ಪಾವಗಡ: ಪಟ್ಟಣದ ಬಳ್ಳಾರಿ ರಸ್ತೆಯ ಟೈಲ್ಸ್ ಅಂಗಡಿಯ ಶೀಟ್ ಕತ್ತರಿಸಿ 8 ಸಾವಿರ ರೂ ನಗದು, ಸಿ.ಸಿ. ಟಿ.ವಿ. ಸಾಮಗ್ರಿಗಳನ್ನು ಕಳವು ಮಾಡಲಾಗಿದೆ.
ಇಕ್ಬಾಲ್ ಬಾಷ ಎಂಬುವರಿಗೆ ಸೇರಿದ ಮೆಟ್ರೊ ಟೈಲ್ಸ್ ಮಳಿಗೆಯ ಶೀಟ್ ಕತ್ತರಿಸಿ ಗಲ್ಲಾ ಪೆಟ್ಟಿಗೆಯಲ್ಲಿದ್ದ ಸುಮಾರು 8 ಸಾವಿರ ನಗದು, ಡಿವಿಆರ್, ವೈ ಫೈ ರೌಟರ್ ಇತ್ಯಾದಿ ಸಾಮಗ್ರಿಗಳನ್ನು ಕಳವು ಮಾಡಲಾಗಿದೆ. ಇದೇ ರಸ್ತೆಯ ಯುವ ರಾಜ ಇರಿಗೇಷನ್ ಸಿಸ್ಟಂ ಮಳಿಗೆಯ ಹಿಂಬದಿ ಬಾಗಿಲು ಮುರಿಯಲಾಗಿದೆ. ಕಳೆದ ವಾರ ಭವಾನಿ ಸ್ಟೀಲ್ಸ್ ಮಳಿಗೆಯಲ್ಲಿಯೂ ಕಳವಿಗೆ ಯತ್ನಿಸಲಾಗಿತ್ತು.
ಇತ್ತೀಚೆಗೆ ಪಟ್ಟಣದಲ್ಲಿ ದ್ವಿಚಕ್ರ ವಾಹನಗಳ ಕಳವು ಹೆಚ್ಚುತ್ತಿದೆ. ಪ್ರಮುಖ ರಸ್ತೆ ಬದಿಯ ಅಂಗಡಿ ಮಳಿಗೆಗಳಲ್ಲಿ ಕಳವು ಪ್ರಕರಣಗಳು ಹೆಚ್ಚುತ್ತಿವೆ. ಪೊಲೀಸರು ಅಗತ್ಯ ಕ್ರಮ ತೆಗೆದುಕೊಂಡು ಗಸ್ತು ಹೆಚ್ಚಿಸಬೇಕು ಎಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.
