Uncategorized

ಕವಿತೆಗೂ ಒಂದು ದಿನ

ಕವಿತೆಗೂ ಒಂದು ದಿನ. ಅದು ಮಾರ್ಚ್ 21. ಕವಿತೆ ಕೂಡ ಕಲೆಯಂತೆ. ಅಭಿವ್ಯಕ್ತಿಗೆ ಹೇಳಿ ಮಾಡಿಸಿದ ಆಯಾಮ. ರಸಾನುಭಾವಿ ಮಾತ್ರವೇ ಆಸ್ವಾದಿಸಬಲ್ಲ. ಓದಿ “” ಕವಿತೆ ದಿನ”. ಕವಯಿತ್ರಿ ಕಣ್ಣಲ್ಲಿ.


ವಿಶ್ವ ಕವಿತೆ ದಿನ

*************

ಕವಿತೆ ಮೂಡುವುದಿಲ್ಲ
ಬೇಕೆಂದಾಗ.

ಬಂದೇ ಬಿಟ್ಟಿತು ಎಂದಾಗ
ನುಗ್ಗಿ ಮನಸ್ಸಲ್ಲಿ
ಹೃದಯದಲ್ಲಿ
ಕೊನೆಗೆ ಅಕ್ಷರದಲ್ಲಿ…

ಪ್ರೀತಿ, ಪ್ರೇಮ, ಮೋಹ
ಲೋಕದ ನೋವು
ಕಲ್ಪನೆ , ಸಮೀಕರಣ…
ಯಾವುದಕ್ಕಾದರೂ ಬಸಿರಾಗಬಹುದು ಕವಿತೆ

ಅಕ್ಷರದಲ್ಲಿ ಹೆತ್ತು
ವಾಚನದಲ್ಲಿ ಹಗುರಾಗಿ
ಮತ್ತೆ ಭಾವಕ್ಕೆ ಬಸಿರಾಗಿ
ಕಣ್ಣೀರಾಗಬಹುದು…
ಕ್ರಾಂತಿ ಗೀತೆಯಾಗಬಹುದು

ಯಾರದೋ ಭಾವ
ಇನ್ಯಾರದೋ
ಅನುಭೂತಿ.

ಹೃದಯದ ಕುಂಚದಿ
ಹೊರಬಂದ ಚಿತ್ರ ಪಟ
ಈ ಕವಿತೆ.

ಮೂರ್ತ ಅಮೂರ್ತವಾಗಿ
ಕವಿಗೆ ಮಾತ್ರ ಮುತ್ತಿಟ್ಟು
ಗುಟ್ಟು ಮಾತೇ
ಕವಿತೆಯಾಗಿ ಹೊಮ್ಮಿ…

ಗೋಳಾಡಲಾರದ ನೋವುಗಳು
ಕವಿತೆಯಾಗಿ ಹೊಮ್ಮಿ
ಸರಿಯಾದ ಎದೆಗೆ
ಚಿಮ್ಮಿದ ಬಾಣಗಳು.

ಗೌಪ್ಯ ಸಮೀಕರಣದಿಂದ
ನೂರು ಭಾವ ಹೊಮ್ಮಿಸುವ
ಹೃದಯ ಬೀಜಾಸುರರು

ನಿನಗೂ ಒಂದು ದಿನವೇ ?

ಕೆಂಪು ಗುಲಾಬಿ
ಮೊದಲ ಮಳೆ

ಯಾವಾಗ ಕವಿತೆಯಾಗಿ..
ಮನಸ್ಸಲ್ಲಿ ಗುಂಗಾಗಿ

ಕ್ಷಣ ಮೈಮರೆತು

ತುಟಿ ಮೇಲೆ ನಸುನಗು
ಎದೆಯಲ್ಲಿ ರೋಷ

ಬಂದ ಗಳಿಗೆಯೇ
ಕವಿತೆಯ ಜನ್ಮ ಕ್ಷಣ

ಕವಿತೆ…. ಹೇ ಕವಿತೆ

ಎಲ್ಲಿ ಅವಿತಿದ್ದೆ ….


ಡಾ II ರಜನಿ

Comments (1)

  1. Matured language ma’am and Experience of the life ma’am

Comment here