ಮಾರ್ಚ್.15ರಿಂದ ಚಿಕ್ಕಬೀರನಕೆರೆ ಮಾಯಮ್ಮ ದೇವಿ ಜಾತ್ರೆ ಹಾಗೂ ಸ್ವರ್ಣ ಕಿರೀಟ ಸಮರ್ಪಣಾ ಮಹೋತ್ಸವ

ತುರುವೇಕೆರೆ: ತಾಲ್ಲೂಕಿನ ಮಾಯಸಂದ್ರ ಹೋಬಳಿಯ ಚಿಕ್ಕಬೀರನಕೆರೆ ಗ್ರಾಮದೇವತೆ ಮಾಯಮ್ಮದೇವಿಯ ಜಾತ್ರೆ ಹಾಗೂ ದೇವಿಯವರಿಗೆ ಸ್ವರ್ಣ ಕಿರೀಟ ಧಾರಣೆ ಮಹೋತ್ಸವವು ಮಾ. 15 ರಿಂದ 17 ರವರೆಗೆ ನಡೆಯಲಿದೆಂದು ಮಾಯಮ್ಮದೇವಿ ಆಚರಣ ಸಮಿತಿಯ ಕುರಿಬಾಂಡ್ ಖ್ಯಾತಿ ರಂಗಸ್ವಾಮಿ ತಿಳಿಸಿದರು. ಪಟ್ಟಣದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಾ, ಚಿಕ್ಕಬೀರನಕೆರೆ ಗ್ರಾಮ ದೇವತೆ ಒಕ್ಕಲಿನ 24 ಗ್ರಾಮಗಳು ಆಚರಿಸುವ ವಿಶೇಷ ಹಬ್ಬ ಇದಾಗಿದ್ದು ಮಾಯಮ್ಮದೇವಿಯವರ ಹಬ್ಬ ಮೂರು ದಿನಗಳ ಕಾಲ ಜರುಗಲಿದೆ. ಹಬ್ಬದ ಅಂಗವಾಗಿ ಆರತಿ ಉತ್ಸವ, ಉಯ್ಯಾಲೋತ್ಸವ, ಹೂವಿನ ಪಲ್ಲಕ್ಕಿ ಉತ್ಸವ, ಸೇರಿದಂತೆ ಅನೇಕ ಧಾರ್ಮಿಕ ಕಾರ್ಯಕ್ರಮಗಳು ಸಾಂಪ್ರದಾಯಿಕವಾಗಿ ಜರುಗಲಿವೆ. ಇದೇ ವೇಳೆ ಚಿಕ್ಕಬೀರನಕೆರೆ ಗ್ರಾಮಸ್ಥರು, ಮಾಯಮ್ಮ ದೇವಿ ಗೆಳೆಯರ ಬಳಗ ಹಾಗೂ ಬುಡಕಟ್ಟಿನ ಭಕ್ತರುಗಳು ಹಬ್ಬದ ಅಂಗವಾಗಿ ಮಾಯಮ್ಮದೇವಿಯವರಿಗೆ ಸ್ವರ್ಣಕಿರೀಟ ಧಾರಣೆಯನ್ನು ಸಹ ನೆರವೇರಿಸಲಿದ್ದಾರೆ. ಹಬ್ಬ ಆಚರಣೆ ವೇಳೆ ವೀರಭದ್ರನ ಕುಣಿತ, ಚಿಟ್ಟಿಮೇಳ, ಮದ್ದುಗುಂಡಿನ ಪ್ರದರ್ಶನಗಳಂತಹ ವಿಭಿನ್ನ ಜಾನಪದ ಕಲೆಗಳ ವೈಭವ ಅನಾವರಣಗೊಳ್ಳಲಿದೆ. ಮಾಯಮ್ಮ ದೇವಿ ಕೃಪಾ ಪೋಷಿತ ನಾಟಕ ಮಂಡಳಿ ವತಿಯಿಂದ ‘ಕೃಷ್ಣ ಸಂಧಾನ’ ಎಂಬ ಪೌರಾಣಿಕ ನಾಟಕವೂ ಸಹ ಪ್ರದರ್ಶನಗೊಳ್ಳಲಿದೆ. ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡು ದೇವಿ ಕೃಪೆಗೆ ಪಾತ್ರರಾಗುವಂತೆ ಮನವಿ ಮಾಡಿದರು.