ಲೋಕಾಯುಕ್ತ ಬಲೆಗೆ ಪಟ್ಟಣದ ಸಾರ್ವಜನಿಕ ಆಸ್ಪತ್ರೆ ವೈದ್ಯಾಧಿಕಾರಿ ಡಾ.ಹರಿಪ್ರಸಾದ್
ತುರುವೇಕೆರೆ: ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಯ ಆಡಳಿತ ವೈದ್ಯಾಧಿಕಾರಿ ಡಾ.ಹರಿಪ್ರಸಾದ್ ಅವರು ಹೆರಿಗೆ ಸಂಬಂಧ 3 ಸಾವಿರ ಲಂಚದ ಹಣ ಪಡೆಯುವಾಗ ಲೋಕಾಯುಕ್ತ ಬಲೆಗೆ ಗುರುವಾರ ರಾತ್ರಿ ಸಿಕ್ಕಿ ಬಿದ್ದಿದ್ದಾರೆ.
ತುಮಕೂರಿನ ಹನುಮಂತರಾಯಪ್ಪನಿಗೆ ತುರುವೇಕೆರೆಯಲ್ಲಿ ಸಂಬಂಧಿಗಳು ಇದ್ದುದರಿಂದ ತಮ್ಮ ಮಗಳಾದ ಅಂಕಿತಾಳನ್ನು ಹೆರಿಗೆಗಾಗಿ ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಗೆ ಡಿ.19ರಂದು ದಾಖಲಿಸಿ ಹೆರಿಗೆ ಮಾಡಿಸಿದ್ದರು.
3 ಸಾವಿರ ಹಣ ನೀಡಿದರೆ ಗುರುವಾರ ಡಿಸ್ಚಾರ್ಜ್ ಮಾಡುವುದಾಗಿ ಹೆರಿಗೆ ವೈದ್ಯ ಮತ್ತು ಆಡಳಿತ ವೈದ್ಯಾಧಿಕಾರಿ ಡಾ.ಹರಿಪ್ರಸಾದ್ ಹನುಮಂತರಾಯಪ್ಪನಿಗೆ ಲಂಚಕ್ಕಾ ಬೇಡಿಕೆ ಇಟ್ಟಿದ್ದರು.
ಈ ಬಗ್ಗೆ ಹನುಮಂತರಾಯಪ್ಪ ತುಮಕೂರು ಲೋಕಾಯುಕ್ತ ಪೊಲೀಸರಿಗೆ ದೂರು ಸಹ ನೀಡಿದ್ದರು. ಗುರುವಾರ ಸಂಜೆ ರೋಗಿಯ ತಂದೆಯಿಂದ 3 ಸಾವಿರ ಹಣವನ್ನು ಪಡೆಯುವಾಗ ವೈದ್ಯರು ಲೋಕಾಯುಕ್ತ ಪೊಲೀಸರ ಬಲೆಗೆ ಸಿಕ್ಕಿ ಬಿದ್ದಿದ್ದಾರೆ. ಲೋಕಾಯುಕ್ತರು ವೈದ್ಯರನ್ನು ವಶಕ್ಕೆ ಪಡೆದು ತನಿಖೆ ಮುಂದುವರೆಸಿದ್ದಾರೆ.
ಈ ಸಂದರ್ಭದಲ್ಲಿ ಲೋಕಾಯುಕ್ತ ಇನ್ಸ್ ಪೆಕ್ಟರ್ಗಳಾದ ರಾಮರೆಡ್ಡಿ, ಸಲೀಂ ಅಹಮದ್, ಮತ್ತು ಶಿವರುದ್ರಪ್ಪ ಮೇಟಿ ಸೇರಿ ಸಿಬ್ಬಂದಿ ಇದ್ದರು.
