ಗಡಿ ಕಾಯುವ ವೀರಯೋಧರಿಗೆ ಸ್ವಾತಂತ್ರ್ಯ ದಿನ ಅರ್ಪಣೆ : ಶಾಸಕ ಸಿ ಬಿ ಎಸ್

ಚಿಕ್ಕನಾಯಕನಹಳ್ಳಿ : ಗುರುವಾರ (ಆಗಸ್ಟ್ 15) ಬೆಳಗ್ಗೆ ತಾಲ್ಲೂಕು ಕ್ರೀಡಾಂಗಣದಲ್ಲಿ ಜರುಗಿದ 78’ನೇ ಸ್ವಾತಂತ್ರ್ಯ ‌ದಿನಾಚರಣೆಯ ಅಂಗವಾಗಿ ತಹಸೀಲ್ದಾರ್ ಕೆ ಪುರಂದರ್ ಧ್ವಜಾರೋಹಣ ನಡೆಸಿದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಶಾಸಕ ಸಿ ಬಿ ಸುರೇಶ್ ಬಾಬು’ರವರು ಸ್ವಾತಂತ್ರ್ಯ ದಿನಾಚರಣೆಯ ತಮ್ಮ ಭಾಷಣದಲ್ಲಿ, ತಾವು ಆಚರಿಸುವ ಸ್ವಾತಂತ್ರ್ಯ ದಿನಾಚರಣೆಯನ್ನು ದೇಶದ ಗಡಿ ಕಾಯುವ ವೀರಯೋಧರನ್ನು ಸ್ಮರಿಸುತ್ತಾ ಆಚರಿಸಿಕೊಳ್ಳಬೇಕಾಗಿ ನಾಡಿಗೆ ಕರೆ ಕೊಟ್ಟರು. ಛಳಿ ಮಳೆ ಗಾಳಿ ಬಿಸಿಲು ಬೇಗೆ ಎಲ್ಲವನ್ನೂ ಸಹಿಸಿಕೊಂಡು, ತಮ್ಮ ಕುಟುಂಬಗಳಿಂದ ಬಹುದೂರವಿದ್ದು, ದೇಶದ ಹಿತ ಮತ್ತು ಭದ್ರತೆಗಾಗಿ ಗಡಿ ಕಾಯುತ್ತಿರುವ ಯೋಧರೇ ನಮ್ಮ ನಿಜವಾದ ನಾಯಕರಾಗಬೇಕು. ಅರೆಕ್ಷಣವೂ ಹಿಂದೆಮುಂದೆ ಯೋಚಿಸದೆ ದೇಶಕ್ಕಾಗಿ ತ್ಯಾಗ ಬಲಿದಾನಗಳನ್ನು ನೀಡುವ ನಮ್ಮ ಯೋಧರ ಋಣ ನಮ್ಮ ಮೇಲಿದೆ ಎಂದು ಅವರು ನುಡಿದರು.

ಅದೇ ರೀತಿ ಪುರುಷನ ಹೆಗಲಿಗೆ ಹೆಗಲು ಕೊಟ್ಟು ಸರಿಸಮನಾಗಿ ದೇಶದ ಅಭಿವೃದ್ಧಿಯಲ್ಲಿ ದುಡಿಯುತ್ತಿರುವ ಮಹಿಳೆಯೂ ನಮಗೆ ಮುಖ್ಯ ಆದರ್ಶವಾಗಬೇಕು. ಈ ಆಧುನಿಕ ಭಾರತದಲ್ಲಿ ನಮ್ಮ ಮಹಿಳೆಯರು ಪುರುಷರ ಸರಿಸಾಟಿಯಾಗಿ ಎಲ್ಲ ರಂಗಗಳಲ್ಲೂ ಯಶಸ್ಸು ಸಾಧಿಸುತ್ತಿರುವುದು ಗಮನಾರ್ಹವಾದ ವಿಷಯ. ಇದು ನಾವು ಕಳೆದ 78 ವರ್ಷಗಳಲ್ಲಿ ಸಾಧಿಸಿರುವ ಬಹಳ ದೊಡ್ಡ ಯಶಸ್ಸೂ ಹೌದು ಎನ್ನುತ್ತಾ ಎಲ್ಲರಿಗೂ ಸ್ವಾತಂತ್ರ್ಯೋತ್ಸವದ ಶುಭಾಶಯಗಳನ್ನು ತಿಳಿಸಿದರು.

ಬಾಕ್ಸ್ ಐಟಮ್ :
ನಾಡು ನುಡಿ ನೆಲ ಜಲದ ಬಗ್ಗೆ ಅಭಿಮಾನ ಮೂಡಲಿ : ತಹಸೀಲ್ದಾರ್ ಪುರಂದರ್

ಶರಣ ತತ್ವ, ಸೂಫಿ ಪಥ, ತತ್ವಪದ, ಕೀರ್ತನಕಾರ, ಭಕ್ತಿ, ದಾಸ, ಪರಂಪರೆ, ಗುರುಕಾರ್ಯ, ಗುರದೀಕ್ಷೆಗಳ ಸಂಪ್ರದಾಯ-ಆಚರಣೆಗಳನ್ನು ಮೈಗೂಡಿಸಿಕೊಂಡಿರುವ ನಾಡು ನಮ್ಮದು. ಎಲ್ಲರೊಳಗೂ ತಾತಯ್ಯ ಎಂದೆನ್ನುವ ಬಹುತ್ವದ ನಾಡು ಇದು. ಸರ್ವರಿಗೂ ಸಮಪಾಲು-ಸರ್ವರಿಗೂ ಸಮಬಾಳು ಎಂಬ ಸಮಾನತೆ, ಸಾಮಾಜಿಕ ನ್ಯಾಯದ ಸ್ವಾವಲಂಬಿ ಭಾರತ ನಮ್ಮದು. ಇಂತಹ ನಮ್ಮ ಭಾರತ ಇಂದು ಶೈಕ್ಷಣಿಕವಾಗಿ, ವೈಜ್ಞಾನಿಕವಾಗಿ, ವೈಚಾರಿಕವಾಗಿ, ಔದ್ಯೋಗಿಕವಾಗಿ, ತಂತ್ರಜ್ಞಾನ ಸುಧಾರಿತ ಕ್ಷೇತ್ರವಾಗಿ ಕ್ಷಣಕ್ಷಣಕ್ಕೂ ಬೆಳೆಯುತ್ತಿದೆ, ಬದಲಾಗುತ್ತಿದೆ. ಈ ಹಿಂದೆ ನಮ್ಮ ದೇಶ ದಾಸ್ಯದಲ್ಲಿತ್ತು. ಪರಕೀಯರ ಆ ದಾಸ್ಯದಿಂದ ಬಿಡುಗಡೆಯಾಗಿ 78 ವರ್ಷಗಳೇ ಕಳೆದಿವೆ. ನಮ್ಮ ಅಭಿಮಾನ, ಸ್ವಾಭಿಮಾನ ಎಂದೆಂದೂ ಕುಂದದು. ಹೊಸ ತಲೆಮಾರಿನ ನಮ್ಮೀ ಯುವ ಪೀಳಿಗೆಯಲ್ಲೂ ನಾಡು ನುಡಿ ನೆಲ ಜಲದ ಬಗ್ಗೆ ಆ ಅಭಿಮಾನ-ಸ್ವಾಭಿಮಾನ ಎಂದೆಂದೂ ಚಿರಾಯುವಾಗಿರಲಿ ಎಂದು ಸ್ವಾತಂತ್ರ್ಯ ದಿನಾಚರಣೆಯ ತಮ್ಮ ಭಾಷಣದ ಮೂಲಕ ತಹಸೀಲ್ದಾರ್ ಕೆ ಪುರಂದರ್ ಜನತೆಗೆ ಸಂದೇಶ ನೀಡಿದರು.

ವಿಐಎಸ್ ಶಾಲೆಯ ಮಕ್ಕಳು ವಂದೇ ಮಾತರಂ, ಸಾರೇ ಜಹಾಂ ಸೆ ಅಚ್ಛಾ, ಝಂಡಾ ಊಂಚಾ ರಹೇ ಹಮಾರಾ ತರಹದ ರಾಷ್ಟ್ರಪ್ರೇಮದ ಗೀತೆಗಳನ್ನು ಹಾಡಿದರು.

ಸ್ವಾತಂತ್ರ್ಯ ದಿನಾಚರಣೆ ಕಾರ್ಯಕ್ರಮದಲ್ಲಿ, ತಾಲ್ಲೂಕಿನ ವಿವಿಧ ಇಲಾಖೆಗಳ ಎಲ್ಲ ಅಧಿಕಾರಿಗಳು, ಸಿಬ್ಬಂದಿ ವರ್ಗದವರು, ಶಾಲಾ-ಕಾಲೇಜು ಮಕ್ಕಳು, ಶಿಕ್ಷಕರು, ಉಪನ್ಯಾಸಕರು, ಹಿರಿಯರು, ಪುರಪ್ರಮುಖರು, ಸಾರ್ವಜನಿಕರು, ಸಂಘ-ಸಂಸ್ಥೆಗಳು ಹಾಗೂ ಮಾಧ್ಯಮದವರು ಪಾಲ್ಗೊಂಡಿದ್ದರು.

__ಸಂಚಲನ
ಚಿಕ್ಕನಾಯಕನ ಸೀಮೆಯಿಂದ