ಲಸಿಕಾ ಅಭಿಯಾನಕ್ಕೆ ಹೆಗಲು ನೀಡಿದ 93ರ ವೃದ್ಧೆ

ಪಾವಗಡ: ಪಟ್ಟಣದ 23 ನೇ ವಾರ್ಡ್ ಕನುಮಲ ಚೆರುವು ಬಡಾವಣೆಯ 93 ವರ್ಷದ ವೃದ್ಧೆ ತಾವಾಗಿಯೇ ಲಸಿಕಾ ಕೇಂದ್ರಕ್ಕೆ ಆಗಮಿಸಿ  ಲಸಿಕೆ ಹಾಕಿಸಿಕೊಂಡರು.

ದೇಶದ್ಯಂತ ಲಸಿಕಾ ಅಭಿಯಾನ ನಡೆಯುತ್ತಿದೆ. ಜಿಲ್ಲೆ, ತಾಲ್ಲೂಕುಗಳಿಗೆ ನಿತ್ಯ ಇಂತಿಷ್ಟು ಡೋಸ್ ಲಸಿಕೆ ಹಾಕಿಸಲೇ ಬೇಕು ಎಂದು ಖಡ್ಡಾಯವಾಗಿ ಆದೇಶ ನೀಡಲಾಗುತ್ತಿದೆ.

ಹೀಗಾಗಿ ಮನೆ ಮನೆಗೆ ಹೋಗಿ ಲಸಿಕೆ ಹಾಕಿಸಿಕೊಳ್ಳುವಂತೆ ಇಲಾಖಾ ಸಿಬ್ಬಂದಿ ಜಾಗೃತಿ ಮೂಡಿಸುತ್ತಿದ್ದಾರೆ.

ಇಲ್ಲೊಬ್ಬ  ವೃದ್ಧೆ ಇಲಾಖಾ ಸಿಬ್ಬಂದಿ ಮನೆ ಬಾಗಿಲು ತಟ್ಟುವ ಮುನ್ನವೇ ಲಸಿಕಾ ಕೇಂದ್ರಕ್ಕೆ ಹೋಗಿ ಲಸಿಕೆ ಹಾಕಿಸಿಕೊಂಡಿದ್ದಾರೆ. ಇದು ಲಸಿಕೆ ಹಾಕಿಸಿಕೊಳ್ಳಲು ಭಯಪಡುವವರಿಗೆ ಧೈರ್ಯ ತುಂಬುವಂತಿದೆ. .

ಮಂಗಳವಾರ ಬೆಳ್ಳಂ ಬೆಳಿಗ್ಗೆ  ಪಟ್ಟಣದ 23 ನೇ ವಾರ್ಡ್ ಕನುಮಲ ಚೆರುವು ಬಡಾವಣೆಯಲ್ಲಿ ಲಸಿಕೆ ಹಾಕಿಸಿಕೊಳ್ಳುವಂತೆ  ಅಧಿಕಾರಿಗಳು ಮನೆ ಮನೆಗೆ ಹೋಗಿ ಜಾಗೃತಿ ಮೂಡಿಸುತ್ತಿದ್ದರು. ಆದರೆ ಲಸಿಕೆ ಹಾಕುತ್ತಿರುವ ವಿಚಾರ ತಿಳಿದು ಬೀಬಿಜಾನ್(93) ಸ್ವಯಂ ಪ್ರೇರಣೆಯಿಂದ ಲಸಿಕಾ   ಹಾಕಿಸಿಕೊಂಡರು.

ಕೇವಲ ಲಸಿಕೆ ಹಾಕಿಸಿಕೊಳ್ಳುವುದಷ್ಟೆ ಅಲ್ಲದೆ ಲಸಿಕೆ ಹಾಕಿಸಿಕೊಂಡರೆ ಅಡ್ಡ ಪರಿಣಾಮಗಳಾಗುತ್ತದೆ ಎಂದು ಅಪಪ್ರಚಾರ ಮಾಡುವವರಿಗೆ   ಅಜ್ಜಿ ಬುದ್ಧಿ ಮಾತು ಹೇಳಿದ್ದಾರೆ.   ಲಸಿಕೆ ಹಾಕಿಸಿಕೊಂಡಲ್ಲಿ ಸೋಂಕು ತಡೆಗಟ್ಟಬಹುದು ಎಂದು ನೆರೆ ಹೊರೆಯವರಿಗೆ ಇಳಿವಯಸ್ಸಿನ ವೃದ್ಧೆ ಅರಿವು ಮೂಡಿಸಿದ್ದಾರೆ. ಮಾಹಿತಿ ತಿಳಿದ ಅಧಿಕಾರಿಗಳು ವೃದ್ಧೆಯ ಕಾರ್ಯಕ್ಕೆ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.