ತುಮಕೂರು: ಜಿಲ್ಲೆಯಲ್ಲಿ ಭಾನುವಾರ  46 ಮಂದಿಗೆ ಕೋವಿಡ್ 19 ದೃಢಪಟ್ಟಿದೆ.

ಪಾವಗಡ ತಾಲ್ಲೂಕಿನ ಹೊಸಹಳ್ಳಿ ತಾಂಡದ 62 ವರ್ಷದ ವೃದ್ಧ, ತುಮಕೂರು ತಾಲ್ಲೂಕು ಭೀಮಸಂದ್ರ ಗ್ರಾಮದ 62 ವರ್ಷ, ಚಿಕ್ಕನಾಯಕನಹಳ್ಳಿ ಹುಳಿಯಾರು ಗ್ರಾಮದ 55 ವರ್ಷದ ವ್ಯಕ್ತಿ ಮೃತಪಟ್ಟಿದ್ದಾರೆ.  71 ಮಂದಿ ಗುಣಮುಖರಾಗಿ ಇಂದು ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ.

ತುಮಕೂರು 25, ಚಿಕ್ಕನಾಯಕನಹಳ್ಳಿ 4, ಪಾವಗಡ 4, ಮಧುಗಿರಿ 3, ಶಿರಾ 3, ಕುಣಿಗಲ್  3, ಕೊರಟಗೆರೆ 2, ತುರುವೇಕೆರೆ 1,  ಗುಬ್ಬಿ 1 ಪ್ರಕರಣ ದೃಢಪಟ್ಟಿದೆ.

45 ಮಂದಿಯಲ್ಲಿ 3 ತಿಂಗಳ ಮಗು, ತುಮಕೂರು, ಚಿಕ್ಕ ನಾಯಕನಹಳ್ಳಿಯ ಇಬ್ಬರು  ಪೊಲೀಸ್ ಸಿಬ್ಬಂದಿ, 60 ವರ್ಷ ಮೇಲ್ಪಟ್ಟ 7 ಮಂದಿ ವೃದ್ಧರಿಗೆ ಕೋವಿಡ್ 19 ಸೊಂಕು ತಗುಲಿದೆ.

ಪಾವಗಡ ತಾಲ್ಲೂಕಿನ ಹೊಸಹಳ್ಳಿ ತಾಂಡದ ಒಂದೇ ಕುಟುಂಬದ 4 ಮಂದಿಗೆ ಸೋಂಕು ದೃಢಪಟ್ಟಿದೆ. ಇದೇ ಕುಟುಂಬಕ್ಕೆ ಸೇರಿದ ವೃದ್ದ ಜುಲೈ-16 ರಂದು ಮೃತಪಟ್ಟಿದ್ದರು. ಇವರು ಕಿಡ್ನಿ ಸಮಸ್ಯೆಯಿಂದ ಬಳಲುತ್ತಿದ್ದು,  ಅನಂತಪುರದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು.

ಜಿಲ್ಲೆಯಲ್ಲಿ ಒಟ್ಟು ಸೋಂಕಿತರ ಸಂಖ್ಯೆ 699 ಕ್ಕೆ ತಲುಪಿದೆ.  ಒಟ್ಟು 358 ಮಂದಿ ಬಿಡುಗಡೆಯಾಗಿದ್ದಾರೆ.  318 ಸಕ್ರಿಯ ಪ್ರಕರಣಗಳಿವೆ.  ಈವರೆಗೆ  23 ಮಂದಿ ಮೃತಪಟ್ಟಿದ್ದಾರೆ.

ತುರುವೇಕೆರೆ ಪ್ರಸಾದ್
ತುರುವೇಕೆರೆ: ಜಾಗತೀಕರಣ ಹಾಗೂ ಯಂತ್ರಗಳ ದಾಂಗುಡಿಯಿಂದಾಗಿ ಅತಂತ್ರ ಸ್ಥಿತಿಯಲ್ಲಿದ್ದ ಕೈಮಗ್ಗಗಳ ಪುನಶ್ಚೇತನಕ್ಕೆ ಹೊಸದೊಂದು ಸಂಚಲನ ಮೂಡಬೇಕಿದ್ದ ಸಂದರ್ಭದಲ್ಲೇ ತಾಲ್ಲೂಕಿನ ಮುನಿಯೂರಿನ ಕೈ ಮಗ್ಗ ನೇಕಾರರು ಕೊರಾನಾದಿಂದಾಗಿ ತಮ್ಮ ವೃತ್ತಿಯನ್ನೇ ಬಿಟ್ಟು ಕೂಲಿ ನಾಲಿ ಮಾಡಿ ಹೊಟ್ಟೆ ಹೊರೆದುಕೊಳ್ಳುವ ಶೋಚನೀಯ ಸ್ಥಿತಿ ತಲುಪಿದ್ದಾರೆ.

ಮುನಿಯೂರು ತುಮಕೂರು ಜಿಲ್ಲೆಯಲ್ಲೇ ನೇಕಾರಿಕೆಗೆ ಹೆಸರುವಾಸಿಯಾದ ಗ್ರಾಮ. ಸುಮಾರು 200ಕ್ಕೂ ಹೆಚ್ಚು ಕುಟುಂಬಗಳು ಇಲ್ಲಿ ನೇಕಾರಿಕೆಯನ್ನೇ ನೆಚ್ಚಿವೆ. ಬಹುತೇಕ ಹಿಂದುಳಿದ ವರ್ಗಕ್ಕೆ ಸೇರಿದ ದೇವಾಂಗ ಕುಟುಂಬಗಳಲ್ಲಿ 300ಕ್ಕೂ ಹೆಚ್ಚು ಮಗ್ಗಗಳು ಪ್ರತಿದಿನ ಅಹರ್ನಿಶಿ ಸಾವಿರಾರು ಸೀರೆಗಳನ್ನು ನೇಯುತ್ತವೆ. ಆದರೆ ಕೈ ಮಗ್ಗದಿಂದ ಜೀವನೋಪಾಯ ಮಾಡಲಾಗದೆ ಶೇ.70ರಷ್ಟು ಕುಟುಂಬಗಳು ಕೈ ಮಗ್ಗವನ್ನು ಬಿಟ್ಟು ವಿದ್ಯುತ್ ಮಗ್ಗವನ್ನು ಅಳವಡಿಸಿಕೊಂಡಿವೆ.

ಇಡೀ ಗ್ರಾಮದಲ್ಲಿ ಕೇವಲ 20 ಕೈ ಮಗ್ಗಗಳು ಮಾತ್ರ ಉಳಿದಿವೆ. ಇಳಿವಯಸ್ಸಿನಲ್ಲಿ ಬದುಕಿನ ಮುಸ್ಸಂಜೆಯಲ್ಲಿರುವವರು ಮಾತ್ರ ಕೈ ಮಗ್ಗಕ್ಕೆ ಅಂಟಿಕೊಂಡಿದ್ದಾರೆ. ಮಿಕ್ಕವರು ಒಂದೋ ಕಸುಬನ್ನೇ ಬಿಟ್ಟಿದ್ದಾರೆ ಇಲ್ಲ ವಿದ್ಯುತ್ ಮಗ್ಗಕ್ಕೆ ಬದಲಾವಣೆ ಹೊಂದಿದ್ದಾರೆ.

ಕರೋನಾ ಹೊಡೆತದಿಂದಾಗಿ ವಿದ್ಯುತ್ ಮಗ್ಗ ಮತ್ತು ಕೈ ಮಗ್ಗ ಎರಡನ್ನೂ ಅವಲಂಭಿಸಿದ್ದವರ ಜೀವನ ದಿಕ್ಕಾಪಾಲಾಗಿ ಬೀದಿಗೆ ಬಿದ್ದಿದೆ. ಗ್ರಾಮದಲ್ಲಿ ಈಗ 200 ಮಗ್ಗಗಳ ಪೈಕಿ ಐದಾರು ಮಗ್ಗಗಳು ಮಾತ್ರ ಕೆಲಸ ಮಾಡುತ್ತಿವೆ, ಮಿಕ್ಕ ಮಗ್ಗಗಳು ಸಂಪೂರ್ಣವಾಗಿ ಸ್ಥಗಿತವಾಗಿವೆ.

ಚೈನ್ ಡ್ರಾಬಿ ಹಾಗೂ ಗಣಕೀಕೃತ ಡ್ರಾಬಿಯಿಂದ ನಾಜೂಕು ಕೆಲಸ ಮಾಡುವ ತಂತ್ರಜ್ಞಾನವನ್ನು ಹಲವು ವಿದ್ಯುತ್ ಮಗ್ಗಗಳಲ್ಲಿ ಅಳವಡಿಸಲಾಗಿದೆ. ಈ ಮಗ್ಗಗಳಲ್ಲಿ ವಿಶೇಷವಾಗಿ ಅರ್ಟ್ ರೇಷ್ಮೆ ಸೀರೆಗಳನ್ನು ನೇಯಲಾಗುತ್ತದೆ. ಈ ಸೀರೆಗಳಿಗೆ ಸ್ಥಳಿಯವಾಗಿ ಮಾರುಕಟ್ಟೆ ಇಲ್ಲ.

ಇಲ್ಲೇನಿದ್ದರೂ ಶುಭ ಸಮಾರಂಭ,ಮದುವೆಗಳಲ್ಲಿ ಶುದ್ಧ ರೇಷ್ಮೆ ಮತ್ತು ಹತ್ತಿ ಬಟ್ಟೆಗಳಿಗೇ ಬೇಡಿಕೆ. ಈ ಆರ್ಟ್ ಸೀರೆಗಳಿಗೆ ವಿಶೇಷ ಬೇಡಿಕೆ ಇರುವುದು ಹೊರರಾಜ್ಯಗಳಲ್ಲಿ ಅದೂ ಬಹುತೇಕ ಪಕ್ಕದ ರಾಜ್ಯ ಮಹಾರಾಷ್ಟ್ರ ಹಾಗೂ ದೂರದ ಕೊಲ್ಕತ್ತದಲ್ಲಿ. ಹೀಗಾಗಿ ಬೆಂಗಳೂರು ವರ್ತಕರ ಮೂಲಕ ಈ ಸೀರೆಗಳು ಮಹಾರಾಷ್ಟ್ರ ಮತ್ತು ಪಶ್ಚಿಮ ಬಂಗಾಳದಲ್ಲಿ ಉತ್ತಮ ಮಾರುಕಟ್ಟೆ ಹೊಂದಿದ್ದವು.

ಮಾಲು ಪಡೆದ ಬೆಂಗಳೂರು ವರ್ತಕರು ಒಂದು ತಿಂಗಳ ಅಡ್ವಾನ್ಸ್ ಚೆಕ್ಕನ್ನು ಮಗ್ಗದವರಿಗೆ ನೀಡುತ್ತಿದ್ದರು, ಮಗ್ಗದವರು ಅದನ್ನು ಕಚ್ಚಾವಸ್ತು ಮಾರಾಟಗಾರರಲ್ಲಿ ಮುರಿಸಿ ನೇಯ್ಗೆಗೆ ಬೇಕಾದ ಕಚ್ಛಾವಸ್ತುಗಳನ್ನು ಪಡೆಯುತ್ತಿದ್ದರು. ಇಂತಹದೊಂದು ಸರಪಣಿ ನೇಕಾರರು, ಕಚ್ಚಾವಸ್ತು ಸರಬರಾಜುದಾರರು ಮತ್ತು ಮಾರಾಟಗಾರರ ನಡುವೆ ಇದ್ದು ಹೇಗೋ ಅವತ್ತಿನ ಹೊಟ್ಟೆಪಾಡು ನಡೆದುಹೋಗುತ್ತಿತ್ತು.

ಈಗ ಕೊರೋನಾದಿಂದಾಗಿ ಈ ಸರಪಣಿ ಕಡಿದು ಬಿದ್ದಿದೆ. ಕಚ್ಚಾವಸ್ತು ಕೊಳ್ಳಲು ಹಣವಿಲ್ಲದೆ, ನೇಯ್ದ ಸೀರೆಗಳಿಗೆ ಬೇಡಿಕೆ ಇಲ್ಲದೆ ನೇಕಾರರು ಮಗ್ಗ ಮುಚ್ಚಿ ಹೊಟ್ಟೆ ಮೇಲೆ ತಣ್ಣಿರು ಬಟ್ಟೆ ಹಾಕಿಕೊಳ್ಳುವಂತಾಗಿದೆ.
ಕರೋನಾ ದಾಂಗುಡಿ ಇಟ್ಟ ನಂತರ ಈ ನೇಕಾರರ ಬದುಕು ಅಕ್ಷರಶಃ ಬೀದಿಪಾಲಾಗಿ ಹೋಯಿತು. ದೂರದ ಕೊಲ್ಕತ್ತದಿಂದ ಯಾವುದೇ ಬೇಡಿಕೆ ಬರಲಿಲ್ಲ, ಪಕ್ಕದ ಮಹಾರಾಷ್ಟ್ರದಲ್ಲಿ ಕೊರೊನಾ ತಾಂಡವ ನೃತ್ಯ ಮಾಡಿದ ಕಾರಣ ಅಲ್ಲಿನ ಮಾರುಕಟ್ಟೆಯೂ ಕುಸಿದು ಬಿತ್ತು. ಮಹಾರಾಷ್ಟ್ರದಲ್ಲಿ ಪರಿಸ್ಥಿತಿ ಸುಧಾರಿಸಿತು ಎನ್ನುವಷ್ಟರಲ್ಲಿ ಬೆಂಗಳೂರಿನ ಚಿಕ್ಕಪೇಟೆ, ಕಬ್ಬನ್ ಪೇಟೆಗಳು ಪದೇ ಪದೇ ಲಾಕ್‍ಡೌನ್ ಸೀಲ್‍ಡೌನ್ ಸುಳಿಗೆ ಸಿಕ್ಕಿವೆ. ಹೀಗಾಗಿ ಇಡೀ ಗ್ರಾಮದಲ್ಲಿ ನೇಕಾರಿಕೆಯನ್ನೇ ನಂಬಿದ್ದ 200ಕ್ಕೂ ಹೆಚ್ಚು ಕುಟುಂಬಗಳು ಜೀವನೋಪಾಯಕ್ಕೆ ಪರದಾಡುವ ಸ್ಥಿತಿ ತಲುಪಿದ್ದಾರೆ.

ಮಗ್ಗಗಳು ಧೂಳು ಹಿಡಿಯುತ್ತಿವೆ. ಮಗ್ಗವನ್ನು ನಂಬಿದವರ ಬದುಕು ಅಗ್ಗವಾಗಿ ಮುಗ್ಗುಲಾಗಿ ಹೋಗಿದೆ. ನೇಕಾರರು ಕೂಲಿ, ಗಾರೆ ಕೆಲಸ, ಮಣ್ಣು ಎತ್ತುವುದು, ವೈಡಿಂಗ್ ವರ್ಕ್, ಎಂದು ತಮಗೆ ಕುಶಲತೆ ಇಲ್ಲದ ಕೆಲಸಗಳಲ್ಲಿ ದುಡಿಯುತ್ತಾ ಹೊಟ್ಟೆಪಾಡಿಗೆ ಪರದಾಡುತ್ತಿದ್ದಾರೆ. ಹೆಚ್ಚು ಕಡಿಮೆ ಇದೇ ಸ್ಥಿತಿ ಗುಬ್ಬಿ ತಾಲ್ಲೂಕಿನ ಕಲ್ಲೂರಿನಲ್ಲೂ ಇದೆ.
ಇದು ವಿದ್ಯುತ್ ಮಗ್ಗಗಳ ಕತೆಯಾದರೆ ಕೈ ಮಗ್ಗಗಳ ಸ್ಥಿತಿ ಇನ್ನೂ ಕರುಣಾಜನಕವೆನಿಸಿದೆ.

ಗ್ರಾಮದ ಹಿರಿಯ ನೇಕಾರರು ದೇಸಿ ಕಸುಬನ್ನು ಬಿಡದೆ ಅದರಲ್ಲೇ ಛಲದಿಂದ ಬದುಕು ನಡೆಸಿದ್ದಾರೆ. ಅವರ ಪ್ರಕಾರ ಇಂದಿನ ದುಬಾರಿ ದಿನಗಳಲ್ಲಿ ಕೈಮಗ್ಗ ನೆಚ್ಚಿ ಬದುಕುವುದೇ ಕಷ್ಟ. ವಿದ್ಯುತ್ ಮಗ್ಗದಿಂದ ಕನಿಷ್ಟ ದಿನಕ್ಕೆ 3-4 ಸೀರೆಗಳನ್ನು ತಯಾರಿಸಬಹುದು, ಆದರೆ ಕೈಮಗ್ಗದಲ್ಲಿ ವಾರಕ್ಕೆ 2-3 ಸೀರೆ ತಯಾರಿಸಿದರೆ ಹೆಚ್ಚು. ವಿದ್ಯುತ್ ಮಗ್ಗದಲ್ಲಿ ನೇಯ್ದ ಪಾಲಿಕಾಟ್, ಆರ್ಟ್‍ಸಿಲ್ಕ್ ಸೀರೆಗಳು ಕನಿಷ್ಠ ರೂ.300ರಿಂದ ರೂ.500 ಬೆಲೆಯಲ್ಲಿ ಸಿಗುತ್ತವೆ.

ಇಲ್ಲಿ ಶುದ್ಧ ರೇಷ್ಮೆ ನೂಲು ಬಳಸುವುದರಿಂದ ಸೀರೆ ಬೆಲೆಯೂ ಹೆಚ್ಚಿರುತ್ತದೆ. ಮಾರುಕಟ್ಟೆಯಲ್ಲಿ ಸ್ಪರ್ಧಾತ್ಮಕ ದರದಲ್ಲಿ ಸೀರೆ ಮಾರಲಾಗದೆ, ಮಧ್ಯವರ್ತಿಗಳ ಹಾವಳಿಯಿಂದ ಬೆಲೆಯಲ್ಲಿ ರಾಜಿ ಮಾಡಿಕೊಂಡು ನಷ್ಟ ಅನುಭವಿಸುತ್ತಿದ್ದವರು ಕರೋನಾ ದೆಸೆಯಿಂದ ಈಗ ಕೈಗೆ ಕೆಲಸವಿಲ್ಲದೆ ಬದುಕಿನ ಮುಸ್ಸಂಜೆಯಲ್ಲಿ ಹತಾಶರಾಗಿ ಕುಳಿತಿದ್ದಾರೆ. ಮೊದಲೇ ಅವರ ದುಡಿಮೆ ‘ಅಜ್ಜಿ ನೂತಿದ್ದು ಅಜ್ಜನ ಉಡಿದಾರಕ್ಕೆ’ ಎಂಬಂತಾಗಿತ್ತು, ಈಗ ಉಡಿದಾರವೂ ಕಿತ್ತುಹೋಗಿ ಬದುಕು ಮೂರಾಬಟ್ಟೆಯಾಗಿದೆ.

ಇನ್ನು ಸರ್ಕಾರ ಘೋಷಿಸಿರುವ ಪ್ಯಾಕೇಜ್ ವಿಷಯಕ್ಕೆ ಬಂದರೆ ಅದು ರಾವಣಾಸುರನ ಹೊಟ್ಟೆಗೆ ಅರೆಕಾಸಿನ ಮಜ್ಜಿಗೆ ಎನ್ನುವಂತಾಗಿದೆ. ಸರ್ಕಾರ ಪ್ರತಿ ನೇಕಾರರಿಗೆ ರೂ.2 ಸಾವಿರ ಸಹಾಯಧನ ಘೋಷಿಸಿದೆ. ಇತರೆ ವೃತ್ತಿಯವರಿಗೆ ರೂ. 5 ಸಾವಿರ ಸಹಾಯ ಧನ ಘೋಷಿಸಿ ನೇಕಾರರಿಗೇಕೆ ಯಾಕೆ 2 ಸಾವಿರ ? ಇದರಲ್ಲಿ ಬದುಕು ಕಟ್ಟಿಕೊಳ್ಳಲು ಸಾಧ್ಯವಾ? ಸರ್ಕಾರ ಯಾಕೆ ಈ ತಾರತಮ್ಯ ನೀತಿ ಅನುಸರಿಸಬೇಕು? ಎಂದು ನೇಕಾರರು ಪ್ರಶ್ನಿಸುತ್ತಾರೆ.ಆ 2 ಸಾವಿರ ಸಹಾಯಧನವೂ ಎಲ್ಲಾ ನೇಕಾರರ ಕೈ ಸೇರಿಲ್ಲ, ಈಗಷ್ಟೇ ಅದು ವಿತರಣೆಯಾಗುವ ಹಂತದಲ್ಲಿದೆ. ಹೇಳುವಂತೆ ನೇಕಾರರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಬದುಕಿನ ಭರವಸೆಯನ್ನೇ ಕಳೆದುಕೊಂಡಿದ್ದಾರೆ.

ಇಂತ ಸಂದರ್ಭದಲ್ಲಿ ಸರ್ಕಾರ ಕೆ.ಎಸ್.ಡಿ.ಸಿ ಮತ್ತು ಕೆ.ಎಸ್.ಐ. ಟಿ.ಡಿ.ಸಿ ಮೂಲಕ ನೇಕಾರರಿಗೆ ಸಹಾಯ ಧನ ನೀಡಬೇಕು. ಅವರು ಕಚ್ಚಾವಸ್ತುಗಳನ್ನು ಕೊಳ್ಳಲು ಸಹಾಯ ಮಾಡಬೇಕು ಎನ್ನುತ್ತಾರೆ. ಬೆಳಗಾವಿಯಲ್ಲಿ ಸಂಕಷ್ಟಕ್ಕೊಳಗಾದ ನೇಕಾರರು ಒಂದಾಗಿ ಕಲ್ಯಾಣ ಮಂಟಪವೊಂದರಲ್ಲಿ ತಮ್ಮ ಸರಕುಗಳು ಪ್ರದರ್ಶನ ಮತ್ತು ಮಾರಾಟ ಆರಂಭಿಸಿದ್ದಾರೆ.

ಹಾಗೆಯೇ ಆನ್‍ಲೈನ್ ಮಾರಾಟವನ್ನೂ ವ್ಯವಸ್ಥೆಗೊಳಿಸಿದ್ದಾರೆ. ಅದೇ ಮಾದರಿಯಲ್ಲಿ ಮುನಿಮೂರು ಮತ್ತು ಕಲ್ಲೂರು ನೇಕಾರರ ಒಂದು ಕ್ಲಸ್ಟರ್ ಮಾಡಿ ನೇಕಾರರ ಉತ್ಪನನ್ನಗಳ ಪ್ರದರ್ಶನ ಮತ್ತು ಆನ್‍ಲೈನ್ ಮಾರಾಟಕ್ಕೆ ಸರ್ಕಾರ ವ್ಯವಸ್ಥೆ ಮಾಡಿಕೊಡಬೇಕು ಎಂದು ದಾಸಿಮಯ್ಯ ವಿದ್ಯುತ್ ಮಗ್ಗ ನೇಕಾರರ ಸಹಕಾರ ಸಂಘದ ಕಾರ್ಯದರ್ಶಿ ಲಕ್ಷ್ಮೀ ನಾರಾಯಣ್ ಸರ್ಕಾರವನ್ನು ಒತ್ತಾಯಿಸಿದ್ದಾರೆ.

ದಾಸನದೊಡ್ಡಿ(ಮಳವಳ್ಳಿ): ಕಾಮೇಗೌಡರ ಕಾಟ ಹೆಚ್ಚಾಗಿದೆ. ಕಾಮಗಾರಿ ನಡೆಸಲು ಬಿಡುತ್ತಿಲ್ಲ. ಮಾತೆತ್ತಿದರೆ ಪೊಲೀಸರಿಗೆ ದೂರು ನೀಡುತ್ತಾರೆ…

-ಇದು ಕಾಮೇಗೌಡರ ಬಗ್ಗೆ ಗ್ರಾಮಸ್ಥರಲ್ಲಿದ್ದ ಅಸಮಾಧಾನ ನಿವಾರಿಸಲು  ಶುಕ್ರವಾರ ಗ್ರಾಮದಲ್ಲಿ ನಡೆದ ಶಾಂತಿ ಸಭೆಯಲ್ಲಿ ಗ್ರಾಮಸ್ಥರು ಕಾಮೇಗೌಡರ ವಿರುದ್ಧ ದೂರುಗಳ ಸರಮಾಲೆಯನ್ನು ಬಿಚ್ಚಿಟ್ಟ ಪರಿ.

ಕಾಮೇಗೌಡರಿಂದ ಗ್ರಾಮದಲ್ಲಿ ನೆಮ್ಮದಿ ಇಲ್ಲದಾಗಿದೆ. ಪೊಲೀಸ್ ಠಾಣೆಗೆ ಪದೇ-ಪದೇ ದೂರು ಕೊಡುತ್ತಾರೆ. ಕಟ್ಟೆಗಳಲ್ಲಿ ದನ ಕರು ಮೇಯಿಸಲು, ನೀರು ಕುಡಿಸಲು ಬಿಡುತ್ತಿಲ್ಲ. ಅಧಿಕಾರಿಗಳಿಗೆ ಪ್ರಭಾವ ಬೀರಿ ಮನ ಬಂದಂತೆ ವರ್ತಿಸುತ್ತಿದ್ದಾರೆ ಎಂದು ಆರೋಪಿಸಿದರು.

ಕಾಮೇಗೌಡರು 2013-14 ನೇ ಸಾಲಿನಲ್ಲಿ ಮರಳು ದಂಧೆ ನಡೆಸಿದ್ದಾರೆ.  ಅವರ ವಿರುದ್ಧ ದೂರು ದಾಖಲಾಗಿದೆ. ಈಗ ನಮ್ಮ ಮೇಲೆ ಅನಗತ್ಯವಾಗಿ ಕ್ರಿಮಿನಲ್ ದೂರು ನೀಡಿ ಪೊಲೀಸ್ ಠಾಣೆಗೆ ಅಲೆಯುವಂತೆ ಮಾಡಿದ್ದಾರೆ. ನಮಗೆ ನ್ಯಾಯ ಕೊಡಿಸದಿದ್ದರೆ ಆತ್ಮಹತ್ಯೆ ಮಾಡಿಕೊಳ್ಳುತ್ತೇವೆ ಎಂದು ಗ್ರಾಮದ ಕೆಲವರು ಆರೋಪಿಸಿದರು.

ಅವರಿಗೆ ಬಂದಿರುವ ಬಿರುದು ಪ್ರಶಸ್ತಿಗಳ ಮೇಲೆ ನಮಗೆ ಯಾವುದೇ ತಕರಾರಿಲ್ಲ. ಅವರಿಂದ  ಗ್ರಾಮಕ್ಕೆ ಒಳ್ಳೆಯ ಹೆಸರು ಬಂದಿದೆ.  ಕೆಲವರು ಇಡೀ  ಗ್ರಾಮವೇ ಅವರ ವಿರುದ್ಧವಿದೆ ಎಂಬಂತೆ ಸುಳ್ಳು ಸುದ್ಧಿ ಹಬ್ಬಿಸುತ್ತಿದ್ದಾರೆ ಎಂದರು.

ಕಾಮೇಗೌಡರು ತುಂಬಾ ಒರಟು ಮನುಷ್ಯ.  ಅವರಿಗೆ ಕೋಪ ಹೆಚ್ಚು, ಅವರ ವರ್ತನೆಯಿಂದ ಜನರಿಗೆ ತೊಂದರೆಯಾಗಿರಬಹುದು ಎಂದು ಕಾಮೇಗೌಡ ಅವರ ಸಂಬಂಧಿ ತಿಮ್ಮೇಗೌಡ ಸಭೆಗೆ ಹೇಳಿದರು.

ತಹಶೀಲ್ದಾರ್ ಕೆ.ಚಂದ್ರಮೌಳಿ, ತಾಲ್ಲೂಕು ಪಂಚಾಯಿತಿ ಕಾರ್ಯ ನಿರ್ವಹಣಾಧಿಕಾರಿ ಬಿ.ಎಸ್.ಸತೀಶ್, ಸಿಪಿಐ ಧನರಾಜ್, ಎಸ್ಐ ಉಮಾವತಿ ಇದ್ದರು.

ಬೆಂಗಳೂರು:  ಬಿಬಿಎಂಪಿ ಆಯುಕ್ತ ಬಿ.ಎಚ್‌. ಅನಿಲ್‌ ಕುಮಾರ್‌ ಅವರನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ರಾಜ್ಯ ಸರ್ಕಾರ ಶನಿವಾರ ವರ್ಗಾವಣೆ ಮಾಡಿದೆ.

ರಾಜ್ಯ ಸರ್ಕಾರ  ಕಂದಾಯ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಎನ್‌. ಮಂಜುನಾಥ್‌ ಪ್ರಸಾದ್‌ ಅವರಿಗೆ ಬಿಬಿಎಎಂಪಿ ಆಯುಕ್ತ ಹುದ್ದೆಯನ್ನು ಹೆಚ್ಚುವರಿಯಾಗಿ ನೀಡಿದೆ.

ಅನಿಲ್‌ ಕುಮಾರ್ ಅವರನ್ನು ಸಾರ್ವಜನಿಕ ಉದ್ದಿಮೆಗಳ ಇಲಾಖೆಯ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿಯಾಗಿ ನೇಮಿಸಲಾಗಿದೆ. ಈ ಹುದ್ದೆಯನ್ನು ವಹಿಸಿಕೊಂಡಿದ್ದ ವಿ. ರಶ್ಮಿ ಮಹೇಶ್‌ ಅವರನ್ನು ಕನ್ನಡ ಮತ್ತು ಸಂಸ್ಕೃತಿಕ ಇಲಾಖೆಯ ಕಾರ್ಯದರ್ಶಿಯಾಗಿ ವರ್ಗಾವಣೆ ಮಾಡಲಾಗಿದೆ.

ದಾವಣಗೆರೆ: ಸೂಳೆಕೆರೆ ಬಳಿಯ ಗುಡ್ಡಗಾಡು ಪ್ರದೇಶದಲ್ಲಿ ನಡೆದ ಕೊಲೆಗೆ ಸಂಬಂಧಿಸಿದ ಆರೋಪಿಯನ್ನು ಪತ್ತೆಹಚ್ಚುವಲ್ಲಿ ತುಂಗಾಳದ್ದು ಪ್ರಮುಖ ಪಾತ್ರ.

ನಾಗರಕಟ್ಟೆ ಗ್ರಾಮದ ಚಂದ್ರಾನಾಯ್ಕ(25) ಎಂಬುವರು ಸೂಳೆಕೆರೆ  ಬಳಿಯ ಗುಡ್ಡ ಪ್ರದೇಶದಲ್ಲಿ ಹತ್ಯೆಯಾಗಿದ್ದರು. ಅವರ ದೇಹದ ಮೇಲೆ ಬುಲೆಟ್ ನಿಂದಾದ ಗಾಯಗಳು ಪತ್ತೆಯಾಗಿದ್ದವು.

ಸ್ಥಳ ಪರಿಶೀಲನೆ, ಮಹಜರ್ ನಡೆಸುವ ವೇಳೆ “ತುಂಗ” ಕೊಲೆಯಾದ ವ್ಯಕ್ತಿ ಧರಿಸಿದ್ದ ಹ್ಯಾಟ್ ಅನ್ನು ಮೂಸಿ ವಾಸನೆ ಹಿಡಿದಿದ್ದಳು. ವಾಸನೆಯ ಆಧಾರದಲ್ಲಿ ಕೊಲೆಗಾರನ ಜಾಡು ಹಿಡಿದು ಕೊಲೆ ನಡೆದ ಸ್ಥಳದಿಂದ 11 ಕಿ.ಮೀ ದೂರದ ಕಾಶಿಪುರದಲ್ಲಿದ್ದ ಕೊಲೆಗಾರನ ಬಳಿಗೆ ಪೊಲೀಸರನ್ನು ಕರೆದೊಯ್ದಿದ್ದಳು.

ಆರೋಪಿಯನ್ನು ಚೇತನ್ ನಾಯ್ಕ(27) ಎಂದು ಗುರುತಿಸಲಾಗಿದೆ.ಆರೋಪಿಯಿಂದ ಕೊಲೆಗೆ ಬಳಸಲಾದ ಪಿಸ್ತೂಲ್, 5 ಬುಲೆಟ್ ಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಆರೋಪಿ ಹಾಗೂ ಆತನ ಸಹಚರರು ಈಚೆಗೆ ದಾರವಾಡದ ಮನೆಯೊಂದರಲ್ಲಿ ಕಳ್ಳತನ ಮಾಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಕಳ್ಳತನದ ವಿಚಾರ ತಿಳಿದಿದ್ದ ಚಂದ್ರಾನಾಯ್ಕ ತನಗೆ ಹಣ ಕೊಡದಿದ್ದರೆ ಪೊಲೀಸರಿಗೆ ಮಾಹಿತಿ ನೀಡುವುದಾಗಿ ಬೆದರಿಕೆ  ಹಾಕಿದ್ದ. ಇದರಿಂದ ಕೋಪಗೊಂಡಿದ್ದ ಚೇತನ್ ನಾಯ್ಕ ಗುಂಡು ಹಾರಿಸಿ ಹತ್ಯೆ ಮಾಡಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಅಂದ ಹಾಗೆ  “ತುಂಗಾ” ದಾವಣಗೆರೆ ಪೊಲೀಸ್ ಶ್ವಾನ ಧಳದಲ್ಲಿರುವ 9 ವರ್ಷದ  ಹೆಣ್ಣು ಶ್ವಾನ. ಡಾಬರ್ ಮನ್ ತಳಿಯ  ಇವಳು ಸುಮಾರು 75 ಕ್ರಮಿನಲ್ ಪ್ರಕರಣಗಳನ್ನು ಭೇದಿಸಲು ಪೊಲೀಸರಿಗೆ ಸಹಾಯ ಮಾಡಿದ್ದಾಳೆ.