ಭಾನುವಾರದ ಕವಿತೆ:ಮುಂಗಾರು ಮಳೆ

ಡಾ// ರಜನಿ ಎಂ

ಗುಡುಗು ಮಿಂಚು.. ಜಿಟಿ ಜಿಟಿ ಸೋನೆ
ಮೆಲ್ಲನೆ ತಂಗಾಳಿ..

ಮಳೆ ಹನಿ ..ಮುಖವ ಮುತ್ತಿಕ್ಕಲು
ಅಡ್ಡ ಬರುವ…. ಮುಖಗವಸು

ಹರಿದು ಮೋರಿಯಲಿ..ಮಳೆ ನೀರು
ಸಣ್ಣ ಸಣ್ಣ ಹೊಂಡ..

ಆಕೆ ರಂಗೋಲಿ ಬಿಡುತ್ತಾ
ನಕ್ಕಳೇ ? ಕಾಣಲಿಲ್ಲ

ಪುಟ್ಟ ಮೊಮ್ಮಗಳಿಗೆ
ಕುಯ್ ಕುಂಯ್ ಶೂಸ್ …ಮಾಸ್ಕ್

ಕೈಹಿಡಿದು ಬರುತ್ತಿದ್ದ ತಾತ?…
ತಾತ ಮಾಯ

ಅಮೆಜಾನ್ ಆರ್ಡರ್
ಹೊಸ್ತಿಲಲ್ಲಿ

ಜೊಮೆಟೋ ಪಾರ್ಸೆಲ್
ಗ್ಲೌಸ್ ಕೈ

ಮೈ ಮೇಲೆ ಮಕ್ಕಳು ಬಿದ್ದು
ಆಡುತ್ತಿದ್ದವೇ?

ಶಾಲೆಗೆ ತಿಂಡಿ
ಬಾಕ್ಸ್? ಕಟ್ಟುತ್ತಿದ್ದೆವೆ?

ಪಕ್ಕದ ಮನೆಯಲ್ಲಿ
ಹರಟೆ ? ಕೊಚ್ಚುತ್ತಿದ್ದೆವೆ?

ಕೈಯ ಮಿದು… ಕಣ್ಣ ಹನಿ
ಎದೆಯ ಬಿಸಿ ಕಾಣೆಯೆ?

ಧೋ ಮಳೆ..
ಮಧುರ ನೆನಪು

ಅಂಗಳದಲ್ಲೇ ಬಿದ್ದಿರುವ ಪೇಪರ್
ಹಾಕದಿರುವ ರಂಗೋಲಿ..

ಮುಂದೂಡಿದ ಮದುವೆ
ಹೋದ ಕೆಲಸ…

ಸ್ಕೂಲ್ ಎಂದರೆ ಏನು?
ಎನ್ನುವ ಟಿಕ್ ಟಾಕ್..

ಫುಡ್ ಕಿಟ್ ಪಡೆದ ಕೈ..
ಕಿತ್ತಾಕಿದ ಕಲ್ಲಂಗಡಿ..

ಮೊಬೈಲಲ್ಲಿ ಬ್ಲಾಕ್ ಫಂಗಸ್
ಫೋಟೋ..ಕಷಾಯದ ರೆಸಿಪಿ

ಗಂಗೆ ತಟದಲ್ಲಿ
ಹೆಣದ ಬಟ್ಟೆ…

ಸಂಗಮದಲ್ಲಿ..
ಸಾಮೂಹಿಕ ಅಸ್ತಿ

ಆಕಾಶದ ಅಳು….

ಮಂಗಾರು ಮಳೆ -21