ಕೋರೋಣ

ಡಾ. ರಜನಿ ಎಂ

ಕರೋನಾ ಎಲ್ಲೆಡೆ ಹೆಚ್ಚಾಗುತ್ತಿರುವ ಈ ಸಂದರ್ಭದಲ್ಲಿ. ಜನರು ಎಚ್ಚರಿಕೆಯಿಂದ ಇರಬೇಕು. ಎಷ್ಟೇ ಜಾಗೃತಿ ವಹಿಸಿದರೂ ಕರೋನಾಕೆ ತುತ್ತಾಗುತ್ತಿದ್ದಾರೆ. ಕರೋನಾ ಬಂದರೂ ಹೆಣ್ಣು ತನ್ನ ಗಂಡ , ಮನೆ ಜವಾಬ್ದಾರಿಗಳಿಂದ ಕಳಚಿಕೊಳ್ಳಲು ಸಾಧ್ಯವಾಗುವುದಿಲ್ಲ.. ಇಂತಹ ದುರಿತ ಸಂದರ್ಭದಲ್ಲಿ ಹೆಣ್ಣು ತನಗಾಗಿ ತಾನು ಬದುಕುವುದಿಲ್ಲ. ವಾರ್ಡ್ ನಿಂದ ಕಂಡ ನೇರ ಅನುಭವವನ್ನು ಇಲ್ಲಿ ಕವಯತ್ರಿ ರಜನಿ ಅವರು ದಾಖಲಿಸಿದ್ದಾರೆ.

ಕೋರೋಣ
—————-

ಗಂಡನಿಗೂ ಕರೋನ
ಹೆಂಡತಿಗೂ ಕರೋನ
ಮಕ್ಕಳಿಗೂ ಕರೋನ

ಹೆಂಡತಿಗೆ ಬರೇ ಗಂಡನ ಚಿಂತೆ
ಮಾಸ್ಕ್ ಕಿತ್ಕೋತಾರೇ

ಆಕ್ಸಿ ಜಿನ್ ಕಡಿಮೆ ಆಗಿದೆ..
ಹೋಗಿ ಹೋಗಿ ನೋಡ್ಕಂಬತ್ತಾರೆ

ಆಕೆಗೇ ಜ್ವರ ಸುಸ್ತು
ಆದರೂ ಗಂಡ ಮಕ್ಕಳದೇ
ಚಿಂತೆ

ಮನೆಯ ಬೆಳೆದ ಮಕ್ಕಳಿಗೆ
ನಾಲಿಗೆ ಹೊಡೆದು ಹೋಗುವಷ್ಟು
ಸಲಹೆ

ಚಿನ್ನದ ಬಳೆ …ಸೂಜಿ ಹಾಕಲು ಅಡ್ಡ
ಆದರೂ ಕತ್ತರಿಸಲಿಲ್ಲ…
ಗಂಡ ಮಾಡಿಸಿಕೊಟ್ಟ ಸೆಂಟಿಮೆಂಟ್

ಮೊಮ್ಮಗನಿಗೆ
ತಾಚಿ ಮಾಡಪ್ಪ

ಎಂದು ವಿಡಿಯೋ ಕಾಲ್
ಮಾಡುವ ಆಜ್ಜಿ

ನಾಯಿಗೆ ಪಿಡಿಗ್ರಿ
ಜೊತೆಗೆ ಮೊಟ್ಟೆ ಹಾಕಲು
ಸೂಚನೆ

ಈ ಹೆಂಗಸರಿಗೆ ಬಂದರೂ
ಕರೋನ ಕೆಮ್ಮು

ಮನೆ, ಮಕ್ಕಳು ಮೊಮ್ಮಕ್ಕಳು.. ಗಂಡ…
ನಾಯಿದೇ ಚಿಂತೆ

ಯಾವಾಗ ಬದುಕುವರೋ
ತಮಗಾಗಿ

ಗಂಡಸರ ವಾರ್ಡು
ನಿಶ್ಯಬ್ಧ..
ಕರೋನಾ ಬುದ್ಧರು

ಈಗಲಾದರೂ
ಹೆಂಗಸರಿಗೆ

ಆಗಲಿ
ಜ್ಞಾನದೋಯ

ಎಂದು ದೇವರಲ್ಲಿ
ಕೋರೋಣ