ಕುಸಿದು, ವಿದ್ಯುತ್ ಕಂಬಗಳು ಮುರಿದು, ರಾಗಿ ಬೆಳೆಗಳು ಹಾನಿಯಾಗಿ ಲಕ್ಷಾಂತರ ರೂಪಾಯಿಗಳ ನಷ್ಟ ಸಂಭವಿಸಿದೆ.
ತಾಲ್ಲೂಕಿನಲ್ಲಿ ಅತಿ ಹೆಚ್ಚು ಮಳೆಯಾಗಿರುವ ದಂಡಿನಶಿವ ಹೋಬಳಿಯಲ್ಲಿ ಮಳೆಗಾಳಿಗೆ ತೆಂಗಿನ ಮರ ಬಿದ್ದು ವಿದ್ಯುತ್ ಕಂಬದ ಮೇಲೆ ಬಿದ್ದು ದ್ಯಾಮಸಂದ್ರದಲ್ಲಿ 2, ಅಪ್ಪಸಂದ್ರದಲ್ಲಿ 5 ವಿದ್ಯುತ್ ಕಂಬಗಳು ಮುರಿದಿವೆ.

ಪಟ್ಟಣದ ವ್ಯಾಪ್ತಿಯ ಕಾಳಪ್ಪನ ಪಾಳ್ಯ, ಹರಿದಾಸನಹಳ್ಳಿ, ಮಾರಸಂದ್ರ ಪೂರಕದಲ್ಲಿ 3 ವಿದ್ಯುತ್ ಕಂಬಗಳು ಮುರಿದಿವೆ. ತಂಡಗ ಶಾಖೆಯ
ಹಳ್ಳದಹೊಸಹಳ್ಳಿ, ದಬ್ಬೇಘಟ್ಟ, ಹಾಗು ಇನ್ನಿತರ ಭಾಗಗಳಲ್ಲಿ ವಿದ್ಯುತ್ ಪರಿವರ್ತಕ ಮತ್ತು ವಿದ್ಯುತ್ ಕಂಬಗಳ ಸೇರಿ ಒಟ್ಟು 20 ಕಂಬಗಳು ಮುರಿದು ಧರೆಗುರುಳಿವೆ.
ತಾಲ್ಲೂಕಿನ ಮಾಚೇನಹಳ್ಳಿ ಶಾಲಾ ಹತ್ತಿರದ ಹೇಮಾವತಿ ಉಪನಾಲೆಯು ಒಡೆದು ಅಪಾರ ಪ್ರಮಾಣದ ನೀರು ರೈತ ತೋಟ, ಹೊಲಗಳಿಗೆ ನುಗ್ಗಿ ಹಾನಿಯುಂಟು ಮಾಡಿದೆ.

ಪಟ್ಟಣದ ಸುಭ್ರಹ್ಮಣಂ ಹಾಗು ಮೀನಾಕ್ಷಿ ನಗರದ ತಗ್ಗಿನ ಪ್ರದೇಶಗಳಲ್ಲಿನ ಮನೆಗಳಿಗೆ ನೀರು ನುಗ್ಗಿದೆ. ಆಗೆಯೇ ಕಾಳಂಜಿಹಳ್ಳಿ-ಕುಣಿಕೇನಹಳ್ಳಿ ಬಳಿ ಕೋಳಿ ಫಾರಂ ಶೆಡ್ನ ಒಂದು ಭಾಗ ಧರೆಗುರುಳಿದೆ.

ಮನೆ ಗೋಡೆ ಕುಸಿತ: ತಾಲ್ಲೂಕಿನ ಕಸಬಾ ವ್ಯಾಪ್ತಿಯ ದೊಂಬರಹಟ್ಟಿ 2, ವಿವೇಕಾನಂದ ನಗರ2, ತಾವರೆಕೆರೆ 1, ಹಿರೇಡೊಂಕಿಹಳ್ಳಿ 2, ಗೊಟ್ಟಿಕೆರೆ1, ದುಂಡಾಮಜರೆ ಕೋಡಿಹಳ್ಳಿ 1, ದುಂಡ 1, ದೊಡ್ಡೇನಹಳ್ಳಿ 2, ದಂಡಿನಶಿವರ ಹೋಬಳಿ ವ್ಯಾಪ್ತಿಯ ದಂಡಿನಶಿವರ, ಹಟ್ಟಿಹಳ್ಳಿಗೊಲ್ಲರಹಟ್ಟಿ, ಸಂಪಿಗೆ, ಸೊಪ್ಪನಹಳ್ಳಿಯಲ್ಲಿ ತಲಾ ಒಂದೊಂದು, ಡೊಂಕಿಹಳ್ಳಿ ಗೊಲ್ಲರಹಟ್ಟಿ 2, ಮಾಯಸಂದ್ರದ ಜಿ.ದೊಡ್ಡೇರಿ1, ದಬ್ಬೇಘಟ್ಟ ಹೋಬಳಿಯ ಕ್ಯಾಮಸಂದ್ರ, ಮಾರಪ್ಪನಹಳ್ಳಿ, ಚಂದ್ರಾಪುರ ಮತ್ತು ರಂಗನಹಳ್ಳಿಯಲ್ಲಿ ತಲಾ ಒಂದೊಂದು ಮನೆಗಳ ಗೋಡೆಯು ಕುಸಿದು ಮನೆಯಲ್ಲಿದ್ದ ಕೆಲ ವಸ್ತುಗಳು ಹಾನಿಗೊಳಗಾಗಿವೆ.

ರಾಗಿ ಹಾನಿ: ‘ತಾಲ್ಲೂಕಿನಲ್ಲಿ 16800 ಹೆಕ್ಟೇರ್ ಪ್ರದೇಶದಲ್ಲಿ ಮುಂಗಾರು ರಾಗಿ ಬೆಳೆ ಭಿತ್ತನೆಯಾಗಿದ್ದು ಆ ಪೈಕಿ 12800 ಹೆಕ್ಟೇರ್ ಪ್ರದೇಶ ವಿಪರೀತ ಮಳೆಗೆ ರಾಗಿ ಭಾಗಶಃ ಹಾನಿಯಾಗಿದೆ’ ಎನ್ನುತ್ತಾರೆ ಕೃಷಿ ಸಹಾಯಕ ನಿರ್ದೇಶಕಿ ಬಿ.ಪೂಜಾ ಬಿಗಿನೇಹಳ್ಳಿ ಸೇರಿದಂತೆ ಕೆಲ ಭಾಗಗಳಲ್ಲಿ ರಾಗಿ ತೆನೆಗಳಲ್ಲೇ ಮೊಳಕೆಯೊಡೆದಿದೆ.

ರಸ್ತೆ ಮೇಲೆ ಹರಿದ ಹಳ್ಳ: ತಾಲ್ಲೂಕಿನ ತುರುವೇಕೆರೆ- ಕಲ್ಲೂರ್ ಕ್ರಾಸ್ ರಸ್ತೆಯ ಕೊಂಡಜ್ಜಿ ಹಳ್ಳ ರಸ್ತೆ ಮೇಲೆ ಹರಿದು ಬೆಳಗಿನ ಕೆಎಸ್ಆರ್ಟಿಸಿ ಬಸ್ ಹಳ್ಳ ದಾಟಲು ಹರಸಾಹಸಪಟ್ಟಿತು. ಅದೇ ರೀತಿ ಮಾದಿಹಳ್ಳಿ-ಅರಳೀಕೆರೆಹಳ್ಳ, ದೊಂಬರನಹಳ್ಳಿ- ಚುಮ್ಮನಹಳ್ಳಿ ಹಳ್ಳ, ಸಾರಿಗೆಕೆರೆ ತುಂಬಿ ರಭಸವಾಗಿ ರಸ್ತೆ ಮೇಲೆ ಹರಿಯುತ್ತಿದ್ದು ವಾಹನ ಸಂಚಾರ ಕಷ್ಟವಾಗಿದೆ. ಇನ್ನೂ ಶಿಂಷಾ ನದಿಯ ನೀರು ಪುರದ ಪಾಳ್ಳದಲ್ಲಿ ರಸ್ತೆಗೆ ನುಗ್ಗಿದೆ, ಮಲ್ಲಾಘಟ್ಟಕೆರೆ ಹರಿಯುತ್ತಿರುವುದರಿಂದ ಆನೇಕೆರೆ ಭಾಗಗಕ್ಕೆ ಹೋಗಲು ತೊಂದರೆಯಾಗುತ್ತಿದೆ.

ತುರುವೇಕೆರೆ ತುಂಬಿ ಶಿಂಷಾ ನದಿಗೆ ರಭಸವಾಗಿ ಹರಿಯುತ್ತಿದ್ದು ಮುನಿಯೂರು ಗದ್ದೆ ಬಯಲು ಸಂಪೂರ್ಣ ಜಲಾವೃತವಾಗಿದೆ. ಬಾಣಸಂದ್ರದಲ್ಲಿ ರೈಲ್ವೇ ಮೇಲ್ ಸೇತುವೆಯ ಕೆಳಗೆ ಮೂರು ಅಡಿ ನೀರು ನಿಂತು ವಾಹನ ಮತ್ತು ಜನ ಸಂಚಾರಕ್ಕೆ ತೊಂದರೆಯಾಗಿದೆ.
ತುರುವೇಕೆರೆ ಕಸಬ 100, ದಂಡಿನಶಿವರ 128, ಸಂಪಿಗೆ 54, ಮಾಯಸಂದ್ರ 39, ದಬ್ಬೇಘಟ್ಟ 29 ಮಿ.ಮೀಟರ್ ಮಳೆಯಾಗಿದೆ.
ಸ್ಥಳಕ್ಕೆ ತಹಶೀಲ್ದಾರ್ ಆರ್.ನಯೀಂಉನ್ನಿಸಾ, ಬೆಸ್ಕಾಂ ಶಾಖಾಧಿಕಾರಿಗಳಾದ ಸೋಮಶೇಖರ್, ಉಮೇಶ್ವರಯ್ಯ, ಕಾಂತರಾಜು, ಗಿರೀಶ್, ಪಟ್ಟಣ ಪಂಚಾಯಿತಿ ಮುಖ್ಯಾಧಿಕಾರಿ ಮಂಜುಳಾದೇವಿ, ಕೃಷಿ ಸಹಾಯಕ ನಿರ್ದೇಶಕಿ ಬಿ.ಪೂಜಾ, ಗ್ರಾಮ ಲೆಕ್ಕಾಧಿಕಾರಿಗಳಾದ ರಮೇಶ್, ಅಣ್ಣಪ್ಪಸ್ವಾಮಿ, ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

Public story.in

Punlicstory

ತುರುವೇಕೆರೆ: ಪಟ್ಟಣದ ದಬ್ಬೇಘಟ್ಟ ರಸ್ತೆಯಲ್ಲಿನ ಆದಿಚುಂಚನಗಿರಿ ವಿದ್ಯಾಸಂಸ್ಥೆಯ ಎಸ್ಎಸಿ ಮಯೂರು ವಿದ್ಯಾಲಯದಲ್ಲಿ ಮಕ್ಕಳ ದಿನಾಚರಣೆಯ ಕಾರ್ಯಕ್ರಮದಲ್ಲಿ ವಿದ್ಯಾರ್ಥಿಗಳೇ ಅಧ್ಯಕ್ಷರು, ಅತಿಥಿಗಳಾಗಿ ಭಾಗವಹಿಸಿ ಸಂಭ್ರಮದಿಂದ ಆಚರಿಸಿದರು.

ಪ್ರಾಥಮಿಕ ಮತ್ತು ಪ್ರೌಢ ಶಾಲೆಗಳ ವಿದ್ಯಾರ್ಥಿಗಳು ಜವಹರಲಾಲ್ ನೆಹರೂ ಅವರು ಮಕ್ಕಳಿಗೆ ತೋರುತ್ತಿದ್ದ ಪ್ರೀತಿ, ಕಾಳಜಿ, ಉದಾರತೆಗಳ ಕುರಿತು ಮಾತನಾಡಿದರು. ಕೆಲ ವಿದ್ಯಾರ್ಥಿಗಳು ನೆಹರೂ ಜೈಲಿನಲ್ಲಿದ್ದಾಗ ತನ್ನ ಮಗಳಾದ ಇಂದಿರಾ ಗಾಂಧಿಗೆ ಬರೆದ ಪತ್ರಗಳ ಬಗ್ಗೆ ಮಾಡುತ್ತಾ ದೊಡ್ಡವರನ್ನೂ ನಾಚುವಂತೆ ಭಾಷಾ ಮಾಡಿ ಕಾರ್ಯಕ್ರಮದಲ್ಲಿದ್ದವರಿಂದ ಚಪ್ಪಾಳೆ ಗಿಟ್ಟಿಸಿದರು.

ಮಕ್ಕಳಿಂದ ಜರುಗಿದ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳ ಎಲ್ಲರನ್ನೂ ಹುಬ್ಬೇರುವಂತೆ ಮಾಡಿತು. ಮಕ್ಕಳ ದಿನಾಚರಣೆಯ ಅಂಗವಾಗಿ ಏರ್ಪಡಿಸಿದ್ದ ಓಟದ ಸ್ಪರ್ಧೆ, ಕೆರೆ ದಡ, ಕಪ್ಪೆ ಓಟ, ಬಾಲನ್ನು ಬಕೀಟ್ನೊಳಗೆ ಹಾಕುವುದು, ಬಿಸ್ಕೇಟ್ ತಿನ್ನುವುದು, ಬಲೂನು ಊದುವ, ಮ್ಯೂಜಿಕಲ್ ಚೇರ್, ಭಾಷಣ ಮತ್ತು ಪ್ರಬಂಧ ಸ್ಪರ್ಧಿಗಳಲ್ಲಿ ವಿಜೇತರಾದ ಮಕ್ಕಳಿಗೆ ಬಹುಮಾನ ಕೊಟ್ಟು ಪ್ರೋತ್ಸಾಹಿಸಲಾಯಿತು. ನಂತರ ಮಕ್ಕಳಿಗೆ ಸಿಹಿ ವಿತರಿಸಲಾಯಿತು.

ಈ ಸಂದರ್ಭದಲ್ಲಿ ಮುಖ್ಯ ಶಿಕ್ಷಕ ಜಯದೇವಮೂರ್ತಿ, ಶಿಕ್ಷಕರುಗಳಾದ ವಿಮಲ, ರೇಖಾ, ರಾಧಾ, ಶ್ರುತಿ, ಸೌಮ್ಯ, ನಾಗೇಶ್, ಗೌಡ, ಇಂದಿರಾ, ಕೋಮಲ, ಲತಾ, ಗೀತಾ, ಕವಿತ, ಸದಾಶಿವಯ್ಯ, ಮಮತಿ ಮತ್ತು ಸಿಬ್ಬಂದಿಗಳು ಉಪಸ್ಥಿತಿರಿದ್ದರು.

ಈ ಮಳೆಗೂ ಪ್ರೀತಿಗೂ
ಎಂತಹುದೋ ನಂಟು.
ಒಮ್ಮೆ ಬಿರುಗಾಳಿ
ಒಮ್ಮೆ ಮುನಿಸು
ಈ ಚಳಿ ಮಳೆಗೆ ಪ್ರೀತಿಗೂ ಸಮೀಕರಿಸಿದ ಕವನ
ಡಾII ರಜನಿ ಅವರಿಂದ

ಚುಮು ಚುಮು ಚಳಿ
ಗುದು ಗುದು ನಡುಕ..
ಜಿಟಿ ಜಿಟಿ ಮಳೆ
ಪಚ ಪಚ ಕೆಸರು

ಎಲ್ಲೋ ಬಚ್ಚಿಟ್ಟಿದ್ದ
ರಗ್ಗು ಸ್ಟೆಟರ್ ಗಳು
ಹೊರಕ್ಕೆ…

ಬಯಲು ಸೀಮೆ
ಮಲೆನಾಡು
ಆದ ಹಾಗೆ…

ಅಲ್ಲಿ ಕುಸಿತಕ್ಕೆ
ಇಲ್ಲಿ ಮಳೆ…
ಸುಂಟರಗಾಳಿ…

ಒಮ್ಮೆ ಬಿರುಗಾಳಿ
ಒಮ್ಮೆ
ಮಂದಾನಿಲ …

ಬಿಟ್ಟೂ ಬಿಡದೆ
ಬಿಟ್ಟು….
ಬಾರದೆ

ಬೇಕೆಂದಾಗ
ಬಾರದೆ ….
ಬೇಡೆಂದಾಗ
ಬಂದು…

ಸುಂಟರಗಾಳಿ
ಹಾದಿಯಲ್ಲಿ
ಎಲ್ಲಾ ನಾಶ…

ಬರಬಾರದೆ
ತಂಗಾಳಿಯಾಗಿ
ಬಾ…
ಎಂದಾಗ

ಜೊತೆಗೆ
ತುಂತುರು
ತಂದು …

ಡಾ II ರಜನಿ

ಮಕ್ಕಳ ಮೇಲೆ ತಮ್ಮ ಆಸೆ ಆಕಾಂಕ್ಷೆ ಗಳನ್ನು
ಹೇರುತ್ತಾ ಒತ್ತಡಕ್ಕೆ ತಳ್ಳುವ ಹೆತ್ತವರಿಗೆ

ಖಲೀಲ್ ಗಿಬ್ರಾನ್ ಅವರ “ಮಕ್ಕಳು”
ಕವನದ ಅನುವಾದ ಮಾಡಿರುವ ಡಾII ರಜನಿ
ಕವಿಯ ಆಶಯವನ್ನು ಸಮರ್ಪಕವಾಗಿ
ವ್ಯಕ್ತಪಡಿಸಿದ್ದಾರೆ. ಮಕ್ಕಳ ಡಾಕ್ಟರ್ ಆದ ಅವರು
ಮಕ್ಕಳ ದಿನಾಚರಣೆಗೆ ಈ ಕವನ ಅನುವಾದಿಸಿದ್ದಾರೆ

ನಿಮ್ಮ ಮಕ್ಕಳು ನಿಮ್ಮ ಮಕ್ಕಳಲ್ಲ…

ಅವು ಈ ಜೀವ ಜೀವದ ಸೆಲೆಯ ಕಾಯುವಿಕೆಯ
ಮಗ ,ಮಗಳು …..
ಅವು ನಿಮ್ಮ ಮೂಲಕ ಬಂದಿವೆ
ನೀವು ಅವರನ್ನು ತಂದಿಲ್ಲ …..

ನೀವು ಅವರಿಗೆ ಪ್ರೀತಿ ಕೊಡಬಲ್ಲಿರಿ ಆದರೆ
ನಿಮ್ಮ ಆಲೋಚನೆಗಳನ್ನಲ್ಲ….
ಏಕೆಂದರೆ ಅವರಿಗೆ ತಮ್ಮದೇ ಆಲೋಚನೆಗಳಿವೆ.

ಅವರು ನಿಮ್ಮ ಮನೆಯಲ್ಲಿರಬಹುದು …
ಆದರೆ ನೀವು ಅವರ ಆತ್ಮಗಳನ್ನು ಸಾಕಲಾರಿರಿ
ಏಕೆಂದರೆ ಅವರ ಆತ್ಮಗಳು ನಾಳೆಯ
ಹುಡುಕಾಟದಲ್ಲಿವೆ.

ಆ ನಾಳೆಗಳನ್ನು ನೀವು ಕನಸಿನಲ್ಲೂ ಕಾಣಲಾರಿರಿ.

ನೀವು ಅವರಂತೆ ಆಗಲು ಇಚ್ಛಿಸಬಹುದು
ಆದರೆ ಅವರನ್ನು ನಿಮ್ಮಂತೆ ಮಾಡಲು ಪ್ರಯತ್ನಿಸಬೇಡಿ…
ಏಕೆಂದರೆ ಜೀವನವು ಹಿಂದಕ್ಕೆ ಚಲಿಸುವುದಿಲ್ಲ…
ಮತ್ತು ನಿನ್ನೆಯಲ್ಲಿ ಇರಲಾಗುವುದಿಲ್ಲ.

ನೀವು ಜೀವಂತ ಬಾಣಗಳನ್ನು
ಚಿಮ್ಮಿಸಿರುವ ಬಿಲ್ಲುಗಳು.
ಬಿಲ್ಲುಗಾರ ಅನಂತ ಪಥದ ಗುರಿ ಇಟ್ಟು
ಅಮಿತ ಶಕ್ತಿಯಲಿ ಬಾಗಿಸಬೇಕು ಬಿಲ್ಲನ್ನು…

ಹೇಗೆಂದರೆ …ಬಾಣಗಳು ವೇಗವಾಗಿ ದೂರ
ಹಾರುವಂತೆ.
ಬಾಗಿದುದಕ್ಕೆ ಸಂತಸಪಡುವಂತೆ…

ಚಿಮ್ಮಿದ ಬಾಣವನ್ನು ಪ್ರೀತಿಸಿದಂತೆ
ಬಾಗಿ ನಿಂತ ಬಿಲ್ಲನ್ನೂ ಪ್ರೀತಿಸಿ.

ಡಾII ರಜನಿ

ಕಲೀಲ್ ಗಿಬ್ರಾನ್ ಅವರ”ಮಕ್ಕಳು”
ಕವನ ಅನುವಾದ