ಕಡಿಮೆ ಖರ್ಚಿನಲ್ಲಿ ಮೊಲದ ಬಿಸಿನೆಸ್

ಚಿತ್ರ, ಬರಹ : ಈರಪ್ಪ ನಾಯ್ಕರ್

ಕಡಿಮೆ ಹೂಡಿಕೆಯೊಂದಿಗೆ ಹೆಚ್ಚು ಆದಾಯ ಗಳಿಸುವುದು ಹೊಸ ಟ್ರೆಂಡ್. ಹೆಚ್ಚು ರಿಸ್ಕ್ ತೆಗೆದುಕೊಳ್ಳದೇ ಸುರಕ್ಷಿತ ಆದಾಯಕ್ಕಾಗಿ ಜನರು ಯೋಜಿಸುತ್ತಾ ದಿನದಿಂದ ದಿನಕ್ಕೆ ಅಪ್ಡೇಟ್ ಆಗುತ್ತಿರುತ್ತಾರೆ.

ನೀವು ಕಡಿಮೆ ಹೂಡಿಕೆ ಮಾಡಿ ಹೆಚ್ಚು ಲಾಭ ಗಳಿಸುವ ಬಿಸಿನೆಸ್ ಬಗ್ಗೆ ಆಲೋಚಿಸುತ್ತಿದ್ದರೆ ಈ ಐಡಿಯಾ ಬೆಸ್ಟ್. ಕಡಿಮೆ ಬಂಡವಾಳ ಮತ್ತು ಕೈ ತುಂಬಾ ಅಲ್ಲದಿದ್ದರೂ ಒಂದು ಮಟ್ಟಿಗೆ ಹಣ ಗಳಿಸಲು ಸೂಕ್ತ ಆದಾಯ ತರುವ ಒಳ್ಳೆಯ ಉದ್ಯೋಗ ಎಂದರೆ ಮೊಲ ಸಾಕಾಣಿಕೆ.

ಬೇರೆ ಉದ್ಯೋಗದೊಂದಿಗೆ ಈ ಬಿಸಿನೆಸ್ ಮಾಡಬಹುದು. ಎಂದು ತಿಳಿಸಿಕೊಟ್ಟ ಅದೆಷ್ಟು ಉದಾಹರಣೆಗಳಿವೆ, ಅಂತಹದೆ ಉದಾಹರಣೆ ಕೂಡಾ ಇಲ್ಲಿನ ಹುಬ್ಬಳ್ಳಿಯ ಯುವಕರ ತಂಡವು ಸಾಬೀತು ಪಡಿಸಿದೆ, “ಓಜ್ಯಾ ರ‍್ಯಾಬಿಟ್ ಫಾರ್ಮ್” ಎಂಬ ಹೆಸರಿನಿಂದ ಕೇವಲ ಮೂವತ್ತು ಮೂಲಗಳಿಂದ ಉದ್ಯಮ ಪ್ರಾರಂಭಿಸಿದ ಈ ತಂಡ ಇಂದು ಸಾಕಷ್ಟು ಪ್ರಮಾಣದಲ್ಲಿ ಇಳುವರಿ ಪಡೆದು ಉತ್ತಮ ಗುಣಮಟ್ಟದಲ್ಲಿ ಆದಾಯ ಪಡೆಯುತ್ತಿದ್ದಾರೆ.

ಫಾರ್ಮ್ ಎಲ್ಲಿರುವುದು?

ಅಂದ ಹಾಗೆ ಈ ಫಾರ್ಮ್ ಇರುವುದು ಕಲಘಟಗಿ ತಾಲ್ಲೂಕಿನ ಮಿಶ್ರಿಕೋಟಿ ಗ್ರಾಮದ ಹೊರವಲಯದಲ್ಲಿ. ಓಜ್ಯಾ ರ‍್ಯಾಬಿಟ್ ಫಾರ್ಮ್ನ ಆರು ಜನ ಸದಸ್ಯರು ವಿರೇಶ ಚಂದರಗಿ, ಶಿವಪ್ರಸಾದ, ಮಹೇಶ, ಸುಲೆಮನ್, ಚೇತನ ಹಾಗೂ ಶ್ರೀನಿವಾಸ. ಸೇರಿ ಈ ಸೂಕ್ತ ಪ್ರದೇಶ ಆಯ್ಕೆ ಮಾಡಿಕೊಂಡು ಇಲ್ಲಿ ಫಾರ್ಮ್ ನಿರ್ಮಿಸಿಕೊಂಡಿದ್ದಾರೆ.

ಈ ಉದ್ಯಮ ನಷ್ಟ :

ಅರೇ! ಮೇಲೆ ನೋಡಿದರೆ ಲಾಭ ಎಂದು ಹೇಳಿ ಇಲ್ಲಿ ನಷ್ಟ ಅಂತ ಬರಿತಾರಲ್ಲ ಎಂದುಕೊಳ್ಳಬೇಡಿ, ಕೆಲವು ಫಾರ್ಮ್ ಗಳು ಮೊಲ ಸಾಕಾಣಿಕೆ ಮಾಡುವವರು ತಪ್ಪು ಮಾರ್ಗದರ್ಶನ ನೀಡಿ ಲಾಭದಾಯಕವಲ್ಲದ ವ್ಯಾಪಾರ ಎಂದು ಮೊಳಕೆಯಲ್ಲಿ ಚಿವುಟಿ ಹಾಕುವ ಸಂಚು ಹೂಡುತ್ತಾರೆ. ಆ ಮೋಸಕ್ಕೆ ಬಲಿಯಾದವರಲ್ಲಿ ನಾವು ಕೂಡಾ ಒಬ್ಬರು ಎಂದು ವಿರೇಶ ಚಂದರಗಿಯವರು ಬೇಸರ ವ್ಯಕ್ತ ಪಡಿಸಿದರು. ಅದಕ್ಕೆ ತಲೆ ಕೆಡಸಿಕೊಳ್ಳದ ಈ ತಂಡದ ಸದಸ್ಯರು ಹುಮ್ಮಸಿನಿಂದ ಮರು ಪ್ರಯತ್ನ ನಡೆಯಿಸಿ ಉದ್ಯಮ ಆರಂಭಿಸಿದರು.

ಇದು ಕಡಿಮೆ ಖರ್ಚಿನ ಉದ್ಯಮ :

ಹೌದು ಇದಕ್ಕೆ ಹೆಚ್ಚು ಖರ್ಚು ಮಾಡುವ ಅವಶ್ಯಕತೆಯಿಲ್ಲ, ಕೆವಲ ೧೦ ಮೊಲಗಳಿಂದ ಉದ್ಯಮ ಪ್ರಾರಂಭಿಸಬಹುದಾಗಿದೆ. ೭ ಹೆಣ್ಣು (ಡೋ) ಮೊಲಗಳು, ೩ ಗಂಡು (ಬಕ್) ಮೊಲಗಳು, ಅಂದರೆ ಯುನಿಟ್ ಪ್ರಕಾರ ಸಾಕಬಹುದಾಗಿದೆ. ದಿನಕ್ಕೆರಡು ಬಾರಿ ಆಹಾರ ಒದಗಿಸಬೇಕು.

ಸ್ವಚ್ಚತೆಗಾಗಿ ಒಬ್ಬ ವ್ಯಕ್ತಿ ಇದ್ದರೆ ಇವುಗಳ ಆರೈಕೆ ಮಾಡಬಹುದಾಗಿದೆ. ಓಜ್ಯಾ ರ‍್ಯಾಬಿಟ್ ಫಾರ್ಮ್ ಕೆವಲ ಮೂರು ಯುನಿಟ್‌ನಿಂದ ಪ್ರಾರಂಭಿಸಿ ಸದ್ಯ ೨೦೦ಕ್ಕೂ ಹೆಚ್ಚು ಮೊಲಗಳಿವೆ. ಇವುಗಳಲ್ಲಿ ಮಾರಟಕ್ಕೆಂದು ಸಿದ್ದವಾಗಿರುವ ೩ಕೆ.ಜಿ ತೂಕ ಹೊಂದಿರುವ ಮೊಲಗಳ ಸಂಖ್ಯೆ ೧೦೦ರಷ್ಟಿವೆ.

ಔಷಧೋಪಚಾರ ಮತ್ತು ಆಹಾರ :

ಮೊಲಗಳಿಗೆ ಕಜ್ಜಿ, ಜ್ವರ ಇತರೆ ಸಮಸ್ಯೆಗಳು ಬಂದರೆ ಕೆಲವೊಂದಿಷ್ಟು ಒಳ್ಳೆಯ ಗುಣಮಟ್ಟದ ಔಷಧಿಯನ್ನು ವೈದ್ಯರ ಸಲಹೆಯ ಮೇರೆಗೆ ನೀಡಲಾಗುತ್ತದೆ. ಕೆಲವೊಮ್ಮೆ ನಾವೇ ಕೊಡುತ್ತವೆ ಎಂದು ಉದ್ಯಮಿ ತಿಳಿಸುತ್ತಾರೆ.

ಆಹಾರ ಎಂದರೆ ಫೀಡ್, ಗರಿಕೆ, ಕುದುರೆ ಮೆಂತೆ ಹಾಗೂ ಕೈ ತಿಂಡಿ ನೀಡಲಾಗುತ್ತದೆ. ಒಂದು ಮೊಲಕ್ಕೆ ೮೦ ರಿಂದ ೧೦೦ಗ್ರಾಂ. ಆಹಾರ ಹಾಗೂ ೨೫೦ಎಂ.ಎಲ್ ನೀರು ನೀಡಲಾಗುತ್ತದೆ. ಒಳ್ಳೆಯ ಇಳುವರಿಗಾಗಿ ಫೀಡ್ ನೀಡುವುದು ಒಳಿತು.

ತಾಯಿ ಮೊಲ ಮತ್ತು ಮರಿಗಳ ಆರೈಕೆ :

ಇವುಗಳ ಆರೈಕೆಗಾಗಿ ಬಹಳಷ್ಟು ಸಮಯ ನೀಡಬೇಕೆಂಬ ನಿಯಮವಿಲ್ಲ. ತಾಯಿ ಮೊಲ ಮರಿ ನೀಡಿದ ತರುವಾಯ ಮರಿಗಳನ್ನು ತಾಯಿ ಮೊಲಗಳು ತುಳಿಯದಂತೆ ಮುನ್ನೆಚ್ಚರಿಕೆ ವಹಿಸಬೇಕು. ಒಂದು ತಾಯಿ ಮೊಲ ೬ ರಿಂದ ೧೨ ಮರಿಗಳಿಗೆ ಜನ್ಮ ನೀಡುತ್ತವೆ. ಮರಿಗಳನ್ನು ಒಂದು ರಟ್ಟಿನ ಬಾಕ್ಸ್ನಲ್ಲಿ ಇಟ್ಟು ತಾಯಿ ಮೊಲವನ್ನು ೬ ರಿಂದ ೧೦ ನಿಮಿಷಗಳಷ್ಟು ಬಿಟ್ಟು ಹಾಲು ಕುಡಿದ ನಂತರ ಮತ್ತೆ ಪಂಜರದಲ್ಲಿ ತಾಯಿ ಮೊಲವನ್ನು ಬಿಡಲಾಗುತ್ತದೆ. ಹೀಗೆ ಮರಿಗಳ ೨೧ ದಿನಗಳವರೆಗೆ ಮರಿಗಳ ಆರೈಕೆ ಮಾಡುತ್ತಿರಬೇಕು. ಮರಿಗಳು ೧೫ ರಿಂದ ೨೦ ದಿನಗಳಲ್ಲಿ ಗರಿಕೆ ಹುಲ್ಲು ತಿನ್ನಲು ಮರಿಗಳು ಪ್ರಾರಂಭಿಸುತ್ತವೆ.

ಇವರಲ್ಲಿ ಸಿಗುವ ತಳಿಗಳು :

ಇವರಲ್ಲಿ ಒಟ್ಟು ೫ ತಳಿಗಳಿದ್ದು, ಯು.ಎಸ್ ವೈಟ್, ಸೋವಿತ್ ಚಿಂಚಿಲಾ, ಪ್ಲೆಮಿಶ್ ಜೈಂಟ್, ಅಲಸ್ಕಾ ಹಾಗೂ ನ್ಯೂಜಿಲೆಂಡ್ ವೈಟ್ ಇವೆ. ಹೆಚ್ಚು ಮಾನ್ಯತೆಯನ್ನು “ನ್ಯೂಜಿಲೆಂಡ್ ವೈಟ್” ಎಂಬ ಮೊಲದ ತಳಿಗೆ ನೀಡಿದ್ದಾರೆ. ಇವುಗಳು ಸಾಮಾನ್ಯವಾಗಿ ನಮ್ಮ ಪ್ರದೇಶ ಮತ್ತು ವಾತಾವರಣಕ್ಕೆ ಹೊಂದಿಕೊಳ್ಳುವ ಪ್ರಾಣಿಗಳಾಗಿವೆ.

ಮತ್ತು ಇವುಗಳ ಇಳುವರಿ ಕೂಡ ತುಂಬಾ ಹೆಚ್ಚಾಗಿದ್ದು ಲಾಭದಾಯಕವಾಗಿದೆ. ಇವುಗಳನ್ನು ಕೆಲವರು ಆಹಾರ(ಮಾಂಸ)ಕ್ಕಾಗಿ ಬಳಸಿದರೆ, ಮತ್ತೆ ಕೆಲವರು ಸಾಕುಪ್ರಾಣಿಗಳಾಗಿ ಪ್ರಾಣಿ ಪ್ರೀಯರು ಸಾಕುತ್ತಾರೆ ಹಾಗೂ ಲ್ಯಾಬರೋಟರಿಗಾಗಿ ಹೆಚ್ಚು ಬೆಡಿಕೆಯಲ್ಲಿದೆ. ಎಂದು ಉದ್ಯಮಿ ವಿರೇಶ ತಿಳಿಸಿದರು.

ಸಾಕುವವರಿಗೆ ತರಬೇತಿ :

ಇಲ್ಲಿ ಮೊಲಗಳನ್ನು ಕೊಂಡು ತೆಗೆದುಕೊಳ್ಳುವವರಿಗೆ ತರಬೇತಿಯನ್ನು ಕೂಡಾ ನೀಡಲಾಗುತ್ತದೆ. ಹೆಚ್ಚಿನ ಮಾಹಿತಿಗಾಗಿ ಓಜ್ಯಾ ರ್ಯಾಬಿಟ್ ಫಾರ್ಮ್ ವಿರೇಶ ಚಂದರಗಿ ಸಂಪರ್ಕಿಸಬಹುದು. ಫೋನ್ ನಂಬರ ೭೬೨೪೯೩೦೮೦೩, ೮೧೦೫೪೫೦೧೮೩