ತುರುವೇಕೆರೆ: ಹಲವು ಅಪಮಾನಗಳ ನಡುವೆ ನೊಂದವರ, ದಮನಿತ ಸಮುದಾಯಗಳ ಹೆಣ್ಣು ಮಕ್ಕಳಿಗೆ ಉಚಿತ ಶಿಕ್ಷಣ ನೀಡಲು ಬಹುವಾಗಿ ಶ್ರಮಿಸಿದ ಸಾವಿತ್ರ ಬಾಯಿಫುಲೆಯವರ ಹೋರಾಟ ಸಮಕಾಲೀನ ಮಹಿಳೆಯರಿಗೆ ಪ್ರೇರಣೆಯಾಗಿದೆ ಎಂದು ತಾಲ್ಲೂಕು ಅಕ್ಷರ ದಾಸೋಹದ ಸಹಾಯಕ ನಿರ್ದೇಶಕಿ ಎಚ್.ಕೆ.ಸವಿತಾರವರು ಅಭಿಪ್ರಾಯಪಟ್ಟರು.
ಪಟ್ಟಣದ ಕನ್ನಡ ಭವನದಲ್ಲಿ ತಾಲ್ಲೂಕು ಸಾವಿತ್ರ ಬಾಯಿಫುಲೆ ಶಿಕ್ಷಕಿಯರ ಸಂಘದಿಂದ ಸಾವಿತ್ರ ಬಾಯಿಫುಲೆ ಜನ್ಮದಿನದ ಅಂಗವಾಗಿ ತಾಲ್ಲೂಕಿನ ಉತ್ತಮ ಶಿಕ್ಷಕಿಯರಿಗೆ ಅಕ್ಷರದ್ವ ಪ್ರಶಸ್ತಿ ಪ್ರಧಾನ, ನಿವೃತ್ತ ಶಿಕ್ಷಕಿಯರಿಗೆ ಸನ್ಮಾನ ಹಾಗು ಕರ್ನಾಟಕ ರಾಜ್ಯ ಸರ್ಕಾರಿ ನೌಕರರ ಸಂಘ ತುರುವೇಕೆರೆಗೆ ಶಿಕ್ಷಣ ಇಲಾಖೆಯಿಂದ ಆಯ್ಕೆಯಾದವರಿಗೆ ಅಭಿನಂಧನಾ ಕಾರ್ಯಕ್ರಮದಲ್ಲಿ ಗುರುವಾರ ಸಂಜೆ ಭಾಗವಹಿಸಿ ಮಾತನಾಡಿದರು.
ಸಾವಿತ್ರ ಬಾಯಿಫುಲೆಯವರು ಭಾರತೀಯ ಸಮಾಜದ ಸುಧಾರಕಿಯಾಗಿ ಮತ್ತು ಶಿಕ್ಷಣ ತಜ್ಞರಾಗಿ ದುಡಿದವರು. ಇದಕ್ಕೂ ಮೊದಲು ಜ್ಯೋತಿರಾವ್ ಪುಲೆಯವರು ತಮ್ಮ ಮಡದಿಗೆ ತಾವೇ ಶಿಕ್ಷಣಕೊಟ್ಟು ತದನಂತರ ಮಿಷನರಿ ಶಾಲೆಗೆ ಶಿಕ್ಷಕಿ ತರಭೇತಿಗೆ ಕಳುಹಿಸಿ ಶಿಕ್ಷಕಿಯಾಗುವಂತೆ ನೆರವಾಗಿದ್ದರು. ಪತಿ, ಪತ್ನಿಯರು ಬಡ, ಶೋಷಿ ಹೆಣ್ಣು ಮಕ್ಕಳಿಗೆ ಶಿಕ್ಷಣದ ಕಣ್ಣಾಗಿ 14 ಶಾಲೆಗಳನ್ನು ತೆರೆದು ಉಚಿತ ಶಿಕ್ಷಣವನ್ನು ನೀಡುವ ಮೂಲಕ ಸಮಾಜದಲ್ಲಿ ಮೌಢ್ಯ ಹಾಗು ತಮ್ಮ ಹಕ್ಕುಗಳನ್ನು ಪಡೆಯಲು ಪಶ್ನಿಸುವಂತೆ ಮಾಡಿದರು ಎಂದರು.
ಸಾವಿತ್ರ ಬಾಯಿಫುಲೆ ಶಿಕ್ಷಕಿಯರ ಸಂಘದ ತಾಲ್ಲೂಕು ಅಧ್ಯಕ್ಷೆ ಎಂ.ಟಿ.ಭವ್ಯ ಸಂಪತ್ ಮಾತನಾಡಿ, ತಾಲ್ಲೂಕು ಪ್ರಾಥಮಿಕ ಶಾಲಾ ಶಿಕ್ಷಕಿಯರ ಹಲವು ಸಮಸ್ಯೆಗಳ ಈಡೇರಿಕೆಗೆ ಧ್ವನಿಯಾಗಿ ನಿಂತು ಸಂಘವು ಹೋರಾಟ ಮಾಡುತ್ತಿದೆ. ಮಹಿಳೆಯರು ಹೆಚ್ಚು ಸಂಘಟಿತರಾಗಿ ಎಲ್ಲ ಕ್ಷೇತ್ರಗಳಲ್ಲಿ ತಮ್ಮ ಛಾಪು ಮೂಡಿಸುವಂತಾಗಬೇಕು ಹಾಗು ಹೆಚ್ಚಿನ ಸಂಖ್ಯೆಯಲ್ಲಿ ತಾಲ್ಲೂಕಿನ ಶಿಕ್ಷಕಿಯರು ಸಂಘದ ಸದಸ್ಯತ್ವ ಪಡೆದುಕೊಂಡು ಸಾವಿತ್ರ ಬಾಯಿಫುಲೆಯವರ ಆಶಯಗಳಿಗೆ ಅನುಗುಣವಾಗಿ ಸಂಘವನ್ನು ಮುನ್ನಡೆಸೋಣ ಎಂದು ಕಿವಿ ಮಾತು ಹೇಳಿದರು.
ಇದೇ ವೇಳೆ ನರ್ಸ್ ಶ್ವೇತ ಕೆ.ಎಸ್ ರವರು ಗರ್ಭಕೋಶ್ ಮತ್ತು ಸ್ತನ ಕ್ಯಾನ್ಸರ್ ಬಗ್ಗೆ ಜಾಗೃತಿ ಮೂಡಿಸಿದರು. ಅಕ್ಷರದ್ವ ಪ್ರಶಸ್ತಿಯನ್ನು ಶಿಕ್ಷಕಿಯರಾದ ಉಮಾ, ಸಾವಿತ್ರಮ್ಮ, ಹೇಮಾವತಿ, ಲಲಿತಮ್ಮಎಸ್, ಗಾಯಿತ್ರಿ, ಶಿವನಂಜಮ್ಮ, ರಮಾರವರಿಗೆ ಪ್ರಧಾನ ಮಾಡಲಾಯಿತು. ಇದೇ ವೇಳೆ ಷಣ್ಮುಕಪ್ಪ, ಲೋಕೇಶ್, ಪ್ರಶಾಂತ್ ಮತ್ತು ಯೋಗಾನಂದ್ ಹಾಗು ನಿವೃತ್ತ ಶಿಕ್ಷಕಿಯರನ್ನು ಅಭಿನಂಧಿಸಲಾಯಿತು.
ಸಮಾರಂಭದಲ್ಲಿ ಕ್ಷೇತ್ರ ಶಿಕ್ಷಣ ಇಲಾಖೆಯ ವ್ಯವಸ್ಥಾಪಕರಾದ ಕೆ.ಕೃಷ್ಣಪ್ರಸಾದ್, ಪ್ರಾಥಮಿಕ ಶಾಲಾ ಶಿಕ್ಷಕರ ಸಂಘದ ನಿರ್ದೇಶಕಿ ಹನುಮಕ್ಕ, ಜಲಜಾಕ್ಷಿ, ಜಿಪಿಟಿ ಶಿಕ್ಷಕರ ಸಂಘದ ತಾಲ್ಲೂಕು ಅಧ್ಯಕ್ಷ ಶ್ರೀಧರ್, ಪದಾಧಿಕಾರಿಗಳಾದ ಗೀತಾ, ವನಜಾಕ್ಷಿ, ನೇತ್ರಾ ನಿರೂಪಿಸಿ, ಸುಜಾತ ರಾಮಯ್ಯ ಪ್ರಾರ್ಥಿಸಿ, ಮಮತಾ ಲೇಪಾಕ್ಷ ಮೂರ್ತಿ ಸ್ವಾಗತಿಸಿ, ರಶ್ಮಿ ಶಶಿಕುಮಾರ್ ಪ್ರಾಸ್ತಾವಿಕ ನುಡಿ ನುಡಿದು, ಸರ್ವಮಂಗಳ ಮೋಹನ್ಬಾಬು ವಂದಿಸಿದರು, ಪದಾಧಿಕಾರಿಗಳಾದ ಗೀತಾ, ವನಜಾಕ್ಷಿ ಮತ್ತಿತರರಿದ್ದರು.
